ԻՆՉՈՒ ԵՆ ԺԱՄԱՆԱԿԱԿԻՑ ՄՈՒԼՏՖԻԼՄԵՐՈՒՄ ՊԱԿԱՍԵԼ ՄԱՐԴԱՆՄԱՆ ՈՒ ԲԱՐԻ ԿԵՐՊԱՐՆԵՐԸ

ԻՆՉՈՒ ԵՆ ԺԱՄԱՆԱԿԱԿԻՑ ՄՈՒԼՏՖԻԼՄԵՐՈՒՄ
ՊԱԿԱՍԵԼ ՄԱՐԴԱՆՄԱՆ ՈՒ ԲԱՐԻ ԿԵՐՊԱՐՆԵՐԸ

Տարիներ առաջ մանուկների համար հայկական ու ռուսական մուլտֆիլմերի գեղեցիկ, բարի եւ մարդանման կերպարները կրում էին ուսուցողական բնույթ: Դրանք երեխաներին սովորեցնում էին սիրել բարին եւ գեղեցիկը, ինչը չենք կարող ասել ժամանակակից մուլտֆիլմերի հերոսների մասին: Հին ու բարի մուլտֆիլմերը սիրված էին նաեւ մեծահասակների կողմից: Այսօր բարի կերպարներով մուլտֆիլմերը դուրս են եկել հեռուստաեթերից, ավելին` դրանց փոխարինելու են եկել այնպիսի անճոռնի կերպարներով մուլտֆիլմեր, որոնք դիտելուց հետո մի քանի ժամ է պահանջվում, որպեսզի երեխային դուրս բերես սթրեսից: Հետեւելով ՙմանուկները մեր ապագան են՚ արտահայտությանը` թվում էր, թե  ոչինչ չպետք է խնայվեր հանուն այդ ապագայի: Սակայն Ժամանակները փոխվեցին, չկա այն գիտակցությունը, որ այդ փոփոխությունները ոչ մի կերպ չպետք է բացասաբար անդրադառնան մատաղ սերնդի կրթության եւ դաստիարակության վրա: Բայց արի ու տես, որ ամենեւին էլ այդպես չէ: Սա մտահոգող խնդիր է, որը հուզում է նաեւ այն մարդկանց, ովքեր տարիներ շարունակ երեխաների համար արարել են հետաքրքիր մուլտֆիլմեր ու ցուցադրել:
ՆՈՆԱ ԶՈՏՈՎԱ (Նոնա մորաքույր) ՙՀեքիաթն է կանչում՚ ծրագրի հաղորդավարուհի, դերասանուհի
- Երեւի ինչ-որ բան մարդկանց մտածելակերպում փոխվել է, երեխաներին այդքան էլ ուշադրություն չեն դարձնում, հատկապես խոսքը վերաբերում է հեռուստատեսությանը: Սովետական մուլտֆիլմերը բավականին հետաքրքիր էին եւ մեծ ասելիք ունեին փոքրիկներին, ինչու ոչ` նաեւ մեծահասակներին: Այժմյան մուլֆիլմերը երեխաների մեջ չարություն են սերմանում: Երեխան գնալով ավելի է չարանում` մտածելով, որ ինքն ուժեղ է, ուրեմն պետք է անպայման իրենից թույլերին հարվածի: Սա գալիս է նրանից, որ մեծերը երեխաներին չեն վերաբերվում այնպես, ինչպես օրինակ` 80-ական թվականներին: Երեխան ոչ թե մանկիկ է, այլ աճող օրգանիզմ, որի հետ հարկավոր է խոսել, ոչ թե երեխայական ինչ-որ կիսատ-պռատ, այլ հստակ բառերով եւ բացատրություններով: Ժամանակին կար ՙՉի կարելիի աշխարհում՚ գիրքը, իսկ այսօ±ր… Կարծում եմ, որ այս ամենը պետության հոգածությամբ պետք է շտկվի, պետությունը ուշադրություն չի դարձնում այդ ամենին, պարզ է, որ այսպիսի իրավիճակ պետք է տիրի: Պետությունը երբ գիտակցի, որ վաղվա օրը կախված է այս երեխաներից, թե ինչպես նրանք կզարգանան եւ կմեծանան, այդ ժամանակ էլ ամեն ինչ իր տեղում կլինի: Ինչպես մենք մեր սահմաններն ենք պաշտպանում, հենց այդպես էլ պետք է պաշտպանենք մեր երեխաների գիտելիքները, որպեսզի նրանք լիաթոք մեծանան, նրանց աշխարհայացքը մեծ լինի, որ չպարփակվեն բակում խաղալու եւ վազվզելու մեջ: Այս ամենը վերաբերում է ազգային անվտանգությանը, թող ոմանք ասեն` անցել է երեխաների համար ՙԲարի գիշեր՚ ու նմանատիպ հաղորդումների ժամանակները, որոնց ընթացքում  երեխաներին էին ներկայացվում շատ գեղեցիկ մուլտֆիլմեր, հստակ կասեմ, որ ոչնչի ժամանակ էլ չի անցել:
Մուլտիպլիկատոր ԴԱՎԻԹ ՍԱՀԱԿՅԱՆՑ
- Մեզ մոտ մուլտֆիլմերի արտադրության այն քանակությունը, որով կարելի է ապահովել շուկա կոչվածը` չկա: Եթե մեզանում այդ ֆիլմերի արտադրությունը շատ ավելի ծավալուն լիներ, ապա երեխաները մեծ հաճույքով կդիտեին հայկական մուլտֆիլմերը, այլ ոչ թե  արտասահմանյանը: Բարդ է հասկանալ, թե ինչու չի ստեղծվում բարի կերպարներով ֆիլմեր: Մենք շուտով հանրությանը կներկայացնենք ֆիլմ, եթե ֆիլմում ստեղծված կերպարները ընդունվեն երեխաների կողմից, գուցե դա լինի այդ ուղղությամբ տարվող աշխատանքերի առաջին քայլը: Մուլտֆիլմում աշխատել ենք այնպես անել, որ կերպարները լինեն հայկական, բարի եւ համահունչ այսօրվա ժամանակներին: Խոսքս ՙԱնահիտ՚ մուլտֆիլմի մասին է, ֆիլմի վերաբերյալ արձագանքներից հետո կարող եմ հստակ ասել, թե մեզ արդյո±ք հաջողվել է ստեղծել բարի կերպարներ, թե ոչ: Չեմ կարող ժխտել, որ այսօր բարի կերպարների պակասը եւ պահանջը երեխաներն իրոք զգում են՚:

Ներկայացրեց ԶՎԱՐԹ ԽԱՉԱՏՐՅԱՆԸ