ՊԱՐՈՒՅՐ ՀԱՅՐԻԿՅԱՆԸ ՄԱՆՐՈՒՔՆԵՐԻ ՀԱՄԱՐ ՍԵՐԺ ՍԱՐԳՍՅԱՆԻՆ ՉԻ ԴԻՄՈՒՄ

ՊԱՐՈՒՅՐ ՀԱՅՐԻԿՅԱՆԸ ՄԱՆՐՈՒՔՆԵՐԻ ՀԱՄԱՐ  ՍԵՐԺ ՍԱՐԳՍՅԱՆԻՆ ՉԻ ԴԻՄՈՒՄ

ԱԻՄ առաջնորդ Պարույր Հայրիկյանը երեկ նախագահական նստավայրում նամակ է  հանձնել, որով պահանջում է  ՀՀ նախագահ Սերժ Սարգսյանի հրաժարականը: Ավելին՝ԱԻՄ առաջնորդը նաև հայտարարել է, որ  Սերժ Սարգսյանի՝ արձակուրդից վերադառնալուց հետո գուցե հացադուլ սկսի:

«Իրավունքը» Պարույր Հայրիկյանից  պարզեց՝ հնարավո՞ր է  հացադուլի փոխարեն նա նախընտրի  Սերժ Սարգսյանի հետ նստել բանակցային սեղանի շուրջ՝երկխոսության ճանապարհով իր բարձրացրած հարցերը լուծելու համար:

Ի պատասխան ԱԻՄ առաջնորդն ասաց, որ քաղաքական գործունեության մեջ որևէ գործելաոճ չի բացառում: «Երեկ նաև մենք պետք է ցույց անեինք,  բայց  33 ներկայացուցչական   խորհրդի անդամներից   ներկա էին  27-ը, և մեծամասնությունն ասաց՝ցույց պետք չէ: Հիմա անգամ ձեր կարծիքը  կարող է ինձ համար հետաքրքրական լինել և մերոնց ասեմ, որ կա բանակցություններ վարելու առաջարկ»,- ասաց Հայրիկյանը:

Ինչ վերաբերում է  հացադուլին, ապա այն Հայրիկյանը կսկսի սեպտեմբերի 8-ին, որը բողոքի դրսևորում չի լինելու, այլ իր բարձրացրած հարցի շեշտադրում. «Այն խնդիրները, որոնք մենք բարձրացնում ենք,  թվում է՝ ակնհայտ են: Մեր նախագահի քաղաքականությունը ձախողվել է:Եվրոպական կողմնորոշումից անցում կատարեցինք ռուսականի, և կյանքը վատացավ՝ գները բարձրացան, Ռուսաստանն ավելի շատ զենք վաճառեց: Բացի այդ՝ մենք Ռուսաստանի հետ պատժամիջոցներ ստանալու վտանգի առաջ ենք: Ռուսաստանը կարող է դիմանալ, բայց մեզ համար դժվար կլինի»:

ԱԻՄ առաջնորդը հույս ունի, որ իրենց բարձրացրած հարցերը ճիշտ կընկալվեն, քանի  որ դրանք հուզում են բոլորին:

Հացադուլը կլինի նախագահական նստավայրի դիմաց, իսկ թե որքան ժամանակ, պարզ չէ. «Դե կարող է,  ես հացադուլ սկսեմ երեք օրից նախագահը հրաժարական տա: Ես միայն  Պարույր Հայրիկյան չեմ անելու հացադուլ, այլ որպես ԱԻՄ առաջնորդ, հետևաբար  33 ներկայացուցչական   խորհրդի անդամների հետ այս հարցը պիտի քննարկեմ»:

Փաստորեն, եթե մինչ սեպտեմբերի  8-ը Սերժ Սարգսյանը ընդունի  Պարույր Հայրիկյանին և փորձեն երկխոսության ճանապարհով  ԱԻՄ ղեկավարի բարձրացրած հարցերը լուծել, հացադուլ անելու գաղափարից Հայրիկյանը կհրաժարվի: «Եթե  իրավիճակը ավելի լավ  տարբերակներ հուշի,  մենք կգնանք ընդառաջ լուծումներին»,- հստակեցրեց ԱԻՄ առաջնորդը:

Ի դեպ, ինչպես  հավաստիացրեց քաղաքական գործիչը, ինքը երբ զանգահարել է  Սերժ Սարգսյանին, նա իրենք երեք օրվա ընթացքում ընդունել է: «Պարզապես ես ինձ թույլ չեմ  տվել մանրուքների համար դիմել»,- եզրափակեց Պարույր Հայրիկյանը:

Սոնա Դավթյան