ԿՈՄԻՏԱՍՅԱՆ ՎԵՐԱՊՐՈՒՄՆԵՐԸ ԿՏԱՐԱԾՎԵՆ ՀԱՅԱՍՏԱՆՈՒՄ ԵՎ ՀԱՅԱՍՏԱՆԻ ՍԱՀՄԱՆՆԵՐԻՑ ԴՈՒՐՍ

ԿՈՄԻՏԱՍՅԱՆ ՎԵՐԱՊՐՈՒՄՆԵՐԸ ԿՏԱՐԱԾՎԵՆ ՀԱՅԱՍՏԱՆՈՒՄ ԵՎ ՀԱՅԱՍՏԱՆԻ ՍԱՀՄԱՆՆԵՐԻՑ ԴՈՒՐՍ

Համախմբվելով կոմիտասյան երեւույթի շուրջ`երգահան Վահան Արծրունին  եւ  կոմպոզիտոր Գրիգոր Առաքելյանը հանդիսատեսի համար նախապատրաստել են մեծ համերգ, որը նվիրված է հայ մեծանուն կոմպոզիտոր Կոմիտասի 145-ամյակին: Համերգը կրում է  «Կոմիտաս. Վերապրում» խորագիրը, որի  ընթացքում հանդիսատեսին կներկայացվի կոմպոզիտոր Գրիգոր Առաքելյանի  կոմիտասյան երաժշտության մշակումները եւ Վահան Արծրունու «Կոմիտաս. Տասը հայտնություն» երգաշարը`գրված Կոմիտասի բանաստեղծությունների հիման վրա: Գրիգոր Առաքելյանի խոսքով`համերգն անձամբ իր համար շատ յուրահատուկ է, քանի որ սովորաբար, եթե կատարում են  Կոմիտասի ստեղծագործությունները, ապա այնտեղ Կոմիտասը ավելի շատ ներկայանում է, որպես կոմպոզիտոր: «Այս համերգի ընթացքում մենք փորձելու ենք կոմիտասյան մոտեցումները եւ մտածողությունը  մատուցել մարդկանց, որովհետեւ մեծանուն հայը մեզ համար ոչ միայն կոմպոզիտոր է , այլեւ` մտածելակերպ: Համերգը մի վերապրում է  , ինչպես այսօրվա հայ արվեստագետը, երաժիշտը կարող է վերապրել Կոմիտասին եւ ինչ կստացվի դրա արդյունքում, ահա սա է համերգի ամբողջ շեշտը»,-նշեց ԳՐԻԳՈՐ ԱՌԱՔԵԼՅԱՆԸ:

Վահան Արծրունին փաստեց, որ համերգը ընդհանուր խոնարհումն է Կոմիտասի առաջեւ. « Տարին հոբելյանական է Կոմիտասի համար, մենք նշում ենք նրա 145-ամյակը, ուստի այս համերգը մեր նվիրաբերումն է Կոմիտասին»,-շեշտեց ՎԱՀԱՆ ԱՐԾՐՈՒՆԻՆ:

Ըստ Վ. Արծրունու` առաջին համերգը ցույց կտա` այն շարունակություն կունենա, թե ոչ. «Մենք բոլորս շահագրգռված ենք, որ այդ համերգով վերջնականապես հղկվի ծրագիրը եւ մեր մոտեցումները: Իհարկե , մենք պատրաստ ենք համերգային այդ ծրագիրը ներկայացնել ե՛ւ Հայաստանում ե՛ւ Հայաստանի սահմաններց դուրս: Կոմիտասյան տարի է գալիս, բացի տիտուլային  միջոցառումներից, որոնց մասին չգիտես ինչու ոչ ոք ոչինչ չգիտի, այլ ծրագրեր չկան»,-ավելացրեց արգահանը:

Անդրադառնալով կազմակերպչական աշխատանքներին Վահան Արծրունին նշեց, որ ներգրավված են այն բոլոր մարդիկ, ովքեր հասկանում են այս առաքելության նշանակությունը և կարևորությունը։ Իսկ հարցին, թե արդյոք Մշակույթի նախարարությունը չի աջակցում այս միջոցառմանը պարոն Առաքելյանը նշեց, որ իրենք որևէ սպասումներ չունեն Մշակույթի նախարարությունից, սակայն առաջարկների դեպքում կհամագործակցեն։

Նշենք, որ համերգը պաշտոնական աջակիցներ չունի, պարզապես աջակցում են այն մարդիկ, ովքեր կարեւորում ու գնահատում են համերգը: Համերգը տեղի կունենա օգոստոսի 27-ին`Կոմիտասի անվան Կամերային երաժշտության տանը:

ԶՎԱՐԹ ԽԱՉԱՏՐՅԱՆ