ՑԱՆԿԱԼԻ Է, ՈՐ ՀԱՅՏԱՐԱՐՈՒԹՅՈՒՆՆԵՐԸ ՀԱՍՑԵԱԿԱՆ ԼԻՆԵՆ. ԴԱՎԻԹ ԲԱԲԱՅԱՆ

ՑԱՆԿԱԼԻ Է, ՈՐ ՀԱՅՏԱՐԱՐՈՒԹՅՈՒՆՆԵՐԸ ՀԱՍՑԵԱԿԱՆ ԼԻՆԵՆ. ԴԱՎԻԹ ԲԱԲԱՅԱՆ

ԼՂՀ նախագահի  մամլո խոսնակ Դավիթ Բաբայանն «Իրավունքի» հետ զրույցում  ասաց, որ վերջին երկու օրերին արցախա-ադրբեջանական սահմանում լարվածության թուլացման միտում է նկատվում, որը  ողջունելի է և միանշանակ պայմանավորված է հայկական կողմի պատասխան  հարվածով:

Ինչ վերաբերում է  հարևան երկու պետությունների`Իրանի և Վրաստանի հայտարարություններին, որով կոչ են անում ԼՂ հակամարտությունը լուծել միմիայն խաղաղ ճանապարհով, ԼՂՀ նախագահի  մամլո խոսնակի խոսքով` այս  հայտարարությունները  կունենան իրենց դրական ազդեցությունը. «Հարևան երկրների այս հայտարարությունը մեկ անգամ ևս ցույց  է տալիս  նրանց վերաբերմունքը Ադրբեջանի խիստ ապակառուցողական մոտեցմանը»:

Չնայած սահմանում տիրող լարվածությանը, Դ. Բաբայանը վստահեցրեց`Արցախի ժողովուրդը վճռական է տրամադրված և պատրաստ է ցանկացած գնով պաշտպանել իր պետության անկախությունը:

-Պրն Բաբայան,  հավանաբար օգոստոսի 8-9-ը սպասվում է Ադրբեջանի և Հայաստանի նախագահների հանդիպում: Այն կարո՞ղ է ինչ-որ  կերպ թուլացնել այս լարվածությունը և բեկում մտցնել արցախյան հակամարտության խնդրում:

-Երկու երկրների հանդիպման ժամանակ քննարկվում են բազմաթիվ կարևոր հարցեր: Մենք չպետք է ակնկալենք, որ ցանկացած հանդիպման ժամանակ պետք  է բեկում մտցվի ԼՂ խնդրում: Ուղղակի նման հանդիպումները կարևոր են խաղաղությունն ու կայունությունը պահպանելու համար: Մենք միշտ արժևորում ենք նման հանդիպումները, չնայած նաև ասում ենք, որ Ստեփանակերտը պետք է մասնակցի բանակցային գործընթացին:

-Բացի Վրաստանից և Ադրբեջանից` երկու կողմերին ուժի կիրառումից հրաժարվելու և իրավիճակի կայունացման նպատակով անհապաղ քայլեր ձեռնարկելու կոչ արեցին  ԵԱՀԿ ՄԽ պետություններից Ռուսաստանը և ԱՄՆ-ը: Արդյոք երկու կողմերին կոչ անելու այս մոտեցումից չէ, որ պարբերաբար «ոգևորվում է»  Ադրբեջանը:

-Ոչ: Գիտեք դիվանագիտական և հրապարակային հայտարարությունները  մի փոքր տարբերվում են ոչ հրապարակային հայտարարություններից: Ցանկալի կլիներ, իհարկե, որ այդ հայտարարությունները հասցեատիրական լինեին: Բայց հաշվի առնելով մի շարք հանգամանքներ`դա հավասարակշռված ու տրաֆարետային մոտեցում է, չնայած չի արտացոլում իրականությունը: Ես համոզված եմ, որ ոչ հրապարակային հանդիպումների, քննարկումների ժամանակ միջազգային հանրությունը  խոսում է Ադրբեջանի անհանդուրժողականության վերաբերյալ:

-Ադրբեջանը  տարիներ շարունակ փորձում է միջազգային հանրությանը ապացուցել, որ ԵԱՀԿ Մինսկի խումբը որպես արցախյան հակամարտության ձևաչափ իրեն սպառել է: Դա հաջողվեց իրեն այս օրերի ընթացքում: Եվ ինչպես եք գնահատում ԵԱՀԿ ՄԽ-ի կեցվածքը. Արդյոք այս լարված օրերի ընթացքում  թերացա՞վ, թե՞ ոչ:

-ԵԱՀԿ Մինսկի խումբն իր աշխատանքը կատարում է բավական էֆֆեկտիվ և չպետք է այդ աշխատանքից ակնկալել շուտափույթ լուծում: Մինսկի խումբն անում է ամեն  ինչ, որ պահպանվի կայունությունն ու խաղաղությունը: Ինչ վերաբերում է Ադրբեջանին, ապա նրա գործողություններն ուղղված չեն ԵԱՀԿ ՄԽ-ին, այլ իր ներքին և արտաքին քաղաքական հարցերի լուծմանը, որոնք այս քանի օրերի ընթացքում լուծեց Ալիևը: Նա փորձեց ցույց տալ, որ մտածում է իր ազգի մասին, կասեցնում է հայերի «ագրեսիան» և իր այդ քայլով մի երկու տարի լեգիտիմացրեց իրեն և փորձեց կասեցնել իրենից դժգոհ հանրությանը:

Սոնա Դավթյան