ԼԵՎՈՆ ՀԱՅՐԱՊԵՏՅԱՆԸ «ԴՈՒԽՈՎ» Է ՏՐԱՄԱԴՐՎԱԾ, ՊՈՒՏԻՆՆ ԷԼ ՈՒՍՈՒՄՆԱՍԻՐԵԼՈՒ ՈՉԻՆՉ ՉՈՒՆԻ. ԱՐԹՈՒՐ ՍԱՖԱՐՅԱՆ

ԼԵՎՈՆ ՀԱՅՐԱՊԵՏՅԱՆԸ «ԴՈՒԽՈՎ» Է ՏՐԱՄԱԴՐՎԱԾ, ՊՈՒՏԻՆՆ ԷԼ ՈՒՍՈՒՄՆԱՍԻՐԵԼՈՒ

ՈՉԻՆՉ ՉՈՒՆԻ. ԱՐԹՈՒՐ ՍԱՖԱՐՅԱՆ

Լևոն Հայրապետյանի ֆեյսբուքյան էջից  տեղեկանում ենք, որ  այսօր ժամը 12:00-ին սկսված նիստը, որի նպատակն էր փոխել Լևոն Հայրապետյանի խափանման միջոցը, հետաձգվել է մինչև օգոստոսի 15-ը՝  ժամը 10:00:

«Իրավունքի» հետ զրույցում  Լևոն Հայրապետյանի ընկեր Արթուր Սաֆարյանն ասաց, որ այսօրվա նիստի ժամանակ վատացավ Լևոն Հայրապետյանի  ինքնազգացողությունը. բժիշկներն այդպես էլ բժշկական օգնություն ցույց չտվեցին  գործարարին:

Ա.Սաֆարյանի խոսքով՝ ինքը հույս ունի, որ գործարարի խափանման միջոցը կփոխվի. «Հայրապետյանն ունի առողջական մի շարք խնդիրներ և նա այդ վիճակով չի կարող  մնալ բանտում»:

Ինչ վերաբերում է ՌԴ նախագահ Պուտինի այն հայտարարությանը, թե չի ճանաչում Լևոն Հայրապետյանին, ապա այդ պատասխանը խոսակցությունից խուսափելու համար  է: Պուտինը լավ էլ ճանաչում  է Լևոն Հայրապետյանին: Անդրադառնալով Պուտինի՝ՀՀ նախագահ Սերժ Սարգսյանին տված այն խոստմանը, թե ինքն անպայման կուսումնասիրի Լևոն Հայրապետյանի գործը, Արթուր Սաֆարյանն այսպես արձագանքեց. «Պուտինն ուսումնասիրելու ոչինչ չունի:Ռուսաստանում առանց Պուտինի իմացության ոչինչ չի կատարվում: Ինքը լավ գիտի՝ ինչու է դա  տեղի ունեցել»:

Հիշեցնենք, որ հուլիսի 24-ին Ռուսաստանի Դաշնության հետաքննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու համար կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով:

Սոնա Դավթյան