ՌՈՒՍԱԿԱՆ ԴՐԱՄԱՏԻԿԱԿԱՆ ԹԱՏՐՈՆՆ ՈՒ ԱԼԵՔՍԱՆԴՐ ԳՐԻԳՈՐՅԱՆԸ ԳՐԵԹԵ ՀԱՍԱԿԱԿԻՑՆԵՐ ԵՆ

ՌՈՒՍԱԿԱՆ ԴՐԱՄԱՏԻԿԱԿԱՆ ԹԱՏՐՈՆՆ ՈՒ ԱԼԵՔՍԱՆԴՐ ԳՐԻԳՈՐՅԱՆԸ ԳՐԵԹԵ ՀԱՍԱԿԱԿԻՑՆԵՐ ԵՆ

Այսօր կրկին տոն է Ստանիսլավսկու անվան ռուսական պետական դրամատիկական թատրոնում: 75-ամյա թատրոնը նշում է իր 78-ամյա գեղարվեստական ղեկավար ԱԼԵՔՍԱՆԴՐ ԳՐԻԳՈՐՅԱՆԻ ծննդյան տարեդարձը: Ինչ խոսք, տարեդարձը թեպետ հոբելյանական չէ, բայց եւս մեկ անգամ մի լավ առիթ է ուրախանալու, արժեվորելու ու բարեմաղթանքներով զարդարելու դեռեւս այդքան երիտասարդ արվեստագետի ծննդյան օրը, ով 49 տարի Ստանիսլավսկու անվան ռուսական պետական դրամատիկական թատրոնի գեղարվեստական ղեկավար է: Իսկ թե ո՞րն է այդքան երկար տարիներ ղեկավարելու գաղտնիքը, մի առիթով Հակոբ Պարոնյանի անվան պետական երաժշտական թատրոնի գեղարվեստական ղեկավար, ՀՀ ժողովրդական արտիստ, պրոֆեսոր ԵՐՎԱՆԴ ՂԱԶԱՆՉՅԱՆԸ ասել է. «49 տարի նույնիսկ կոնցլագերում ոչ մի գերի չի դիմացել: Ես ուզում եմ բացել այն գաղտնիքը, թե ինչու է Ալեքսանդր Գրիգորյանն այսքան երկար տարիներ ղեկավարում թատրոնը: Իհարկե, դրա համար կան հարյուրից ավելի պատճառներ, բայց ես առաջինն եմ ուզում ասել, որի մեջ մտնում է ամեն ինչ: Ալեքսանդր Գրիգորյանին հաջողվում է այս թատրոնում պահել ստուդիական ոգին, այսինքն`  երիտասարդական ոգին, նոր ավյունը, նոր խոսքը, նոր ասելիքը եւ դրա համար այս թատրոնը կենդանի թատրոն է»:

Նշենք, որ Ալ. Գրիգորյանը ծնվել է 1936 թվականին Բաքվում: Ավարտել է Լենինգրադի թատրոնի եւ կինոյի պետական ինստիտուտը: 26 տարեկան հասակում դարձել է Սմոլենսկի շրջկենտրոնի թատրոնի գլխավոր ռեժիսոր: 1964թ. հրավիրվել է Հայաստան` որպես Երեւանի Ստանիսլավսկու անվան պետական ռուսական թատրոնի գլխավոր ռեժիսոր, ուր աշխատում է մինչ օրս:  Նրա բեմադրած ներկայացումներից շատերը արժանացել են բարձր մրցանակների ու պարգեւների: Ռուսական թատրոնի սիրելի Ալեքսանդր Սամսոնիչը 1978թ. արժանացել է ՀԽՍՀ ժողովրդական արտիստի, 1999թ.` ՌԴ արվեստի վաստակավոր գործչի կոչմանը: Իսկ 2000թ. դարձել է Ստանիսլավսկու, 2001թ.` Սմոկտունովսկու  միջազգային թատերական մրցանակների դափնեկիր: Պարգևատրվել է նաեւ ՀՀ Պետական մրցանակով, 2007թ.` ՌԴ նախագահի «Բարեկամություն» շքանշանով: 2010թ. ստացել է Թատրոնի միջազգային ակադեմիայի ակադեմիկոսի, 2012թ.` Երեւանի պատվավոր քաղաքացու կոչում: 2013թ. արժանացել է ՀԹԳՄ «Արտավազդ» մրցանակի` որպես լավագույն ռեժիսուրա եւ  ՀՀ «Մխիթար Հերացի» մեդալի:

Միանալով բազմաթիվ բարեմաղթանքներին` «Իրավունքը» եւս Ալեքսանդր Սամսոնիչին ցանկանում է քաջառողջություն, բեղուն ստեղծագործական հաջողություններ ու իր երկրորդ տունը դարձած գրեթե հասակակից թատրոնին նորանոր վերելքներ…

ՀՐԱՆՏ ՍԱՐԱՖՅԱՆ