ՍՆՆԴԱՅԻՆ ԹՈՒՆԱՎՈՐՈՒՄՆԵՐԻ ԹԻՎԸ ՆՎԱԶԵԼ Է

ՍՆՆԴԱՅԻՆ ԹՈՒՆԱՎՈՐՈՒՄՆԵՐԻ ԹԻՎԸ ՆՎԱԶԵԼ Է

Սննդային թունավորումների բռնկումներ 2012, 2013 թվականների համեմատ, 2014-ին չեն գրանցվել: Այս մասին այսօր  «Ազդակ» լրագրողական ակումբում կայացած ասուլիսի ժամանակ ասաց ՀՀ ԱՆ առողջապահական պետական տեսչության հիգիենայի բաժնի պետ ՄԱՐԳԱՐԻՏԱ ԲԱԲԱՅԱՆԸ: Մասնագետի փոխանցմամբ`այս տարի սննդային թունավորման եզակի դեպքեր են եղել: Հիմնական պատճառը. հիգիենայի պայմանները չեն պահպանվել:

«Իրավունքի» այն հարցին, թե ինչի հետ է մասնագետը պայմանավորում դեպքերի պակասը, Մ. Բաբայանը հետեւյալ կերպ արձագանքեց. «Ազգաբնակչությունն ավելի գրագետ է դարձել, իրենց դերն ունեն մասնագիտական հորդորները»:

Այնուամենայնիվ 2014թ., ըստ բանախոսի,  արձանագրվել է սննդային թունավորման  բոտուլիզմի 4 դեպք` 6 տուժածով, առանց մահվան ելքի: Դեպքերը արձանագրվել էին Շիրակի, Տավուշի մարզերում:

Բանախոսը նկատեց, որ այս տարի ավելացել են սնկերից թունավորման դեպքերը: Գրանցվել է 20 դեպք` 29 տուժածով: 2013 թվականին նույն ժամանակահատվածում գրանցվել է 16 դեպք 24 տուժածով: Մ. Բաբայանի խոսքով` սնկից թունավորումներ ավելի շատ արձանագրվում են Լոռու մարզում:

Սննդային թունավորումները, ըստ Մ. Բաբայանի,  առաջանում են, երբ սննդում օգտագործում են ախտածին մանրէներով վարակված սննդամթերք: «Անցյալ տարիներին դեպքեր են եղել, երբ արձանագրվել են կրեմային հրուշակեղենից թունավորման դեպքեր` տնային պայմաններում պատրաստված: Ունեցել ենք դեպքեր, երբ օգտագործել են աղցաններ, որոնք ճիշտ չեն պատրաստել եւ ճիշտ չեն պահպանել կամ հիգիենիկ պայմանները բավարար չեն եղել»,- ասաց մասնագետը:

Սննդային թունավորումներից զերծ մնալու համար, տիկին Բաբայանը խորհուրդ տվեց պահպանել սննդի անվտանգության կանոնները: «Պետք է լավ լվանալ սննդամթերքը եւ այն պարագաները, որոնք օգտագործվում են կերակուր պատրաստելու համար. դանակներ, մակերեսներ եւ այլն: Չմոռանալ նաեւ ջերմային ռեժիմի մասին»:

Վ. ՄՈՒՐԱԴՅԱՆ