ԵԹԵ ՊԱՐԶՎԻ`ՆԱԽԿԻՆ ՊԱՇՏՈՆՅԱՅԻ ՄԱՏԸ ԽԱՌՆ Է ԵՂԵԼ…ՓԱՍՏԱԲԱՆ

ԵԹԵ ՊԱՐԶՎԻ` ՆԱԽԿԻՆ  ՊԱՇՏՈՆՅԱՅԻ ՄԱՏԸ ԽԱՌՆ Է ԵՂԵԼ…ՓԱՍՏԱԲԱՆ

Մեր ընթերցողները կհիշեն ազատամարտիկ Վարդան  Դարբազյանի ընտանիքի պատմությունը (http://iravunk.com/index.php?option=com_content&view=article&id=18734:2014-08-08-18-00-03&catid=41:lurer&Itemid=57): Ազատամարտիկի ընտանիքը կանգնած է բնակարանը կորցնելու վտանգի առաջ:

Այսօր «Իրավունքը» ազատամարտիկի կնոջ Վարդուհի Գևորգյանից   տեղեկացավ, որ երեկ նա դիմել է  վերաքննիչ դատարան՝ պահանջելու  չեղյալ համարել Շենգավիթ առաջին ատյանի կայացրած որոշումը, ըստ որի՝ Դարբազյանները պետք  է ազատեն Մադոյան  փողոցի 24 տունը, քանի որ դատարանը բավարարել է սեփականատեր Մելինե Սարգսյանի՝Դարբազյաններին այդ հասցեում գտնվող տնից վտարելու պահանջը:

Վարդուհի Գևորգյանի փաստաբան Վարդան Զուռնաչյանը մեզ հետ զրույցում ասաց,որ բացի վերաքննիչ դատարան դիմելուց,  իրենք դիմելու են վարչական դատարան և դատախազություն.  «Վտարման հայց ներկայացրած Մելինե Սարգսյանը ժառանգել է  60 քմ  տարածք, սակայն Մելինե Սարգսյանի հոր՝ Անդրանիկ Սարգսյանի նվիրատվությունը  դստերը  60 քմ-ից մոտ չորս անգամ ավելի է: Պետք է պարզել՝ կադաստրը 2004-ին ինչ քայլեր  է արել, որոնց  հետևանքով նման իրավիճակ է  ստեղծվել, այսինքն՝ կադաստրն անօրինական ձևով ավելացրել է Մելինե Սարգսյանին պատկանող  գույքը»:

Փաստաբանը նաև անօրինական համարեց   դատական երեք ատյաններով անցած այն որոշումը, որով բավարարվել է  Մելինե  Սարգսյանի՝ Դարբազյաններին բնակարանից վտարելու պահանջը: Պատահական չէ, որ   գործում է  ձեռքբերման վաղեմության ինստիտուտը:

Հիշեցնենք, որ  2004-ին կադաստրի պետական  կոմիտեն ղեկավարել է Մանուկ Վարդանյանը, ով հետագայում՝2010-2012-ը թթ-ը ՕԵԿ-ի  քվոտայով  եղել է տրանսպորտի և կապի նախարար:

Փաստաբանի խոսքով՝ ակնհայտ է, որ կադաստրի պետական կոմիտեն  կեղծիքներ է  կատարել, քանի որ քաղաքապետարանի կողմից այդ 60 քմ-ից ավելի նվիրատվություն ստացած տարածքները չեն սեփականաշնորհվել. «Պետք է պարզել՝ ինչի հիման վրա է կադաստրում Մելինե Սարգսյանին պատկանող տարածքներն ավելացել»:

Վարդան Զուռնաչյանից  նաև հետաքրքրվեցինք՝ դատական այս գործի շրջանակներում հնարավոր է պատասխանատվության ենթարկվի նաև կադաստրի պետական կոմիտեի  նախկին նախագահ Մանուկ Վարդանյանը: «Եթե նրա  մատը խառը եղավ և պարզվեց՝ինքն է անօրինականություն  թույլ տվել,  իր պատասխանատվության  հարցը առաջ կքաշվի: Իսկ եթե ոչ, ապա պատասխանատվության կենթարկվեն կադաստրի պետական կոմիտեի այն ժամանակվա աշխատակիցները, իսկ  նրա մասով (նկատի ունի Մանուկ Վարդանյանին-խմբ.) կմնա միայն բարոյական պատասխանատվությունը»,- եզրափակեց փաստաբանը:

«Իրավունքը» խնդրի առնչությամբ մեկնաբանություհն ստացավ նաև Մելինե Սարգսյանի փաստաբան Հասմիկ Մարտիրոսյանից: Վերջինս հակադարձեց  իր գործընկեր փաստաբան Վարդան Զուռնաչյանի այն հայտարարությանը, թե դատական երեք ատյաններով անցած այն որոշումը, որով բավարարվել է  Մելինե  Սարգսյանի՝ Դարբազյաններին բնակարանից վտարելու պահանջը, անօրինական է. «Դա օրինական  որոշում է, քանի որ երեք ատյաններով անցած դատական ակտը չի կարող ապօրինի լինել»:

Ինչ վերաբերում է Մելինե Սարգսյանի  ժառանգություն ու նվիրատվություն ստացած գույքի չափի անհամապատասխանությանն ու Վարդան Զուռնաչյանի՝«կադաստրն անօրինական ձևով ավելացրել է Մելինե Սարգսյանին պատկանող  գույքը» հայտարարությանը,  Հ. Մարտիրոսյանն այսպես  հակադարձեց. «Եթե փաստաբանը տեսնում էր, որ կար իրավունքի խախտում, թող իրավունքի պաշտպանություն իրականացներ: Դե թող գնա վերհանի: Կադաստրի կողմից ոչ մի անօրինական գրանցում չի եղել: Այն հատվածը, որտեղ ապրում են Դարբազյանները, կտակով Մելինեն  ստացել է իր հորից»:

Մեր զրուցակցին  չի մտահոգում այն, որ Վարդուհի Գևորգյանի փաստաբանը դիմելու է  դատախազություն և վարչական դատարան՝ բողոքարկելու Մելինե Սարգսյանի վտարման պահանջի դատական ակտը.«Մելինե Սարգսյանը ոչ  մի խնդրի առաջ չի կանգնի, քանի որ փաստաթղթերը հարյուր տոկոսանոց մաքուր են՝կտակ, նվիրատվություն, սեփականության իրավունք: Բացի այդ՝  Վարդուհի Գևորգյանի փաստաբանը չի կարող վարչական դատարան հայց ներկայացնել, քանի որ նա իրավատեր չէ և նրա ոչ մի իրավունքը խախտված չէ: Վարդան Զուռնաչյանը շատ լավ հասկացել է, որ անելիք չունի: Ինքը փորձում է աղմուկ… ինչ է ուզում է  անի»:

Ի դեպ, Հասմիկ Մարտիրոսյանը խոսելով Դարբազյանների  ընտանիքի մասին, ասաց, որ Վարդուհի Գևորգյանի որդին՝ Գևորգ Դարբազյանը, շատ վատ պահվածք ունի, շատ  լկտի է. «Ես իրենց երբեք չեմ ասել՝ աջ կամ ձախ: Նա թքել է ինձ վրա, հայհոյել է ինձ, ես երկու երեխա ունեմ: Էնքան անպատկառ է, որ ասել է՝ կկտրեմ քո աղջիկների վիզը: էսպիսի մարդիկ են, հասկանում եք, հետևաբար պետք չէ ամեն ինչ ընդունել հալած յուղի տեղ»:

Սոնա Դավթյան