«ՄԻԱՅՆ ՊԱՐԱՅԻՆ ԲԱՐՁՐ ՈՐԱԿ ՈՒՆԵՆԱԼԸ ՔԻՉ Է»

«ՄԻԱՅՆ ՊԱՐԱՅԻՆ ԲԱՐՁՐ ՈՐԱԿ ՈՒՆԵՆԱԼԸ ՔԻՉ Է»

Արդեն ավանդույթի համաձայն, ամեն տարի հուլիսի 28-ին Ռուսաստանի եւ Եվրոպայի ամենամեծ հայկական ազգային պարի ակադեմիա «Հովիկ ստուդիոն» երեւանյան այցի շրջանակներում հանդես է գալիս մեծ համերգային ծրագրով:

Այս անգամ նույնպես ավանդույթը չխախտվեց. Ալ. Սպենդիարյանի անվան ազգային ակադեմիական թատրոնի բեմում հուլիսի 28-ին «Պրոգրես» խորագրով համերգային ծրագիրը նվիրված էր անսամբլի հիմնադրման գաղափարը կրող Հովհաննես Գասպարյանի ծննդյան օրվան:
Երեւանյան մենահամերգի ընթացքում «Հովիկ ստուդիոյի» 9 տարվա կատարած աշխատանքն ամփոփվեց մոտ 25 պարային բեմադրությունով` համադրված հին ու նոր համարներով: Հայ հանդիսատեսն այս անգամ հնարավորություն ունեցավ հիանալու ՙՀովիկ ստուդիո՚ պարային ընտանիքի ստեղծած գեղեցիկ` բալետային, ժողովրդական, ժամանակակից եւ այլ ժանրերի պարային նոր լուծումներով համեմված դինամիկ համարներ, որտեղ համեմված էր գեղեցիկն ու արվեստը:

«ՉԻ ԿԱՐՈՂ ԼԻՆԵԼ ՀԱՋՈՂՈՒԹՅՈՒՆ` ԱՌԱՆՑ ԹԻՄԱՅԻՆ ԱՇԽԱՏԱՆՔԻ»

«Հովիկ ստուդիո» ազգային պարի ակադեմիայի հիմնադիր եւ գեղարվեստական ղեկավար ԻՇԽԱՆ ԳԱՍՊԱՐՅԱՆՆ «Իրավունքի» հետ զրույցում հավաստիացրեց, որ համերգային ծրագիրն ընթացավ այնպես, ինչպես ինքն էր նախատեսել: Սակայն նա առանձնացրեց նաեւ հայ հանդիսատեսին. «Ինչպես միշտ, երեւանյան հանդիսատեսը զարմացրեց իր ջերմությամբ: Չնեղացնեմ մոսկովյան հայերին` հայ հանդիսատեսն իր ջերմությամբ հաստատ գերազանցում է Մոսկվայի հայերին»,- նշեց Ի. Գասպարյանն ու բացելով փակագծերը` նշեց իրենց հաջողության գաղտնիքը, քանի որ քչերին է հաջողվում Հայաստանում այս օրերին լեցուն դահլիճ ապահովել. «Ամեն ինչի հիմքում ընկած է թիմային աշխատանքը: Չի կարող երբեւիցե լինել հաջողություն` առանց միասնականության ու թիմային աշխատանքի: Մեր հաջողության գրավականը գուցե նրանից է, որ ամենաբարձր աստիճանի վրա եմ կանգնեցնում անկեղծությունը, նվիրական մոտեցումը եւ անշահախնդրությունը, որովհետեւ միայն պարային բարձր որակ ունենալը քիչ է հաջողության գրավական հանդիսանալու համար: Սրանք այն հիմնավոր կետերն էին, որոնք ապահովում էին մեծ ընտանիք հասկացողությունը»:

«ՊՐՈԳՐԵՍԸ» ԻՍԿԱԿԱՆ ԿԱՏԱՂԻ ՊԱՅՔԱՐ

Համերգային ծրագրի մոտ 80 տոկոսը «Հովիկ ստուդիոյի» գլխավոր բալետմեյստեր ՀԱՐՈՒԹՅՈՒՆ ԴԱՎԹՅԱՆԻ պարային բեմադրություններն էին, որոնց շարքում առանձնահատուկ էր համերգային ծրագրի անվանումը կրող նոր «Պրոգրես» գեղեցիկ բեմադրությունը: Ըստ բալետմեյստերի, սկզբում ծնվել է բեմադրությունը, որից հետո որոշվել է այդպես անվանել համերգային ծրագիրը. «Սկզբում ինձ մոտ ծնվեց այդ գաղափարը, բեմադրել կատաղի պայքար` զուտ մարդկային հարաբերության առումով, որը հանդիսատեսի կողմից կընդունվի կին-տղամարդ, ծնող-որդի, ինչպես նաեւ եղանակի պայքարը: Այն մեծ հասկացողություն է կյանքի նկատմամբ, որտեղ, այսպես ասած, մի շարժումը հետեւում է մյուսին: Բավականին դինամիկ, շատ բարդ շարժումներով հագեցած պարային համար, որտեղ մեր ակրոբատիկայի ժանրի պարուսույց ընկեր Կարենը եւ միջին խմբի սան Էլենը հոյակապ ներկայացրին: Համերգային ծրագիրն էլ անվանեցինք «Պրոգրես», որը կապված է մեր ստուդիոյի ապագայի ու առաջընթացի հետ»:

ԼԻԼԻԹ ԵՂԻԱԶԱՐՅԱՆ