ԹԱԻԼԱՆԴԻՑ ԺԱՄԱՆԱԾ ԴԵՐԱՍԱՆՆԵՐԸ ՀԱՎԱՆԵՑԻՆ ՀԱՅԿԱԿԱՆ ԲՈՐՇՉՆ ՈՒ ՍԻՐԵՑԻՆ ՀԱՅ ՀԱՆԴԻՍԱՏԵՍԻՆ (Տեսանյութ)

ԹԱԻԼԱՆԴԻՑ ԺԱՄԱՆԱԾ ԴԵՐԱՍԱՆՆԵՐԸ ՀԱՎԱՆԵՑԻՆ ՀԱՅԿԱԿԱՆ ԲՈՐՇՉՆ ՈՒ ՍԻՐԵՑԻՆ ՀԱՅ ՀԱՆԴԻՍԱՏԵՍԻՆ (Տեսանյութ)

Ծաղկաձորում ավարտվեց Լեոնիդ Ենգիբարյանի անվան Մնջախաղի միջազգային 4-րդ փառատոնը: Փառատոնի շրջանակներում եղան գերմանական սառը ու ճապոնական ջերմ ներկայացումներ, հայկական գունեղ կրկեսային շոուներ ու ֆրանսիական փուչիկներով բեմադրություններ: Սակայն, այս ամենի մեջ հատկապես առանձնացավ թաիլանդական «Մյութ» թատրոնը, որը ներկայացնում էին ԼԻԶԱՆ ու ԱՆՈՊԸ: Բացի այն, որ խիստ դրական էմոցիաներ պարգեւեց նրանց երկու սիրաշատ ներկայացումները, նրանք նաեւ բոլորի կողմից սիրվեցին իրենց համեստությամբ, անմիջականությամբ ու հետաքրքիր խաղով:  Ամփոփելով փառատոնից ու Հայաստանից ստացած թաիլանդական տպավորությունները` «Իրավունքը» զրուցեց «Մյութ» թատրոնի դերասանուհի ԼԻԶԱ ՍՐԻՊԱՏԱՆԱՍԱԿՈՒԼԻ հետ:

- Փառատոնի շրջանակներում երկու ներկայացմամբ հանդես եկաք, որտեղ երկուսն էլ ընտանեկան սիրո մասին էր. առաջինը` երիտասարդների, երկրորդը` տարեցների: Արդյո՞ք Թաիլանդում իրականում էլ ընտանեկան այդքան ջերմություն ու սեր կա:

- Մենք ընտրեցինք սիրո թեման, քանի որ սա համամարդկային թեմա է եւ ցանկացած երկրում էլ կան այսպիսի ընտանիքներ ու այս ընտանեկան ջերմ մթնոլորտը կարող ես գտնել յուրաքանչյուր երկրում: Ինչ-որ կոնկրետ ընտանիքի օրինակից չենք վերցրել ներկայացումը, այլ պարզապես ընտրել ենք այն, որովհետեւ ցանկացած ազգ կհասկանա սիրո լեզուն:

- Բացի այն, որ հայ հանդիսատեսը հասկացավ թաիլանդական «սիրո լեզուն», նաեւ շատ սիրեց Ձեր դուետը: Հնարավո՞ր է, որ հաջորդ տարիներին էլ գաք ու մասնակցեք ենգիբարյանական փառատոնին նոր ներկայացումներով:

- Եթե մեր մնացած ծրագրերի հետ համընկնի ժամանակը, քանի որ այլ փառատոնների էլ ենք մասնակցում, անպայման կգանք: Մենք շատ սիրեցինք  փառատոնը եւ մեր հանդիսատեսին, այնպես որ, հուսով ենք, որ դեռ կվերադառնանք:

- Մինչ Հայաստան գալը լսե՞լ էիք Հայաստանի ու հայերի մասին:

-Երբեք չեմ իմացել ու երբեք էլ Հայաստանի ու հայերի մասին չէի լսել, բայց երբ եկա այստեղ, իմ պատկերացումներից վեր էր ամեն ինչ: Իսկապես, շատ հիացած եմ հանդիստեսով: Ուշագրավ էր այն, որ հայ հանդիսատեսը կենտրոնացած է դիտում մեր ներկայացումները ու շատ ուշադիր է:

-Իսկ հետաքրքիր է Ձեզ համար փառատոնի շրջանակներում ցուցադրված ո՞ր ներկայացումն էր առանձնահատուկ:

- Անձամբ ես հավանել եմ հայ երիտասարդ դերասանի «Պլյուս-մինուս» ներկայացումը, իսկ Անոպը հավանել է Գերմանիայի ներկայացումը:

- Եթե գաղտնիք չէ, բացի մրցանակներից էլ ի՞նչ եք տանելու  Հայաստանից:

-Հայաստանից մենք տանում ենք հանդիսատեսի սերը, որովհետեւ մենք շատ սիրեցինք նրանց: Մեզ այնքան լավ ընդունեցին եւ այնքան ուշադիր էին մեր ներկայացումների նկատմամբ…

- Ի՞նչ կասեք հայկական ուտելիքների մասին, որոնք այս օրերին հասցրեցիք համտեսել:

- Մի քանի ուտելիքներ շատ տարօրինակ համ ունեին մեզ համար, բայց շատ եմ հավանել հայկական բորշչը:

- Ի վերջո, որքանո՞վ են Հայաստանն ու Թաիլանդը նման ու տարբեր իրարից:

-Տարբերությունն այն է, որ մեր հանդիսատեսը այսքան ուշադիր ու հետաքրքրված չէ նման ներկայացումներով,  որքան հայ հանդիսատեսն է: Իսկ նմանություն կա ուտելիքների մեջ, օրինակ բրնձով փլավը:

Նյութը եւ տեսանյութերը` ՀՐԱՆՏ ՍԱՐԱՖՅԱՆԻ