ԳՅՈՒՂՄԹԵՐՔՈՒՄ ԱՌԿԱ ԵՆ ԾԱՆՐ ՄԵՏԱՂՆԵՐ

ԳՅՈՒՂՄԹԵՐՔՈՒՄ ԱՌԿԱ ԵՆ ԾԱՆՐ ՄԵՏԱՂՆԵՐ

Մեկ անգամ չէ, որ սպառողը բողոքում է գյուղմթերքի վատ որակից ու այն պայմաններից, որտեղ վաճառվում է մթերքը: Բոլորն ի վիճակի չեն իրենց գնումները կատարել սուպերմարկետներից եւ նախընտրելով ցածր գինը` միրգ-բանջարեղենը գնում են շուկայից, որտեղ փոշու ու արեւի տակ ոչ այդքան որակյալ ապրանքը դառնում է օգտագործման ոչ պիտանի: Չնայած, ոչ ոք չի երաշխավորում, որ սուպերմարկետներում գեղեցիկ փաթեթավորված մրգերը որակյալ են, մանավանդ որ, սպառողին են հասնում պոլիէթիլենով փաթեթավորված:
Ա յն, որ գյուղմթերքի շուկան ունի բազմաթիվ խնդիրներ` սկսած որակից մինչեւ օրենսդրական բացթողումներ, փաստում է նաեւ ԳԱԱ էկոլոգանոոսֆերային հետզոտությունների կենտրոնի տնօրեն ԱՐՄԵՆ ՍԱՂԱԹԵԼՅԱՆԸ:
Երկու տարի շարունակ Երեւանի շուկաներից կենտրոնը վերցրել է գյուղմթերքի նմուշներ եւ կատարել լաբորատոր փորձաքննություն, որի արդյունքում պարզվել է, որ մի շարք մթերքներ պարունակում են հսկայական քանակությամբ տարբեր ծանր մետաղներ: Օրինակ` պղպեղի մեջ 30 անգամ բարձր է եղել կադիումի պարունակությունը, կանաչեղենը նույնպես պարունակել է կապար եւ պղինձ: Եվ այսպես շարունակ. գրեթե բոլոր տեսակների մեջ պարբերաբար արձանագրվել են էական շեղումներ: ՙՇատ բարդ իրավիճակ է հատկապես լեռնահանքային շրջաններում: Ուսումնասիրություններ ենք իրականացրել Ալավերդու, Կապանի եւ Քաջարանի շուկաներում, որտեղ գյուղմթերքում ծանր մետաղների պարունակությունը սովորական չափը տասնյակ անգամ գերազանցել է: Կան մրգեր, որտեղ հայտնաբերել ենք սնդիկի եւ կադիումի բարձր պարունակություն՚,- տեղեկացրեց Ա. Սաղաթելյանը: Նրա խոսքով` Հայաստանում, եթե ձեռնարկությունների տված արտադրանքը որոշ չափով վերահսկվում է, ապա գյուղատնտեսական մասնավոր շուկայում պատկերն այլ է. ով ինչ աճեցնում է, բերում եւ վաճառում է: Իսկ օրենսդրությամբ` որեւէ վերահսկողություն պարզապես չկա:
Ա. Սաղաթելյանը դեմ է այն պնդումներին, որ միրգ-բանջարեղենից քիմիայի ու զանազան այլ նյութերի հոտ չի կարող գալ այն պատճառով, որ դրանք չունեն հոտ: ՙՕրինակª բավականին տհաճ հոտ ունի ՙDDD՚, որը, ըստ մեր տվյալների, հաճախ է օգտագործվում Հայաստանի տարբեր շրջաններում: Սակայն պետք է ասեմ, որ անպայման չէ, որ միրգ-բանջարեղենից տհաճ հոտ գա հենց թունաքիմիկատներից. հոտ կարող է առաջանալ այն տարայից, որի մեջ տեղափոխել են միրգը, հոտ կարող է առաջանալ նաեւ այն ժամանակ, երբ բանջարեղենը երկար ժամանակ մնում է արեւի տակ՚,- մեկնաբանեց Արմեն Սաղաթելյանը:
Ըստ Ա. Սաղաթելյանի` սպառողն իր իրավունքները պաշտպանելու համար պետք է բողոքի եւ լինի պահանջատեր պետությունից եւ այն մարմիններից, ովքեր կոչված են ապահովելու այն պայմանները, որի արդյունքում շուկա դուրս բերվի առողջ սնունդ: Ավելին` պետք է ամբողջ շուկայում կատարվի մեծ ուսումնասիրություն, որպեսզի սպառողն ինքն էլ հասկանա, թե ինչ սնունդ է ձեռք բերում. ՙԱյսպես ամեն ինչ ՙյաբախտի՚ թողնելը ճիշտ չէ, պետք է հասկանանք, թե որտեղ ինչ պետք է ուսումնասիրվի՚,- եզրափակեց Արմեն Սաղաթելյանը:

ԶՎԱՐԹ ԽԱՉԱՏՐՅԱՆ