ՍՐՏԻՑՍ ԱՐՅՈՒՆ Է ԿԱԹՈՒՄ.ԱՐԵՎԱՅԻՆ ԷՆԵՐԳԵՏԻԿԱՅԻ ԶԱՐԳԱՑՄԱՆ ԾՐԱԳՐԻՆ ԳԻՏՆԱԿԱՆ ԹԵՐԱՀԱՎԱՏՈՐԵՆ Է ՎԵՐԱԲԵՐՎՈՒՄ

ՍՐՏԻՑՍ ԱՐՅՈՒՆ Է ԿԱԹՈՒՄ.ԱՐԵՎԱՅԻՆ ԷՆԵՐԳԵՏԻԿԱՅԻ ԶԱՐԳԱՑՄԱՆ ԾՐԱԳՐԻՆ

ԳԻՏՆԱԿԱՆ ԹԵՐԱՀԱՎԱՏՈՐԵՆ Է ՎԵՐԱԲԵՐՎՈՒՄ

Արևային էներգետիկայի զարգացման 26 մլն դոլարի ներդրումային ծրագիրը կմեկնարկի Հայաստանում մեկ տարուց: Սեպտեմբերին կանցկացվի ծրագրի մանրամասն քննարկում Հայաստանի էներգետիկայի և բնական պաշարների նախարարության ներկայացուցիչների հետ։ «Իրավունքի» հետ զրույցում  հելիոֆիկացիայի ծրագրի ղեկավար Վահան Համազասպյանը, սակայն թերահավատորեն է վերաբերվում այս ծրագրին. «Սա մեզ հետ ոչ մի առնչություն չունի:  Համաշխարհային բանկից  40  մլն դոլար փող են ստացել: Այդ ծրագիրը շատ ենք քննադատում»:

Իսկ քննադատության հիմնական պատճառն այն է, որ  ըստ գիտնականի,«Հայաստանի վրա հերթական անգամ պարտք է ավելանում»: Տեղական ներուժը այս ծրագրի շրջանակներում գիտնականի խոսքով չի օգտագործվում. «Արտասահմանից փողը տալիս են և պարտադրում են մեզ, որ իրենց սարքերը գնենք ու տեղադրենք էստեղ»:

Հելիոֆիակիցայի ծրագրի ղեկավարի տեղեկացմամբ իր ծրագրով  հետաքրքրված են Իրանն ու Ղրիմը, որտեղ փորձելու են այս ծրագրի միջոցով իրենց երկրի հելիոֆիկացիայի խնդիրը լուծել: «Էներգետիկայի նախարարությունը կարծես անձնական  խնդիրներ է լուծում: Սրտիցս արյուն է կաթում, որ ուրիշներն են օգտագործելու մեր ծրագիրը: Բայց ինչ արած: Մեկը հարց չի տալիս՝ ինչ առավելություն ունեն արտասահմանից բերած  արևային տեխնոլոգիաները մեր ծրագրի նկատմամբ»,-  հարցադրում է  հնչեցնում գիտնականը:

Հայաստանի վերականգնվող էներգետիկայի և էներգախնայողության հիմնադրամի տնօրեն Թամարա Բաբայանի խոսքով  էլ այդ ծրագիրը բազմաթիվ քննարկումներ է անցել, որին մասնակցել է  նաև Վահան Համազասպյանը:  Քննարկումները հանգեցրին նրան, որ  որոշվեց՝26 մլն դոլարը ներդնել արևային ֆոտովոլտայիկ կայանների ստեղծման և արևային ջրատաքացուցիչների ձեռքբերման համար:

Թամարա Բաբայանը դժվարացավ ասել՝ արդյոք այս ծրագրի շնորհիվ հնարավոր կլինի ստանալ  համեմատաբար ավելի էժան  սակագնով էներգիա. «Դա  կախված է նրանից, թե ներդրողն ինչ տեխնոլոգիա կկիրառի, որ մարզում դա կանի: Մինչև կոնկրետ մարդիկ ներդրումային ծրագրեր չներկայացնեն, կանխատեսում անելը բավական բարդ կլինի»:

Սոնա Դավթյան