«ՆԵՐԿԱՅԱՑՆՈՒՄ ԵՆՔ ՀԱՅԿԱԿԱՆԸ ՀԻՄՆԱԿԱՆՈՒՄ ՀԱՅԵՐԻ ՀԱՄԱՐ »

«ՆԵՐԿԱՅԱՑՆՈՒՄ ԵՆՔ ՀԱՅԿԱԿԱՆԸ ՀԻՄՆԱԿԱՆՈՒՄ ՀԱՅԵՐԻ ՀԱՄԱՐ»

Ամեն օր ու վայրկյան շոուբիզնեսյան դաշտում աստղիկների հայտնությունն  ու մարումը, հերթական ոչ հաճելի բացահայտումը բարկացնում ու հիասթափեցնում է, բայց հույսի շող է հայտնվում, երբ հաճելի ու օգտակար բացահայտման ևս  հանդիպում ես: «ԻՐԱՎՈՒՆՔԻ» զրուցակիցը Արարատյան թեմի «ԾԱՂԿԱԶԱՐԴ» համախմբի գեղարվեստական ղեկավար ԼԻԼԻԹ ԳՐԻԳՈՐՅԱՆՆ է:

Իսկ թե ինչու է 7 մեներգչուհիներից և 1 դաշնակահարից կազմված միությունը կոչվում համախումբ, մեներգչուհին մանրամասնում է. «Համույթը սովետական բառ է և ստուգաբանական արմատ չունի, երգաչխումբ էլ չենք կարող կոչվել, որովհետև քանակապես քիչ ենք, 8 հոգու պարագայում անսամբլ կլիներ, որն էլ ֆրանսերեն բառ է: Ֆրանսերենից ու անարմատ հին հնչողությունից խուսափելու համար որոշեցինք համախումբ կոչվել, այսինքն՝ համախոհների խումբ»:

Համախումբն իր այցեքարտ-կատարումը համարում է Աշոտ Սաթյանի երաժշտությամբ և Եղիշե Չարենցի խոսքերով «Ես իմ անուշ Հայաստանին», որը կատարել է բազմաթիվ բեմերից:

«Շատ համերգների ենք մասնակցել, հատկապես Սփյուռքի նախարարության կողմից  ձեռնարկված, եղել ենք Ջավախքում, Ավստրալիայում, Ռուսաստանում և մի շարք այլ եվրոպական երկրներում: Մեր երգացանկը ազգագրական, ժողովրդական երգերը  չեն, այլ ազգային սիրված երգերը, որոնք հանդիսատեսը բավականին սիրում ու արժևորում է, ներկայացնում  ենք հայկականը հիմնականում հայերի համար»,-ասում է տիկին Լիլիթը, ով իր ղեկավարած խմբի հայտնության ապահովման հարցում տեսահոլովակի դերն այնքան էլ չի կարևորում. «Կենդանի երգեցողությունը մեզ համար միշտ ավելին է ու առավել, խմբի երգչուհիների  հզոր օպերային ձայներն այստեղ են առավել հնչեղ, ինչն էլ անպայման փոխանցվում է  հանդիսատեսին. նա զգում է, որ դա առավել արժեքավոր է: Չնայած տեսահոլովակի համար, եթե հովանավոր գտնվի, իհարկե դեմ չենք լինի, հատկապես, որ  ձայնագրված շարան ունենք»:

ԷԹԵՐԻ ՄԱՄՈՒԼՅԱՆ