Ցավում եմ, որ Ադրբեջանի ղեկավարությունը չի գնահատում զինվորի արժեքը

Ցավում եմ, որ Ադրբեջանի ղեկավարությունը չի գնահատում զինվորի արժեքը

Ադրբեջանական կողմը շարունակում է հայկական դիրքեր ներթափանցելու և դիվերսիոն գործողությունների իրականացման փորձերը, հայկական խաղաղ բնակավայրերի գնդակոծությունը: Այս մասին այսօր լրագրողների հետ հանդիպմանն ասաց պաշտպանության նախարար Սեյրան Օհանյանը:

Նա նշեց, որ հակառակորդը, գերագնահատելով իր ուժերը, վերջին մի քանի օրերին պարբերաբար դիվերսիոն հարձակման փորձեր է արել: Մեր զինված ստորաբաժանումները վերջին օրերին կանխել են հակառակորդի քսանից ավելի դիվերսիաներ: Ըստ նախարարի՝ դրանք հակառակորդի հատուկ պատրաստություն անցած ստորաբաժանումների ձեռքի գործն են:

Սեյրան Օհանյանը նշեց, որ հակառակորդի ռազմաքաղաքական ղեկավարությունը փորձ արեց ստուգելու հայի ոգու ամրությունը, բայց նրանք չեն գիտակցում, որ հայկական բանակը համալրված է հաղթանակած բանակի սպաներով:

«Մենք չենք կարող հասարակական կարծիքի ճնշման տակ բացահայտել բոլոր կանխարգելման աշխատանքները: Շատ փաստեր էլ կան, որ ամբողջովին պարզ չեն, բայց կարճ ժամանակ անց կպարզվեն, և մենք դրանք կներկայացնենք հանրությանը: Հավատացեք, որ այս պահին էլ առաջնագծում կանգնած են մեր սպաները, որոնք քաջաբար մարտնչում են մեր հայրենիքի համար: Իսկ այն զինվորները, որոնք զոհվեցին, մենք նրանց չենք կորցրել, մենք նրանց գտել ենք: Գտել ենք, այն հերոսներին, որոնց գործողությունների շնորհիվ կարողացանք ապհպանել հայի արժանիքները, նրանց ծառայութան շնորհիվ է, որ ոչ մի քայլ նահանջ չունեցանք մեր մարտական դիրքերից»,- ասաց պաշտպանության նախարաը՝  հնչեցնելով վերջին օրերին զոհված զինծառայողների անունները:

Սեյրան Օհանյանը նշեց, որ վերջին օրերին Հայասստանում միջազգային կառույցների ներկայացուցիչների և տարբեր երկրների դեսպանների հետ հանդիպման ժամանակ ներկայացրել է հայկական կողմի դիրքորոշումը՝ հայկական զինված ուժերը պաշտպանում են իրենց երկիրը: Նրա խոսքով՝ հակառակորդը, խախտելով միջազգային պարտավորությունները, փորձում է ապակողմնորոշել միջազգային հանրությանը:

«Ցավում եմ, որ Ադրբեջանի ղեկավարությունը չի գնահատում զինվորի արժեքը: Վերջին օրերին թափված արյան համար ամբողջ պատասխանատվությունն ընկած է Ադրբեջանի ռազմաքաղաքական և ռազմական ղեկավարության խղճի վրա: Ադրբեջանի ղեկավարությունը դարձավ իր ստի զոհը: Նրանք մշտապես ներկայացնում էին, որ իբր իրենց բանակն ամենաուժեղն է, բայց սեփական ժողովրդի մոտ հայտնվեցին փակուղային վիճակում: Այսօր ես հպարտ եմ ՀՀ զինված ուժերով, հպարտ եմ, որ այդ պատասխանատվությունն իմ վրա է դրված»,- ասաց Սեյրան Օհանյանը: