ՄԵՆՔ ՄԵՐ ԶԻՆՎՈՐՆԵՐԻ ԿՈՂՔԻՆ ԵՆՔ.ԱՆԿԱԽՈՒԹՅԱՆ ԲԱՆԱԿԻ ՄԱՐՏԻԿՆԵՐ

ՄԵՆՔ ՄԵՐ ԶԻՆՎՈՐՆԵՐԻ  ԿՈՂՔԻՆ ԵՆՔ.ԱՆԿԱԽՈՒԹՅԱՆ ԲԱՆԱԿԻ ՄԱՐՏԻԿՆԵՐ

«Անկախության բանակ» միավորման անդամները ՀՀԿ խմբակցության պատգամավոր Աշոտ Աղաբաբյանի աջակցությամբ  այսօր այցելեցին Մուրացանի զինվորական հոսպիտալում գտնվող  այն զինվորներին, որոնք վիրավորվել էին հուլիսի 31-ին ղարաբաղա-ադրբեջանական հակամարտ զորքերի շփման գծում: Այս մասին «Իրավունքին» հայտնեց անկախության բանակի անդամ, ազատամարտիկ Ստեփան Ստեփանյանը (Ռեմբո):

Հիշեցնենք, որ հուլիսի 31-ին հակառակորդը ձեռնարկել էր հարձակում ղարաբաղա-ադրբեջանական հակամարտ զորքերի շփման գծի հյուսիսիային ուղղությամբ տեղակայված զորամասերից մեկի պահպանության տեղամասի մարտական հենակետի ուղղությամբ:

Ազատամարտիկը «Իրավունքի» հետ զրույցում ասաց, որ իրենց այցելության  նպատակը մեկն է`ոգևորել մեր զինվորներին. «Թող մեր տղերքն իմանան, որ իրենք մենակ չեն, մենք իրենց կողքին ենք: Եկել ենք նրանց դուխ տալու»:

Անկախության բանակի անդամների հետ զինվորներին տեսակցելու էր եկել նաև Արցախյան ազատամարտի 500 մահապարտներից մեկը`Աղասի Կարապետյանը: Վերջինս  մեզ հետ զրույցում ասաց, որ թշնամու էությունը չի փոխվել. նա խաղաղություն չի ցանկանում: «Մենք պատրաստ ենք նորից  հայրենիքը պաշտպանելու, դաս տալու թշնամուն, միայն թե հրաման -լինի»,-ասաց պրն Կարապետյանը:

Ազատամարտիկները  շնորհակալություն հայտնեցին նաև հոսպիտալի բժշկական անձնակազմին զինվորներին ջերմ ու հոգատար վերաբերմունք ցուցաբերելու համար:

Սոնա Դավթյան