ՇՎԱՐՑԵՆԵԳԵՐԻ ՀԵՏ ՊԱՅՄԱՆԱԳԻՐ ԵՄ ԿՆՔԵԼ.«ԱԴԱՄՍ» ԸՆԿԵՐՈՒԹՅՈՒՆԸ ՃՆՇՈՒՄ Է ՁԱՅՆԱՍԿԱՎԱՌԱԿՆԵՐ ՎԱՃԱՌՈՂՆԵՐԻՆ

ՇՎԱՐՑԵՆԵԳԵՐԻ ՀԵՏ ՊԱՅՄԱՆԱԳԻՐ ԵՄ ԿՆՔԵԼ.«ԱԴԱՄՍ» ԸՆԿԵՐՈՒԹՅՈՒՆԸ ՃՆՇՈՒՄ Է

ՁԱՅՆԱՍԿԱՎԱՌԱԿՆԵՐ ՎԱՃԱՌՈՂՆԵՐԻՆ

Փաստաբան Տիգրան Մուրադյանը,  ձայնա և տեսասկավառակների վաճառքը կազմակերպող  կրպակատերեր Աննա Մարտիրոսյանը, Աշոտ Մաթևոսյանն ու Գեղամ Կարապետյանն այսօրվա մամլո ասուլիսում խոսեցին տեսա և ձայնասկավառակների ոլորտում առկա խնդիրների մասին: Փաստաբան Տիգրան Մուրադյանի  տեղեկացմամբ   տեսա և ձայնասկավառակների մանրածախ  առևտրով զբաղվող անձանց նկատմամբ իրավապահների կողմից հետապնդումներ են իրականացվում, բացի այդ ՝ տեսա և ձայնասկավառակների վաճառքով զբաղվող անձինք դժգոհում են՝  այն, ինչ իրենք վաճառում են, կա նաև համացանցում:

Ինչ վերաբերում է կոնկրետ իրավապահների հետապնդումներին,  Տ. Մուրադյանի  խոսքով՝  մի քանի օր առաջ ոստիկանության Արաբկիրի և Մալաթիա բաժինների իրավապահները առգրավել են որոշակի քանակով ձայնա և տեսասկավառակներ և դա արել են  ձայնասկավառակներ արտադրող «Ադամս» ընկերության հաղորդումների հիման վրա՝մասնավորապես  ընկերությունը  հաղորդում է ներկայացրել ոստիկանություն՝ասելով, որ ձայնասկավառակների վաճառքով զբաղվող կրպակատերերը ապօրինի  վաճառում են իր արտադրանքը, բայց փաստաբանը պնդում է՝ առգրավված ձայնասկավառակների 90%-ը  չի պատկանում  «Ադամսին»: «Այս  կերպ փորձում են ճնշում գործադրել  փոքր բիզնեսի վրա» ,- ասաց Մուրադյանը:

Կրպակատերերն էլ ասացին, որ «Ադամս» ընկերությունից  Նվեր անունով  մի անձ իրավապահների  հետ եկել  են իրենց մոտ և ճնշումներ գործադրել՝ պահանջելով  իրենց ընկերությունից   գնել ձայնասկավառակները, քանի որ իրենց  են իբր պատկանում տարբեր ֆիլմերի, տեսա և ձայնասկավառակների վաճառքների իրավունքը: «Նվերն ինձ ասում է՝  Շվարցենեգերի հետ պայմանագիր եմ կնքել: Հիմա ես ինչ իմանամ՝ ինքը ճիշտ է ասում, թե ոչ: Ես այդ պայմանագիրը ումի՞ց պահանջեմ»,- ասաց Համեստ Խաչատրյանը՝ հավելելով, որ  ոստիկանության քաղաքային վարչությունը  իր եղբորն է տարել   ոստիկանություն ու ծեծել: Ըստ Համեստ Խաչատրյանի՝  հարկային տեսուչ Ռաֆայել Մկրտչյանը ևս խոչընդոտում է իր գործունեությանը, քանի որ նա ևս  զբաղվում է այդ բիզնեսով, բայց  վնասով է աշխատում:

Տիգրան Մուրադյանի խոսքով՝ հիմնականում  ձայնասկավառակ վաճառողներն իրենց արտադրանքը գնում են «Ռեքո Ռեքորդս» ընկերությունից: «Ընդհանուր առմամբ Աննա Մարտիրոսյանից առգրավվել է 139, Աշոտ Մաթևոսյանից՝886, Գեղամ Կարապետյանից՝  156 սկավառակ: Մենք հիմա գրավոր բողոք ենք ուղարկել  դատախազություն՝ պահանջելու  պարզել՝ Արաբկիրի և Մալաթիայի բաժինների աշխատակիցների կողմից «Ադամս» ընկերության  աշխատակցի ցուցումով մեր կրպակներից քանի սկավառակներ են վերցրել, որոնք չեն պատկանում «Ադամս» ընկերությանը»,-եզրափակեց Տիգրան Մուրադյանը:

Սոնա Դավթյան