ՀԱՅԱՍՏԱՆԸ` ՉԻՆԱԿԱՆ ՕԼԻՄՊԻԱԴԱՅՈՒՄ

ՀԱՅԱՍՏԱՆԸ` ՉԻՆԱԿԱՆ ՕԼԻՄՊԻԱԴԱՅՈՒՄ

Չինաստանի Նանջինգ քաղաքում շարունակում են ընթանալ պատանեկան երկրորդ օլիմպիական խաղերը: Աշխարհի 204 երկրներից 14-18 տարեկան 3888 մարզիկ մասնակցում է այս մրցումներին, խաղարկվում են մեդալների 222 հավաքածու` 31 մարզաձեւերում:
Հայաստանի հավաքականը այս օլիմպիական խաղերին ներկայացնում են 14 մարզիկ, որոնք իրենց ուժերը փորձելու են 8 մարզաձեւերում: Հայ մարզիկներից մի քանիսն արդեն իսկ հասցրել են դուրս գալ մրցասպարեզ: Օգոստոսի 17-ին առաջինը պայքարի մեջ է մտել ձյուդոիստ Հարություն Դերմիշյանը, որը մեդալ չի չնվաճել: 66 կգ քաշային կարգում հանդես եկող Դերմիշյանը բրոնզե մեդալի համար պայքարում հաղթել է պուերտոռիկացի, բուլղարացի եւ ամերիկացի ձյուդոիստներին, սակայն չորրորդ գոտեմարտում պարտվել է ուզբեկ Սուխրոբ Թուրսունովին` մնալով առանց մեդալի: Հայ ձյուդոիստը գրավել է 7-րդ տեղը:
Հարություն Դերմիշյանի ելույթների մասին ՙԻրավունքի՚ հետ խոսեց ձյուդոյի Հայաստանի հավաքականի գլխավոր մարզիչ ՏԻԳՐԱՆ ԲԱԲԱՅԱՆԸ.
-Կորեացու հետ գոտեմարտում, կարծում եմ, եղավ մրցավարական սխալ: Գոտեմարտի վերջին 40 վայրկյանին իպոն հնարքի գնաց, բայց մրցավարը հնարքը ցածր գնահատեց, չնայած որ 100%-անոց իպոն էր: Գիտեք, ամեն դեպքում ցավալի էր այդ պարտությունը: Մյուս երեք գոտեմարտերում հաղթեց, միայն ուզբեկ մրցակցին պարտվեց, որը բավականին ուժեղ մարզիկ է: Չեմ կարող ասել, եթե կորեացու հարցում չլիներ մրցավարական սխալ, դրանից հետո բոլոր գոտեմարտերը մի շնչով կանցկացներ Դերմիշյանը, բայց, ամեն դեպքում, պարտությունից հետո ընկճված էր գոտեմարտում: Բացի այդ, նրան երկու կարեւոր հանգամանք էր խանգարում, աշխարհի առաջնությանը Դերմիշյանը ուսահոդն էր վնասել, բավականին լուրջ վիրահատություն տարավ, պատրաստ էր մրցմանը, բայց ոչ 100%-ով: Եւս մեկ կարեւոր հանգամանք. Դերմիշյանը մի քաշ բարձր էր հանդես գալիս` 60-ի փոխարեն 66կգ քաշային կարգում, ինչը շատ բարդ էր ու ծանր: Ամեն դեպքում, մասնակցությունը վատ չէր, թեեւ մրցանակային տեղի սպասելիքներ ունեինք:
Հայաստանը ներկայացնող լողորդ Վահան Մխիթարյանը օգոստոսի 20-ին մասնակցեց բաթերֆլայի 50 մետրի մրցումներին, սակայն չկարողացավ նվաճել կիսաեզրափակիչի ուղեգիր: Երկրորդ լողահերթում Մխիթարյանը գրավեց չորրորդ տեղը` գրանցելով 26.40 վայրկյան արդյունք եւ 0.38 վայրկյանով զիջեց լողահերթում հաղթած Մելի Մալանին: Վահան Մխիթարյանն օգոստոսի 19-ին մասնակցել էր նաեւ 50 մետր ազատ լողաոճի մրցմանը, որում գրավել էր 18-րդ տեղը:
Իսկ Վիգեն Խաչատրյանը չհաղթահարեց Չինաստանի Նանջինգ քաղաքում մեկնարկած ամառային պատանեկան Օլիմպիական խաղերի սպորտային մարմնամարզություն բազմամարտի որակավորման փուլի արգելքը: Խաչատրյանը մասնակցեց 6 վարժություններից միայն չորսին` դուրս մնալով հետագա պայքարից: Ազատ վարժությունում նա գրանցել է երրորդ արդյունքը, օղակների վրա` չորրորդ, նժույգաթափում` 17-րդ, իսկ հենացատկում բաժանել է 2-3-րդ տեղերը: Մյուս 2 վարժությունները Վիգենը բաց է թողել մեջքի ցավի պատճառով:
Հայ մարզիկները սակայն Հայաստանն առանց մեդալի չթողեցին: Մեր առաջին մեդալը նվաճել է հրաձիգ Հրաչյա Բաբայանը, ով դարձավ օլիմպիական փոխչեմպիոն:
Նանջինգ-2014-ի հրաձգության մրցաշարում Հայաստանը ներկայացնում էր նաեւ Զավեն Իգիթյանը, ով օդամղիչ ատրճանակի 10 մետրի մրցումներում գրավեց 5-րդ տեղը:
Հայաստանում հենակետային համարվող մի քանի մարզաձեւերում հանդես եկող մարզիկները դեռ մրցասպարեզ դուրս չեն եկել, ստորեւ ներկայացնում ենք մեր մարզիկների մասնակցության ժամանակացույցը:
Ծանրամարտ. Հակոբ Մկրտչյան (77կգ) եւ Սիմոն Մարտիրոսյան (+85կգ) - 23.08, ժամը` 14:30-16:00 եւ 18:00-19:30
Բռնցքամարտ. Անուշ Գրիգորյան (51 կգ) եւ Նարեկ Մանասյան (81կգ) - 23.08, ժամը` 14:00-18:00 եւ 16:00-20:00
Հունահռոմեական ոճի ըմբշամարտ. Զավեն Միքայելյան (58 կգ) - 25.08, ժամը` 10:00-13:00 եւ 17:00-20:00
Ջրացատկ. Լեւ Սարգսյան, 10 մ. աշտարակացատկ - 26.08, ժամը` 10:00-11:35 եւ 17:00-18:30
Ազատ ոճի ըմբշամարտ. Վաղինակ Մաթեւոսյան (54 կգ) եւ Սարգիս Հովսեփյան (76 կգ) - 27.08, ժամը` 10:00-13:00 եւ 17:00-20:00

ՔՐԻՍՏԻՆԵ ՊԵՏՐՈՍՅԱՆ