ՄԱՆԿԱԿԱՆ ՙՆՈՐ ԱԼԻՔԻՑ՚ ԻԳՈՐ ԿՐՈՒՏՈՅԻ ԱԿԱԴԵՄԻԱ

ՄԱՆԿԱԿԱՆ ՙՆՈՐ ԱԼԻՔԻՑ՚ ԻԳՈՐ ԿՐՈՒՏՈՅԻ ԱԿԱԴԵՄԻԱ

Օգոստոսի 16-18-ը Ղրիմի ՙԱրտեկ՚ միջազգային մանկական կենտրոնում կայացած մանկական ՙՆոր ալիք-2014՚ մրցույթում Հայաստանը ներկայացնող 12 ամյա ԴԱՎԻԹ ՎԱՐԴԱՆՅԱՆԸ 4-րդ հորիզոնականում է: Այս տարի մրցույթի ժյուրիի կազմը համալրում էին հայտնի արտիստներ Ալեսանդրո Սաֆինան, Նյուշան, Լեւ Լեշչենկոն եւ Ֆիլիպ Կիրկորովը: Իսկ ժյուրի կազմը ղեկավարում էր մրցույթի հիմնադիր Իգոր Կրուտոյը:
ՙԻրավունքի՚ հետ զրույցում Դավիթի երաժշտական պրոդյուսեր, երգիչ ԳՐԻԳՈՐ ԿՅՈԿՉՅԱՆՆ ընդգծեց. ՙԴավիթի մասին բոլորը գովեստի խոսքեր էին ասում, որովհետեւ իսկապես Դավիթը երկու օրն էլ լավ ելույթ է ունեցել՚:
Ի դեպ, պրոֆեսիոնալ ժյուրիի անդամները Դավիթի երկու ելույթները 110 հնարավորից 104 միավոր են գնահատել, արդյունքում. ՙՄրցույթում հաղթող ճանաչվեց Ուկրաինայի ներկայացուցիչ Անդրեյ Բոյկոն, ով շատ լավ հանդես եկավ մրցութային երկու օրերին` իսկապես լավագույնն էր: 2-րդ եւ 3-րդ հորիզոնականներում, ի վերջո, երեքական հաղթող եղավ: Իսկ Դավիթը զբաղեցրեց 4-րդ հորիզոնականը: ՙՀանդիսատեսի համակրանք՚ մրցանակին էլ արժանացավ Ռուսաստանի ներկայացուցիչ Եկատերինա Մանեշինան՚,- նշեց Գ. Կյոկչյանը եւ հավելեց. ՙԴավիթն առաջին օրվա արդյունքում 2-րդ հորիզոնականում էր, իսկ 3-րդ օրը հանդես եկավ առաջին համարի ներքո, ինչը միշտ բացասաբար է անդրադառնում մասնակցի վրա այն առումով, որ առաջին համարի տակ հանդես եկող մասնակցի համար միավորներ չեն տալիս` իրենց ապահովագրելու համար: Եվ այդ օրը նույն պատճառով մեզ 10 միավորներ տվեցին, արդյունքում 4-րդ հորիզոնականում ենք: Բայց պիտի ասեմ, որ վատ արդյունք չէ՚:
Գրիգորը կարեւորեց նաեւ այն հանգամանքը, որ Իգոր Կրուտոյի ակադեմիան պայմանագիր է կնքել Դավթի հետ. ՙՆա հետայսու մասնակցելու է տարբեր վարպետության դասերի: Սա շատ լուրջ առաջարկ է, որը ոչ բոլորին է արվում՚:
Ի դեպ, Հայաստանի այս տարվա ներկայացուցչին քաջալերելու համար Հայաստանից Ղրիմ էին մեկնել նաեւ Դավիթի գործընկերները` երգչուհիներ Լիդուշիկն ու Սոնա Գյուլխասյանը:
Այս օրերին Դավիթը դեռ չի վերադարձել Հայաստան, համերգային ծրագրով Ղրիմից միանգամից մեկնել է Սոչի` հայ համայնքի հրավերով:

ԼԻԼԻԹ ԵՂԻԱԶԱՐՅԱՆ