ԽԱՂՈՂՕՐՀՆԵՔ (ԱԲՈՎՅԱՆ ՔԱՂԱՔԻ ՍՈՒՐԲ ՀՈՎՀԱՆՆԵՍ ԵԿԵՂԵՑԻ) Օգոստոսի 17-ին Հայ Առաքելական Սուրբ Եկեղեցին մ

Արխիվ 12-16 17 Օգոստոս, 2014 12:49

ԽԱՂՈՂՕՐՀՆԵՔ (ԱԲՈՎՅԱՆ ՔԱՂԱՔԻ ՍՈՒՐԲ ՀՈՎՀԱՆՆԵՍ ԵԿԵՂԵՑԻ)

Օգոստոսի 17-ին Հայ Առաքելական Սուրբ Եկեղեցին մեծ շուքով և հանդիսավորությամբ նշեց Սբ.Աստվածածնի Վերափոխման տոնը: Այն Հայ Եկեղեցու հինգ Տաղավար տոներից չորրորդ և Տիրամորը նվիրված ամենահին տոնն է: Տոնը նշվում է օգոտոսի 15-ի մերձական կիրակի օրը(օգոստոսի 12-18), ունի շաբաթապահք, նավակատիք և մեռելոց:

Առավոտյան 11-ին քաղաք Աբովյանյանի Սբ Հովհաննես եկեղեցում, ինչպես գործող բոլոր եկեղեցիներում, մատուցվեց Սբ և Անմահ Պատարագ: Աստվածամոր տոնին Սբ Հովհաննես եկեղեցին բազմամարդ էր, անգամ բակի, եկեղեցու ամեն պատի անկյունն էր ողողված մարդկային հոսքով. մարդիկ գալիս էին՝ ստանալու Բարձրյալի օրհնությունը և իրենց հետ տանելու խաղողի օրհնված ողկույզները:

Այս տոնի առանձնահատկությունը պայմանավորված է օգոստոսին հասունացող խաղողի օրհնության ծեսով: Այսինքն, տոնի օրը, Ս.Պատարագից հետո, կատարվում է խաղողօրհնեք, որից հետո միայն կարելի է խաղող ուտել: Օրհնվում են տարվա ողջ բերքն ու բարիքը: Նույն օրհնված խաղողից գինի են պատրաստում, որը մարդիկ պահում են մինչև հաջորդ տարվա խաղողօրհնեքը՝ որպես լիառատության ապահովման նշան:

Քրիստոնեություն ընդունելուց հետո սովորույթ էր դարձել առաջին խաղողի ողկույզները քահանային օրհնել տալ, ինչը նախկինում տաճարներին կամ ուխտավայերին նվիրաբերելու սովորույթի շարունակությունն էր: Օրինակ, քահանան մկրատով կտրում էր մի ողկույզ, բարձրացնում արևի դիմաց և մաղթում. «Աստված օրհնեց մեր այգիները Նոյի տապանով, Մովսեսի տապանակով, Քրիստոսի սուրբ Խաչով, Աստվածածնի արցունքով, Լուսավորչի լույս հավատով: Հաց ու գինի, Տեր կենդանի: Մեր այգիներն էլ միշտ դալար պետք է լինեն, ողկույզները ՝միշտ անսպառ»:

Ս. Աստվածածնի Վերափոխման տոնին հաջորդող երկուշաբթի օրը մեռելոց է: Այդ օրը նույնպես եկեղեցիներում մատուցվում է Ս.Պատարագ, որի ավարտին կատարվում է հոգեհանգստյան կարգ: Եկեղեցական արարողությունից հետո մարդիկ այցելում են հանգուցյալների շիրիմներին:

ՊԱՏՐԱՍՏԵՑ ԷԹԵՐԻ ՄԱՄՈՒԼՅԱՆԸ