ԲԱՐԻ ՍԱՌՆԱՐԱՆ

ԲԱՐԻ ՍԱՌՆԱՐԱՆ

Երեկ մեկնարկեց «ԲԱՐԻ ՍԱՌՆԱՐԱՆ» բարեգործական նախագիծը, որն իրականցվում է Awesome Foundation հիմնադրամի ֆինանսավորմամբ և Մարինե Պետրոսյանի, Լիլիթ Մելքոնյանի գաղափարի համադրությամբ: Ծրագրի շրջանակներում Երևանում գործող ռեստորանների, սրճարանների, արագ սննդի սպասարման կենտրոնների և ուղղակի անհատ մարդկանց կողմից տրամադրվող սննդի պաշարները կհասցվեն անապահով ընտանիքներին, որոնք, ինչպես կազմակերպիչները նշեցին, ցավոք, այնքա՜ն շատ են:

«Նախագիծն իրականացվում է Երևանում և Գյումրիում: Գյումրիից շաբաթը 1 անգամ մեքենա է գալու և հավաքված ուտելիքի պաշարը փոխանցելու այնտեղ ապրող կարիքավոր ընտանիքներին: Հուսով ենք կարճ ժամանակահատվածում կկարողանանք մեծ արդյունքների հասնել»,- ասում է ՄԱՐԻՆԵ ՊԵՏՐՈՍՅԱՆԸ:

Ի դեպ,  ծրագրի գաղափարը աղջիկների մոտ հղացել է, երբ եվրոպական երկներից մեկի խանութի մոտ հանդիպել են ուտելիքներով լի սառնարանի, որը ազատ հյուրասիրությամբ նախատեսված է եղել կարիքավորների համար:

«Որոշեցինք տեղայնացնել այս գաղափարը և ի նպաստ հայ ազգի կարիքավորների ծառայեցնել: Ճիշտն ասած, սկզբից մտածում էինք՝ սառնարանը դրված լինի դրսում և ծառայի յուրաքանչյուր ցանկացողի, բայց երկար քննարկումներից հետո հասկացանք, որ մեզ մոտ դա «վտանգավոր» կլինի և իբրև բարեգործություն  արդյունավետ տարբերակ չի ծառայի. մեր հասարակությունը դեռևս պատարաստ չէ նման մոտեցման»,- կարծում է Մարինեն:

«Awesome Foundation -ը մեծ կազմակերպություն չէ, մենք ընդամենը մի քանի ընկերներ ենք, որ ամեն ամիս ընտրում ենք որևէ հետաքրքիր նախաձեռնություն և մեր անձնական միջոցներով հավաքված 1000 դոլարին համարժեք դրամ ը փոխանցում՝ գաղափարի իրագործմանն ի նպաստ: Եվ կարծում ենք, որ փոքր գումարով կարելի է մեծ ու բարի գործեր անել: Այս ամսվա մեր միջոցներն ուղղորդվեցին  դեպի «Բարի սառնարան»: Անչափ ուրախ կլինենք օգնություն ստացած ընտանիքների ուրախությամբ»,- ասում է հիմնադրամի անդամներից ՆԱԶԱՐԵԹ ՍԵՖԻՐՅԱՆԸ:

Ի դեպ, Awesome Foundation-ի գործունեությունը բավականին ճկուն է. աջակցություն ցուցաբերվում է թե մշակութային, թե փոքր բիզնեսի ծրագրերի իրագործման համար՝ սահմանափակումներ չկան, թիմի միակ պահանջը հետաքրքիր գաղափարն է :

ԷԹԵՐԻ ՄԱՄՈՒԼՅԱՆ