ՙՙԵԹԵ ԷՐԴՈՂԱՆԻ ԵՐԴՄՆԱԿԱԼՈՒԹՅԱՆԸ ՉՄԱՍՆԱԿՑԵԼՈՎ ԲՈՅԿՈՏԵԻՆՔ, ՈՉ ՈՔ ՉԷՐ ՆԿԱՏԻ՚

ՙԵԹԵ ԷՐԴՈՂԱՆԻ ԵՐԴՄՆԱԿԱԼՈՒԹՅԱՆԸ
ՉՄԱՍՆԱԿՑԵԼՈՎ ԲՈՅԿՈՏԵԻՆՔ, ՈՉ ՈՔ ՉԷՐ ՆԿԱՏԻ՚

Երեկ ՙԲարգավաճ Հայաստան՚ կուսակցության նախագահին կից խորհրդատվական խմբի նիստում քննարկված հարցերից մեկը վերաբերում էր իշխանությունների կայացրած այն որոշմանը, որ Թուրքիայի նախագահի երդմնակալության արարողությանը ՀՀ-ն պետք է մասնակցի ԱԳ նախարարի մակարդակով: ՙՀաշվի առնելով, որ երկու երկրների միջեւ գոյություն չունեն դիվանագիտական հարաբերություններ, մենք գտնում ենք, որ պետք է ընտրվեր մասնակցության այլ մակարդակ՚, - ասված է ԲՀԿ-ական կառույցի հայտարարության մեջ: Ի դեպ, նմանատիպ հայտարարություններ հնչել են նաեւ որոշ այլ քաղաքական ուժերի կողմից: Իսկ թե որ մակարդակով ավելի ընդունելի կլիներ Հայաստանի մասնակցությունը թուրքական այս միջոցառմանը ու ընդհանրապես արժեր մասնակցել, ՙԻրավունքը՚ պարզեց Հայաստանի ԳԱԱ Արեւելագիտության ինստիտուտի տնօրեն, թուրքագետ ՌՈՒԲԵՆ ՍԱՖՐԱՍՏՅԱՆԻ տեսակետը.
- Կարծում եմ` եթե մասնակցում է մեր արտգործնախարարը, ապա նա պետք է օգտագործի այդ հնարավորությունը` Հայաստանի տեսակետը հայ-թուրքական հարաբերությունների վերաբերյալ բարձրաձայնելու ու Թուրքիայի վարած քաղաքականության բացասական կողմերը նշելու համար: Այդ այցը պետք է օգտագործել` մեր շահերից ելնելով եւ մեր տեսակետները, մեր մոտեցումները մեկ անգամ եւս ներկայացնել աշխարհի տարբեր երկրների ներկայացուցիչներին: Այս միջոցառումը կարեւոր է այն առումով, որ այն տեղի է ունենում հենց Թուրքիայում: Եվ հենց Անկարայում մեր արտգործնախարարը, կարծում եմ, պետք է բարձրաձայնի Թուրքիայի ոչ քաղաքակիրթ մոտեցումների մասին` Հայոց ցեղասպանության ճանաչման առումով:
- Հայերիս մասին Թուրքիայի նախագահի կողմից բազմիցս հնչեցված վիրավորանքներից հետո, արդյո±ք պետք չէր ընդհանրապես բոյկոտել ու չմասնակցել արարողակարգին:
- Իհարկե, բոյկոտել արժեր, բայց եթե Թուրքիայի նախագահի երդմնակալության արարողությանը չմասնակցելով բոյկոտեինք, ոչ ոք չէր նկատի: Իսկ եթե գնանք ու այնտեղ Էրդողանի ձեր նշած հայտարարության մասին էլ խոսվի մեր արտգործնախարարի կողմից, դա ավելի մեծ նշանակություն կունենա:

ՀՐԱՆՏ ՍԱՐԱՖՅԱՆ