ԽՈՒՍԱՓԵ′Ք ԳԱԶԱՎՈՐՎԱԾ ԸՄՊԵԼԻՔՆԵՐԻՑ, ՄՈՒԳ ԹԵՅԵՐԻՑ...

ԽՈՒՍԱՓԵ′Ք ԳԱԶԱՎՈՐՎԱԾ ԸՄՊԵԼԻՔՆԵՐԻՑ, ՄՈՒԳ ԹԵՅԵՐԻՑ...

- Հարգելի բժիշկ, ասացեք, օրական որքա՞ն հեղուկ պետք է օգտագործել: Ո՞ր տեսակի հեղուկներից պետք է հրաժարվել ամռանը. կարդացել եմ, որ վնասակար ազդեցություն մարդու օրգանիզմի վրա ունեն գազավորված ընպելիքները, ճի՞շտ է:

Ուսուցչուհի, 33 տարեկան

Հարցին պատասխանել է ՀՀ ԱՆ Ֆիզիկական բժշկության եւ կուրորտաբանության ԳՀԻ սննդաբան, գաստրոէնտերոլոգ ՎԱՐԴԱՆՈՒՇ ՊԵՏՐՈՍՅԱՆԸ.

- Այս կարճ եւ պարզ հարցը չի կարող ունենալ պարզ եւ միանշանակ պատասխան, որովհետեւ հեղուկի քանակը պայմանավորված է ոչ միայն կլիմայական պայմաններով, եղանակով, բնակության վայրով, այլեւ շատ անհատական է եւ տարբեր` կախված մարդու տարիքից, սեռից, առողջական վիճակից, զբաղմունքից եւ այլն: Փորձենք անդրադառնալ բոլորին հերթով:
Ըստ ամերիկացի բժիշկների` մեղմ կլիմայական պայմաններում ապրող առողջ, հասուն տղամարդիկ պետք է օրական օգտագործեն մոտ 3 լիտր հեղուկ (13-15 բաժակ), կանայք` մոտ 2,2 լիտր (8-11 բաժակ):
Այս թվաբանությունը ըստ հանգամանքների փոխում եք ինքներդ` հաշվի առնելով ձեր ֆիզիկական ակտիվությունը, առողջական վիճակը, եղանակը:
Ամռանը հնարավորինս ավելացրեք հեղուկի քանակը կամ գոնե կոմպենսացրեք դրանք շատ ջուր պարունակող մթերքներով, շատ լավ տարբերակ են մրգերն ու բանջարեղենը (լոլիկ, վարունգ, ձմերուկ եւ այլն): Խուսափեք գազավորված ըմպելիքներից, մուգ թեյերից, քչացրեք սուրճի քանակը:

ՇՐՋԱԿԱ ՄԻՋԱՎԱՅՐԻ ԵՎ ԵՂԱՆԱԿԻ ԱԶԴԵՑՈՒԹՅՈՒՆ

Տոթ եւ խոնավ եղանակը ստիպում է օրգանիզմին կարգավորել մարմնի ջերմաստիճանը, որը հնարավոր է քրտինքի միջոցով:
Եթե կարծում եք, որ ձմռանը շատ հեղուկ հարկավոր չէ, սխալվում եք, որովհետեւ տաքացվող փակ սենյակը նույնպես ազդում է մարդու մաշկի խոնավության վրա եւ առաջացնում հեղուկի պակաս:
Եթե ամռանը պլանավորել եք բարձրադիր գոտիներում վայելել ձեր հանգիստը, հաշվի առեք, որ ջրի մակարդակից 2,500 մետր բարձրության վրա գտնվող մարդու սրտի աշխատանքն արագանում է, սկսում է շնչել ավելի արագ, որի հետեւանքով նորից կորցնում է հեղուկ:

ՖԻԶԻԿԱԿԱՆ ԱՇԽԱՏԱՆՔ

Եթե դուք զբաղվում եք սպորտով, կամ որեւէ այլ ֆիզիկական աշխատանք եք կատարում, որը առատ քրտնարտադրություն է առաջացնում, չջրազրկվելու համար անպայման պետք է լրացնել հեղուկի պաշարը: Որքան ծանր է ֆիզիկական աշխատանքը, այնքան շատ է հեղուկի կարիքը:

ՀՂԻՈՒԹՅԱՆ ԵՎ ԿՐԾՔՈՎ ԿԵՐԱԿՐԵԼՈՒ ԸՆԹԱՑՔՈՒՄ

Հղիության ընթացքում անհրաժեշտ է օգտագործել առնվազն 2,3 լիտր հեղուկ (10 բաժակ): Իսկ կրծքով կերակրելու ընթացքում 3,1 լիտր եւ ավելի (13 բաժակ +):

ԱՌՈՂՋԱԿԱՆ ԽՆԴԻՐՆԵՐ

Տաքության, փորթուլության, փսխումների ժամանակ օրգանիզմից մեծ քանակությամբ հեղուկ է դուրս գալիս, որը անպայման պետք է լրացվի:
Երիկամների, լյարդի խնդիրներ, սրտի աշխատանքի անբավարարություն ունեցողները, հակառակը, պետք է սահմանափակեն հեղուկը:
Արդյո՞ք բավարար եք օգտագործում հեղուկ: Պետք է ինքներդ պարզեք, եթե դուք օրվա մեջ հազվադեպ եք զգում ծարավ, հոգնածություն, օրգանիզմի կողմից արտադրվում է 1,5 լիտրից ավելի անգույն կամ բաց դեղնավուն գույն ունեցող մեզ, հավանական է, որ օգտագործում եք ձեզ անհրաժեշտ հեղուկի պաշարը:

ՎԼԱԴ ՄՈՒՐԱԴՅԱՆ