ՏԵԽԶՆՆՄԱՆ ՀԱՄԱՐ ՎՃԱՐՈՒՄ ԵՄ, ԲԱՅՑ ԾԱՌԱՅՈՒԹՅՈՒՆ ՉԵՄ ՍՏԱՆՈՒՄ. ՀԱՇՄԱՆԴԱՄ ԹՈՇԱԿԱՌՈՒՆ ԴԺԳՈՀՈՒՄ Է

ՏԵԽԶՆՆՄԱՆ ՀԱՄԱՐ ՎՃԱՐՈՒՄ ԵՄ, ԲԱՅՑ ԾԱՌԱՅՈՒԹՅՈՒՆ ՉԵՄ ՍՏԱՆՈՒՄ. ՀԱՇՄԱՆԴԱՄ

ԹՈՇԱԿԱՌՈՒՆ ԴԺԳՈՀՈՒՄ Է

Այսօր  «Իրավունքի» խմբագրություն է զանգահարել 78-ամյա   թոշակառու,հաշմանդամ, Կենտրոն համայնքի բնակիչ Կոստանդին Խաչատրյանը: Տարեց թոշակառուն դժգոհում էր  իր մեքենայի համար վճարվելիք պետական տուրքերի չափից. « 6400  դրամ վճարում եմ մեքենայի հարկ, 12.000՝ տեխզննման կտրոնի,  25.000 էլ ապահովագրության համար: Ընդ որում՝ տեխզննման գումարը վերցնում, բայց տեխզննում անգամ չեն էլ անում: Ես այդ գումարով կարող եմ ինձ համար դեղորայք գնել»:

Թոշակառուի խնդրանքը մեկն է՝ արդյոք հնարավոր համապատասխան պատկան մարմինները, իրեն որպես հաշմանդամի և թոշակառուի, ազատեն իրեն այդ գումարները վճարելուց: «Կարծում եմ՝ 70 տարեկանից  բարձր վարորդների համար այս վճարումները չպետք է լինեն: Չէ՞ որ ռուսական ասացվածքն ասում է՝ հարկեր պետք է գանձել հարուստներից, ոչ թե աղքատներից»,- վրդոված ասաց քաղաքացին:

Ավտովարորդների միության նախագահ Տիգրան Հովհաննիսյանն էլ  «Իրավունքի» հետ զրույցում ասաց, որ ՀՀ օրենսդրության համաձայն՝  հաշմանդամության կարգ ունեցող վարորդները որևէ արտոնություն չունեն: «Բայց ճիշտ կլիներ, որ տեխզննման   գումարը հանվեր, քանի որ այդ 12.000 դրամի  դիմաց տեխզննման որևէ ծառայություն չի մատուցվում»,-ասաց  միության նախագահը:

Կենտրոն վարչական շրջանի թաղապետարանի եկամուտների հաշվառման և հավաքագրման բաժնից էլ մեզ հայտնեցին, որ   ֆիզիկական անձանց (օրինակ ակադեմիական կրթություն ունեցող, ժամկետային ու պայմանագրային զինծառայողները),  համար որոշակի արտոնություններ նախատեսված են. «Ձեզ դիմած քաղաքացին այս խմբի չի մտնում, բայց բնակարանի մասով (փոխադրամիջոցին դա չի վերաբերում) վարչական շրջանն արտոնություններ տրամադրելու իրավասություն չունի, դա անում է ավագանին, Օրենքով քաղաքացուն օգնել չենք կարող, բայց թող դիմում գրի թաղապետարան: Եթե հնարավորություն լինի, անպայման  կօգնեն»:

Նշենք, որ ՀՀԿ խմբակցության պատգամավոր Հայկ Բաբուխանյանը ՕԵԿ-ի հետ համատեղ  ԱԺ է ներկայացրել օրենսդրական մի նախագիծ, ըստ որի՝  անհատական օգտագործման մեքենաները պետք է ազատվեն տեխզննումից: Հուսանք, որ այս օրինագծի ընդունումը ինչ-որ չափով կթեթևացնի մեր տարեց  այն վարորդների  ֆինանսական բեռը, որոնք  վճարունակ չեն  և հաշմանդամության կարգ ունեն:

Սոնա Դավթյան