ԿՈՄԻՏԱՍԻ ՏԱՐԻՆ ԿԱՎԱՐՏՎԻ ԿՈՄԻՏԱՍԻ ԹԱՆԳԱՐԱՆ-ԻՆՍՏԻՏՈՒՏԻ ԲԱՑՄԱՄԲ

ԿՈՄԻՏԱՍԻ ՏԱՐԻՆ ԿԱՎԱՐՏՎԻ ԿՈՄԻՏԱՍԻ ԹԱՆԳԱՐԱՆ-ԻՆՍՏԻՏՈՒՏԻ ԲԱՑՄԱՄԲ

Հուլիսի 24-ի ՀՀ կառավարության նիստի ժամանակ հաստատվեց «Կոմիտասի թանգարան-ինստիտուտ ստեղծելու մասին» կառավարության որոշման նախագիծը: Այս մասին ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ նշեց. «Պետք է նշեմ, որ չնայած Կոմիտասի անգնահատելի մեծ դերին, այնուհանդերձ մինչ օրս Կոմիտասի ժառանգությունը գտնվում էր տարբեր կազմակերպություններում, համախմբված չէր մեկ տեղում , թեպետ ժառանգության մաս էին կազմում բազմաթիվ արխիվներ, ուսումնասիրություններ, հետազոտություններ: 2013 թվականի մայիսի 30-ին ՀՀ  նախագահը Կոմիտաս ի թանգարան-ինստիտուտի ստեղծման հարցում հանդես եկավ «Հայաստան» համահայկական հիմնադրամի Հոգաբարձուների խորհրդի նիստում եւ խորհրդի որոշմամբ հիմնադրամի տնօրինության տակ գտնվող շենքը, որը գտնվում է Կոմիտասի զբոսայգում, հանձնվեց անվարձահատույց օգտագործման իրավունքով պետությանը ու սկսվեցին Կոմիտասի թանգարան-ինստիտուտի ստեղծման աշխատանքները»: Ապա հավելեց. «Նախագծման աշխատանքները իրականացրեց ճարտարապետ Արթուր Մեսչյանը, ամբողջ ֆինանսավորումը` ներառյալ շինարարական աշխատանքները, եւ ներկայումս մեկնարկած ներքին հարդարման ձեւավորման աշխատանքները իրականացվում է «Փյունիկ» հիմնադրամի կողմից»:

Ի դեպ, ըստ Մշակույթի նախարարության տարածած հաղորդագրության, կոմիտասյան ժառանգության գերակշիռ մասը, ինչպես նաեւ ռոյալը, այսօր պահվում են Ե. Չարենցի անվան գրականության եւ արվեստի թանգարանում: Կոմիտասին վերաբերող հսկայածավալ նյութեր պահպանվում են ՀՀ ԳԱԱ արվեստի ինստիտուտի արխիվում, բազմաթիվ հրատարակություններ, վավերագրական, գեղարվեստական ֆիլմեր, ձայնային ու լուսանկարչական, տեսագրված նյութեր կան արխիվներում:
Հիշեցնենք, որ այս նախաձեռնությունը կարեւորվում է նաեւ այն հանգամանքով, որ 2014 թվականի սեպտեմբերի 26-ին լրանում է Կոմիտասի ծննդյան 145-ամյակը, եւ այս առիթով տարին հռչակվել է որպես Կոմիտասի տարի: Իսկ Կոմիտասի թանգարան-ինստիտուտն այցելուների առջեւ իր դռները կբացի 2014 թվականի տարեվերջին:

ՀՐԱՆՏ ՍԱՐԱՖՅԱՆ