ԽՈՍՐՈՎԻ ԱՐԳԵԼՈՑԻ ՄԱՏՅԱՆՈՒՄ ՈՐՍԱԳՈՂՈՒԹՅԱՆ ՈՉ ՄԻ ԴԵՊՔ ՉԻ ԱՐՁԱՆԱԳՐՎԵԼ

ԽՈՍՐՈՎԻ ԱՐԳԵԼՈՑԻ ՄԱՏՅԱՆՈՒՄ ՈՐՍԱԳՈՂՈՒԹՅԱՆ ՈՉ ՄԻ ԴԵՊՔ ՉԻ ԱՐՁԱՆԱԳՐՎԵԼ

ՀՀ բնապահպանության նախարարության Բնության հատուկ պահպանվող տարածքների կառավարման բաժնի պետ Արամ Աղասյանը, այսօր լրագրողների  հետ զրույցում խոսելով արջերին և այլ վայրի կենդանիներին տանը կամ ռեստորանի տարածքում պահելու մասին, ասաց, որ այս տարի բարելավվել է կենդանական աշխարհի մասին օրենքը, որը կանոնակարգում է անազատ կամ կիսաազատ պայմաներում կենդանիների պահելու կարգը:

Ըստ Աղասյանի`որոշակի չափորոշիչներ կան, եթե դրանք անձը պահպանում է, ապա նա կարող է պահել վայրի կենդանի: «Հիմա կա համապատասխան հանձնաժողով, որն ուսումնասիրում է ֆիզիկական կամ իրավաբանական անձի պայմանները, առաջարկները և որոշում` թույլ տալ կամ չտալ վայրի կենդանի պահելը: Համապատասխան լիցենզիայի, պահանջված պայմաների առկայության դեպքում անհատը, ասենք ռեստորանում կամ բակում կարող է արջ պահել: Բայց վայրի կենդանի պահելը շատ դժվար է, որովհետև նա կիսաազատ վիճակում պահվելով վարքագծի փոփոխության է ենթարկվում, և դժվար է նրան վերադարձնել բնություն, քանի որ և ժամանակատար և ծախսատար»,-ասում է Արամ Աղասյանը:

Ինչ վերաբերում է որսագողության դեպքերին, ապա այս տարի ընդամենը 1-2 նման դեպք է արձանագրվել: «Որսագողության դեպքերի նվազման միտում է արձանագրվում»,- ասաց Աղասյանը:

Արդյոք   բնապահպանության նախարարության աշխատակցի այս հայտարարությանը համամիտ է Համահայկական բնապահպանական ճակատի (ՀԲՃ) անդամ Լևոն Գալստյանը: «Իրավունքի» հետ զրույցում  ՀԲՃ անդամն ասաց, որ  նախ որսագողությունը լայն հասկացություն է, երկրորդ` ինքն այդ առումով  հստակ և թվային տեղեկատվություն չունի: Բայց մի փաստի վրա ուշադրություն հրավիրեց Լևոն Գալստյանը. Խոսրովի արգելոցի մատյանում որսագողության ոչ մի դեպք չի  արձանագրվել վերջին մի քանի տարիներին (Խոսքը չի վերաբերում  որսագողության այն դեպքերին, որոնց մասին բարձաձայնել և հանրայնացրել են քաղաքացիները): «Մենք հստակ թվեր չունենք, սա է ամբողջ խնդիրը»,- եզրափակեց Լևոն Գալստյանը:

ՍՈՆԱ ԴԱՎԹՅԱՆ