ՉՈՐՍ ԵՐԵԽԱՆԵՐԻ ՄՈՐ ԻՆՔՆԱՍՊԱՆՈՒԹՅԱՆ ՊԱՏՃԱՌԸ ԻՆՏԵՐՆԵՏՆ ԷՐ

ՉՈՐՍ ԵՐԵԽԱՆԵՐԻ ՄՈՐ ԻՆՔՆԱՍՊԱՆՈՒԹՅԱՆ ՊԱՏՃԱՌԸ ԻՆՏԵՐՆԵՏՆ ԷՐ

Օրերս ողբերգական դեպք էր տեղի ունեցել Վայոց Ձորի մարզում: Ջերմուկի Գնդեվազ գյուղի տներից մեկում` տան երկրորդ հարկի միջանցքում գտնվող գազի խողովակից խոտի ՙտուկի՚ թելով կախված վիճակում հայտնաբերել են տանտիրուհու` չորս երեխաների 34-ամյա մոր դին: Այս մասին մեզ հետ զրույցում ասաց Գնդեվազ գյուղի գյուղապետ Հ. ՄԿՐՏՉՅԱՆԸ: Թե ինչն էր երիտասարդ կնոջ ինքնասպանության պատճառը, գյուղապետը դժվարացավ պատասխանել նշելով.
-Բոլորս ապշած ենք, շատ հանգիստ, խելոք հարս էր: Դեպքի օրն էլ արտառոց որեւէ արարքով աչքի չի ընկել: Մինչեւ ինքնասպանություն գործելը` կինը ամուսնու հետ եղել է տան առաջին հարկում, այնուհետեւ բարձրացել է երկրորդ հարկ` երեխաներից մեկին քնեցնելու: Որոշ ժամանակ անց, երբ չի իջել ներքեւ, ամուսինը անհանգստացել է եւ երեխաներից մեկին ասել է, որ բարձրանա, տեսնի, թե ինչ եղավ մայրը: Երեխան բարձրացել է երկրորդ հարկ եւ տեսել մորը կախված վիճակում: Երեխայի ճչոցից ամուսինն էլ է բարձրացել եւ հայտնաբերել արդեն մահացած կնոջը:
34-ամյա կնոջ ինքնասպանության պատճառների մասին առավել մանրամասներ փորձեցինք պարզել վերջինիս ամուսնուց` Արթուրից, ով հուզմունքը հազիվ զսպելով` ասաց, որ մինչ օրս չի կարողանում հասկանալ, թե ինչն է այդքան կյանքով լեցուն, ժպտերես կնոջը ստիպել նման դաժան ձեւով վարվել իրենց հետ: Ամուսնու խոսքերով` թե դեպքի օրը եւ թե դեպքին նախորդող օրերին կինը որեւէ արտառոց արարքով աչքի չի ընկել: Միայն մի անսովոր բան է ամուսինը դեպքի օրը նկատել.
- Դեպքի օրը մենք ամեն օրվա պես ասել-խոսել ենք իրար հետ, ուղղակի այդ օրը սովորականից տարբեր էր նրանով, որ նույն ձեւի խոսում-ժպտում էր, բայց աչքերիս չէր նայում, հայացքը հա փախցնում էր ինձանից: Ես դա նկատել եմ առավոտվանից, կինս, որ միշտ աչքերն ինձանից չէր կտրում, այդ օրը երեսիս չէր նայում: Դեպքը տեղի է ունեցել երեխայի ննջասենյակում, երեխեքիցս մեկին սովորականից շուտ տարել էր քնացնելու, երբ տեսանք, որ ուշանում է, աղջկաս խնդրեցի բարձրանա, տեսնի` ինչ եղավ մայրը ու կանչի սուրճ խմելու: Աղջկաս բարձրանալն ու ՙմամա-մամա՚ գոռալը մեկ եղավ, միանգամից ես եւ տղաս վազեցինք վերեւ ու ականատես եղանք, թե ինչպես է կինս փոքր երեխայի ննջասենյակում երեխայի աչքի առաջ կախվել: Տպավորություն էր, որ հատուկ այնպես էր արել, որ հինգ տարեկան երեխաս արթնանա ու միանգամից իրեն տեսնի. էլ չգիտեմ` երեխան մեր ճվճվոցի±ց էր արթնացել, թե ավելի շուտ: Տեսա, որ տուկի թելով կախված է, բարձրացրի վերեւ` մտածելով, որ դեռ կօգնեմ, կփրկեմ, բայց` ապարդյուն...
Թե ինչն էր կնոջ ինքնասպանության պատճառը, ամուսինը դժվարացավ պատասխանել, բայց ասաց, որ կա մի վարկած, որի մասին մտածում է.
- Ինքը այնքան բարի էր, տասնյոթ տարվա համատեղ կյանքում ես որեւիցե ավելորդ բան չեմ նկատել, որ ասենք` խանդեմ կամ այլ բան: Մենք շատ լավ ենք միմյանց հասկացել, եղել ենք երջանիկ, որեւէ բանի պակաս չի ունեցել, ինչ ասել էª արել եմ, ոսկիներ ունեցել է, փողը միշտ ունեցել է, ուներ երկու համակարգիչ: Շատ էր սիրում տան գործերը վերջացնելուց հետո նստեր համակարգչի առջեւ, որ ինչպես ինքն էր ասում` ցրվեր: Ըստ իս` միակ պատճառը ինտերնետն էր (լացում է- Ի. Ա.): Դա ընդամենը վարկած է, չգիտեմ...
- Ինչի հիման վրա եք այդ վարկածը առաջ քաշում:
- Ինքը մաքուր է եղել, բայց հնարավոր է` ինքը ինտերնետում ինչ-որ մի բան է արել կամ չի արել, չգիտեմ: Միգուցե վախեցել է, որ ես օրերից մի օր հանկարծ իմանամ, թե ինքը ինչ է արել կամ ինչ է գրվում, կամ ինչ է տեսնում համակարգչում կամ ինտերնետում:
- Ինչ նկատի ունեք:
- Դեպքից հետո սկսել եմ մտածել, որ ինքը այդքան հավատարիմ էր ինձ, հնարավոր է, որ մտածել է, որ կարող է` չգիտեմ` ինչ արած լիներ, հետո չկարողանար իմ աչքերի մեջ նայել: Միգուցե դրա համար` հանուն ինձ կյանքին վերջ տվեց, մտածելով, որ աչքերիս մեջ չի կարող նայել, բայց ինձ որեւէ բան չասաց, գոնե մի բան ասեր...

ԻԼՈՆԱ ԱԶԱՐՅԱՆ