ՀԱՅՏՆԻ ՈՒ ՍԻՐՎԱԾ ԱՐՏԻՍՏՆԵՐԸ ՎԱՂԸ ԿՐԿԻՆ ԿՔԱՅԼԵՆ ԿԱՐՄԻՐ ԳՈՐԳԻ ՎՐԱՅՈՎ

ՀԱՅՏՆԻ ՈՒ ՍԻՐՎԱԾ ԱՐՏԻՍՏՆԵՐԸ ՎԱՂԸ ԿՐԿԻՆ ԿՔԱՅԼԵՆ ԿԱՐՄԻՐ ԳՈՐԳԻ ՎՐԱՅՈՎ

Վաղը «Էլ-Մար» կինոստուդիան մեծ շուքով կնշի իր ստեղծման 3-ամյակը: «Իրավունքի» հետ զրույցում դերասան, «Էլ-Մար» ընկերության հիմնադիր-տնօրեն ԱՐՄԵՆ ԴԱԼԼԱՔՅԱՆԸ նշեց, որ տարեցտարի ընդլայնվում է կինոստուդիայի թե մասնաճյուղերը, թե շրջագայություններն ու մրցանակները: Ըստ նրա, կինոստուդիայի թատերական խումբը շրջագայում է ոչ միայն ամբողջ Հայաստանով, այլ նաեւ Հայաստանի սահմաններից դուրս. «Մենք արդեն հանդես ենք եկել Վրաստանում: Այս տարի հոկտեմբերին հյուրախաղերով կրկին պիտի մեկնենք Վրաստան»,- տեղեկացրեց թատերախմբի գեղարվեստական ղեկավար Ա. Դալլաքյանն ու հավելեց. «Մեր թատերական ստուդիան, որպես շրջիկ թատերախումբ, ունի իր սեփական ներկայացումները: Արդեն հայտնի` «Գիքոր» եւ «Ռոմեո եւ Ջուլիետ» ներկայացումներից զատ բոլոր ներկայացումների ռեժիսորն ու սցենարի հեղինակն ինքս եմ: Անցյալ տարի 3D ֆորմատով բեմադրված «Դատապարտված սեր» ներկայացումը, որը մեծ արձագանք գտավ, միակն էր հայկական պատմության մեջ, որի ընթացքում հանդիսատեսը զգաց քամի, անձրեւ, մառախուղ եւ կայծակ: Հանդիսատեսն իսկապես դահլիճում անձրեւանոցով էր նստած: Ի դեպ, հոկտեմբերին պատրաստվում ենք եւս մեկ մեծ դրամայի` «Մայրս» վերնագրով»:

Ա. Դալլաքյանն անդրադառնալով վաղը կայանալիք կինոստուդիայի 3-ամյակին, նշեց, որ բազմաբովանդակ միջոցառում է սպասվում ներկաներին. «Միջոցառումը կազդարարվի կարմիր գորգով, որի վրայով կքայլեն հայտնի ու սիրված երգիչ-երգչուհիներ, արտիստներ, որին կհաջորդի տասը ներկայացման դրվագներ` մեկ ժամում: Որից հետո կլինի համերգային շոու-ծրագիր եւ մրցանակաբաշխություն, որտեղ անվանակարգված են հայտնի ու սիրված արտիստներ»:

ԼԻԼԻԹ ԵՂԻԱԶԱՐՅԱՆ