ՍՆՆԴԱՅԻՆ ԹՈՒՆԱՎՈՐՈՒՄՆԵՐԻ ԹԻՎԸ ՆՎԱԶԵԼ Է

ՍՆՆԴԱՅԻՆ ԹՈՒՆԱՎՈՐՈՒՄՆԵՐԻ ԹԻՎԸ ՆՎԱԶԵԼ Է

Սննդային թունավորումների բռնկումներ 2012, 2013 թվականների համեմատ, այս տարի չեն գրանցվել: Այս մասին երեկ «Ազդակ» լրագրողական ակումբում կայացած ասուլիսի ժամանակ ասաց ՀՀ ԱՆ առողջապահական պետական տեսչության հիգիենայի բաժնի պետ ՄԱՐԳԱՐԻՏԱ ԲԱԲԱՅԱՆԸ: Մասնագետի փոխանցմամբ` 2014-ին սննդային թունավորման եզակի դեպքեր են եղել: Հիմնական պատճառը. հիգիենայի պայմանները չեն պահպանվել:

ԱԶԳԱԲՆԱԿՉՈՒԹՅՈՒՆՆ ԱՎԵԼԻ ԳՐԱԳԵՏ Է ԴԱՐՁԵԼ

«Իրավունքի» այն հարցին, թե ինչի հետ է մասնագետը պայմանավորում դեպքերի պակասը, Մ. Բաբայանը հետեւյալ կերպ արձագանքեց. «Ազգաբնակչությունն ավելի գրագետ է դարձել, իրենց դերն ունեն մասնագիտական հորդորները»:

Այնուամենայնիվ 2014թ., ըստ բանախոսի,  արձանագրվել է սննդային թունավորման բոտուլիզմի 4 դեպք` 6 տուժածով, առանց  մահվան ելքի: Դեպքերը արձանագրվել էին Շիրակի, Տավուշի մարզերում:  
Բանախոսը նկատեց, որ այս տարի ավելացել են սնկերից թունավորման դեպքերը: Գրանցվել է 20 դեպք` 29 տուժածով: 2013 թվականին նույն ժամանակահատվածում ունեցել ենք 16 դեպք` 24 տուժածով: Մ. Բաբայանի խոսքով` սնկից թունավորումներ ավելի շատ արձանագրվում են Լոռու մարզում:
Սննդային թունավորումները, ըստ մասնագետի,  առաջանում են, երբ սննդում օգտագործում ենք ախտածին մանրէներով վարակված սննդամթերք: «Անցյալ տարիներին դեպքեր են եղել, երբ արձանագրվել են կրեմային հրուշակեղենից թունավորման դեպքեր` տնային պայմաններում պատրաստված: Ունեցել ենք դեպքեր, երբ օգտագործել են աղցաններ, որոնք ճիշտ չեն պատրաստել եւ ճիշտ չեն պահպանել կամ հիգիենիկ պայմանները բավարար չեն եղել»,- ասաց բանախոսը:

ՊԱՀՊԱՆԵՔ ՍՆՆԴԻ ԱՆՎՏԱՆԳՈՒԹՅԱՆ ԿԱՆՈՆՆԵՐԸ

Սննդային թունավորումներից զերծ մնալու համար, տիկին Մ Բաբայանը խորհուրդ տվեց պահպանել սննդի անվտանգության կանոնները: «Պետք է լավ լվանալ սննդամթերքը եւ այն պարագաները, որոնք օգտագործվում են կերակուր պատրաստելու համար. դանակներ, մակերեսներ եւ այլն: Չմոռանալ նաեւ ջերմային ռեժիմի մասին»:

Տիկին Բաբայանը նաեւ ասաց, որ մսից պատրաստած կերակուրները պետք է պահպանել սառնարանում: Ի դեպ, մասնագետի խոսքով`սննդամթերքը սառնարանում պետք է պահպանել փակ տարաների մեջ, հում եւ եփած սննդամթերքը` իրարից հեռու, քանի որ խաչաձեւ աղտոտում կարող է առաջանալ:

ՆՇԱՆՆԵՐ` ՍՆՆԴԱՅԻՆ ԹՈՒՆԱՎՈՐՈՒՄՆԵՐԻ ԺԱՄԱՆԱԿ

Սննդային թունավորումների ժամանակ, Մ. Բաբայանի փոխանցմամբ, կարող են լինել` սրտախառնոց, փսխում, փորլուծություն: «Բոտուլիզմի դեպքում փորկապություն  է լինում, գլխացավ, գլխապտույտ, մարմնի ջերմաստիճանի բարձրացում, ինչպես նաեւ երկտեսություն, ձայնի խռպոտություն եւ կոպերի անկում: Վերոնշյալ նշանների դեպքում պետք է անմիջապես դիմել մասնագետի օգնությանը: Բոտուլիզմի տոքսինով պահածոն ձմռանը, ի դեպ,  չի փոխում ոչ համը, ոչ հոտը, ոչ տեսքը»,- բացատրեց Մ. Բաբայանը` հավելելով, որ պահածո պատրաստող կազմակերպություններից բոտուլիզմի դեպքեր չեն արձանագրվել:  

ՀՐԱԺԱՐՎԵՔ ՊԱՀԱԾՈՆԵՐԻՑ

Հարցին, թե կարելի է արդյոք պահածոներ պատրաստել ամռանը, տիկին Բաբայանը բացասական պատասխան տվեց. «Ընդհանրապես խորհուրդ չեմ տալիս պահածոյացնել սննդամթերքը: Այսօր կարելի պահպանել սննդամթերքը` սառեցման կամ չորացման եղանակով»:
Սննդային թունավորումների դեպքում Մ. Բաբայանը հորդորում է դիմել բժշկի օգնությանն ու չզբաղվել ինքնաբուժությամբ:

ՎԼԱԴ ՄՈՒՐԱԴՅԱՆ