3000 ԵԶԴԻ ԿԻՆ ԻՍԼԱՄԻՍՏՆԵՐԻ ԿՈՂՄԻՑ ՎԱՃԱՌՎԵԼ Է. ՑԵՂԱՍՊԱՆՈՒԹՅՈՒՆԸ ՇԱՐՈՒՆԱԿՎՈՒՄ Է

Արխիվ 12-16 23 Օգոստոս, 2014 14:37

3000 ԵԶԴԻ ԿԻՆ ԻՍԼԱՄԻՍՏՆԵՐԻ ԿՈՂՄԻՑ ՎԱՃԱՌՎԵԼ Է. ՑԵՂԱՍՊԱՆՈՒԹՅՈՒՆԸ

ՇԱՐՈՒՆԱԿՎՈՒՄ Է

«Սինջար» եզդիների ազգային միավորում ՀԿ-ի նախագահ Բորիս Թամոյանն «Իրավունքի» հետ զրույցում ասաց, որ Իրաքում եզդիների վիճակը ծանր է. դրական առաջընթաց չկա, քանի որ եզդիական ջոկատները չունեն այն զենք-զինամթերքը, որով կկարողանան լուրջ հաջողությունների հասնել:

Բ. Թամոյանի խոսքով՝ եզդիական ջոկատներն ազատագրել են մի քանի գյուղ, բայց ծանր զրահատեխնիկա չունեն ռազմական հաջողությունները շարունակելու համար:

Ինչ վերաբերում է իսլամիստների կողմից առևանգված 500 կանանց ճակատագրին, «Սինջար» եզդիների ազգային միավորում ՀԿ-ի նախագահի խոսքով՝ առևանգված կանայք ու աղջիկները վաճառքի են հանվում 50-100 դոլարով: «3000 եզդի կին իսլամիստների կողմից վաճառվել է»,- ցավով ասաց ՀԿ-ի նախագահը:

Անդրադառնալով Հայաստանից 100.000 դոլարի աջակցությանը Իրաքի եզդիներին՝ Բորիս Թամոյանի խոսքով՝ այդ գումարը Հայաստանի նման պետության համար մեծ գումար է, բացի այդ՝այն հումանիտար օգնության համար է նախատեսված:

Վերջերս եզդիաբնակ Շամիրամ համայնքի ղեկավար Մրազ Բրոյանը հայտարարել էր, որ իրենք պատրաստ են հյուրընկալել Իրաքի եզդիներին, եթե Հայաստանի իշխանությունները նրանց թույլ տան գալ Հայաստան: «Տպավորությունն այնպիսի է, որ Հայաստանի իշխանությունները դեմ են Իրաքի եզդիների Հայաստան գալուն: Բորիս Թամոյանից հետաքրքրվեցինք՝ համամիտ է այս տեսակետին, թե ոչ: «Համամիտ եմ այնքանով,որ Հայաստանի իշխանություններն ասում են, որ եզդիներին պետք է ընդունեն վիզաներով, բայց փախստականների կոնվենցիայի համաձայն փախստականը չի կարող փաստաթուղթ ունենալ »,-ասաց Թամոյանը՝ հավելելով, որ Իրաքի եզդիներից հազարավորները կգան Հայաստան, եթե մեր պետությունը կարողանա նրանց ընդունել:

Աշխարհի եզդիների միության նախագահ Ազիզ Թամոյանը վերջերս Արցախի նախագահ Բակո Սահակյանին նամակ էր գրել՝խնդրելով Իրաքի եզդիներին բնակեցնել ԼՂ-ում: ԼՂՀ մամլո խոսնակ Դավիթ Բաբայանը մեզ հետ զրույցում ասաց, որ այդ հարցը քննարկման փուլում է. «Եզդի ժողովրդի նկատմամբ կատարվող բոլոր գործողությունները մենք որակել ենք որպես ցեղասպանություն, այսինքն՝ մենք քաղաքական գնահատական արդեն տվել ենք: Ինչքանով կկարողանանք, այդքանով կսատարենք նրանց:Թե ինչպիսին կլինի այդ օգնությունը, ցույց կտա ժամանակը»:

Սոնա Դավթյան