ՈՐՆ Է ԱՄԵՆԱԱՐԴՅՈՒՆԱՎԵՏ ՄԱՐԶԱՁԵՎԸ ՀԱՅԱՍՏԱՆՈՒՄ

ՈՐՆ Է ԱՄԵՆԱԱՐԴՅՈՒՆԱՎԵՏ ՄԱՐԶԱՁԵՎԸ ՀԱՅԱՍՏԱՆՈՒՄ

Մի շարք մարզաձեւեր, որոնք ողջ աշխարհում մեծ մասսայականություն ունեն, Հայաստանում զարգացած չեն: Մեծ թենիս, ֆուտբոլ, ատլետիկա ահա այս մարզաձեւերը մեծ գումարների, անունների ու մեծ հնարավորությունների ասպարեզ են աշխարհում, իսկ հայ մարզիկների եւ երկրպագուների համար այս ամենն ուղղակի այլ իրականություն է:
Բայց որքան էլ շատ լինեն խնդիրները հայկական սպորտում, միեւնույնն է` կան մարզաձեւեր, որոնցում հայ մարզիկները ուժեղագույնն են: Եթե ֆուտբոլի Եվրոպայի կամ աշխարհի առաջնությունների չեմպիոնությունը մեր ընտրանու համար դեռ անհասանելի երազանք է, ապա, օրինակ, ըմբշամարտի հավաքականի համար ցանկացած խոշոր մրցաշար պարզապես անհնար է պատկերացնել` առանց հայ մարզիկների:
Ըստ այս տարվա գրանցած արդյունքների` Հայաստանում ամենաարդյունավետը հենց դասական ըմբշամարտի հավաքականն է: Մեր ընտրանին հաղթողի հավակնորդ է միշտ: Ազատոճայինների հավաքականի մասին թերեւս նույնն ասել չենք կարող, բայց երկար տարիների դադարից հետո Հայաստանի ազատ ոճի ըմբշամարտի հավաքականին հաջողվեց չեմպիոն ունենալ, Դավիթ Սաֆարյանը վերջ տվեց անհաջողություններից ձեւավորված վիճակագրությունը:
Թեեւ սամբոյի Հայաստանի հավաքականը ֆինանսական խնդիրների պատճառով մեծ դժվարություններ ունի, լիարժեք հավաքներ չի անցկացնում, բայց դա չի խանգարում մարզիկներին մեդալներով վերադառնալ մրցաշարից: Ինչ վերաբերում է հայ ձյուդոիստներին, նրանք այս տարի սպասվածից ավելի վատ հանդես եկան, թեեւ մարզաձեւն ունի այստեղ հիմք ու համարվում է հենակետային:
Նույնը չի կարելի ասել բռնցքամարտի հավաքականի մասին: Բռնցքամարտի ֆեդերացիայում կատարված արմատական փոփոխությունների շնորհիվ փոխվեց նաեւ գաղափարական մոտեցումը մարզաձեւի նկատմամբ: Թիմն այժմ ճիշտ է օգտագործում իր ներուժը, եւ արդյունքներն արդեն շոշափելի են: Եվ վերջապես` շախմատ, ամենաազնվական մարզաձեւը, որտեղ ունենք ուժեղագույն ներկայացուցիչներ: Առջեւում շախմատի Համաշխարհային օլիմպիադան է, տղամարդկանց եւ կանանց հավաքականները սովորականի նման ֆավորիտ են: Օլիմպիադան հերթական լավ հնարավորությունն է` ցույց տալու հայկական շախմատի որակներն ու ուժը:

ՔՐԻՍՏԻՆԵ ՊԵՏՐՈՍՅԱՆ