ԱՅՍ ԵՐԿՐՈՒՄ ԱԽՄԱԽ ՄԱՐԴ ՉԿԱ, ՈՐ ԲԻԶՆԵՍԻ ՆՊԱՏԱԿՈՎ ՀԱՄԱԼԻՐԸ ԳՆԻ

ԱՅՍ ԵՐԿՐՈՒՄ ԱԽՄԱԽ ՄԱՐԴ ՉԿԱ, ՈՐ ԲԻԶՆԵՍԻ ՆՊԱՏԱԿՈՎ ՀԱՄԱԼԻՐԸ ԳՆԻ

Օգոստոսի մեկին արդեն վեցերորդ անգամ  Կարեն Դեմիրճյանի անվան մարզահամերգային համալիրը դրվեց աճուրդի: Այս անգամ ըստ օրենքի վաճառքը տեղի կունենա աճուրդի եղանակով և նախորդ գնից 10 տոկոս զեղչով՝ 11 մլրդ 425 մլն 981. 5 դրամ:

«Իրավունքի» հետ զրույցում  մարզահամերգային համալիրի հասարակայնության հետ կապերի և լրատվության պատասխանատու Կորյուն Գրիգորյանն ասաց, որ այս անգամ էլ համալիրը չեն գնելու. «Ոչ մի խելամիտ անձնավորություն չի մասնակցի այս աճուրդին, քանի որ հասկանում է` աճուրդի հետ կապված կա 6-7 հայց»:

Ինչ վերաբերում է  10 տոկոս զեղչով  համալիրը աճուրդի հանելուն, ապա դա  օրինաչափ է. «Նորմալ չէ այն, ինչ եղել է աճուրդային  գործընթացում: Կառույցի գնահատումը տեղի է ունեցել խայտառակ ձևով: Նշված չէ, որ կառույցը նաև պատմամշակութային նշանակություն ունի»:

Անդրադառնալով համալիրում մնացած աշխատակիցների անձնական գույքին`Կորյուն Գրիգորյանն ասաց, որ  դեռ պարզ չէ` կկարողանա՞ն  վերցնել իրենց  գույքը: « Բաներ կան, որ գույքագրված չեն, բայց համալիրի ներսում են: Եթե վաղն ինչ-որ բան կորի, չես կարող ինչ-որ բան ապացուցել»,-մանրամասնեց Կորյուն Գրիգորյանը:

Մարզահամերգային համալիրի հասարակայնության հետ կապերի և լրատվության պատասխանատուն  վստահեցնում է` իրենք դիմելու են եվրադատարան և հասնելու են հաջողության:

Կարեն Դեմիրճյանի մտերիմ ընկեր, քանդակագործ Ֆերդինանտ Առաքելյանն էլ մեզ հետ զրույցում  ասաց, որ համոզված է`համալիրը գնորդ չի ունենալու, իսկ եթե անգամ ունենա, ապա չի բացառվում, որ «այդ ախմախը այն վերածի ավտոշուկայի»: «Այս երկրում  հիմար մարդ չկա, որ գնի այդ կառույցը, քանի դա բիզնեսի տեսանկյունից իրեն չի արդարացնելու: ԲԱՄՕ-ի տղաները մարդասիրական քայլ արեցին, որ գնեցին կառույցը և այն վերանորոգեցին: Լավ կլիներ, որ ԲԱՄՕ-ի  սեփականատերերին աջակցեն վարկը մարելու  համար»,- ասաց քանդակագործը`հավելելով. «Եթե Կարեն Դեմիրճյանը ողջ լիներ, թույլ չէր տա, որ համալիրը վաճառվի»:

Սոնա Դավթյան