ՙՙԿՐԱԿՈՑՆԵՐ ՀՆՉԵԼ ԵՆ, ԲԱՅՑ ՈՉ 6 ԺԱՄ՚. ԱՐԾՐՈՒՆ ՀՈՎՀԱՆՆԻՍՅԱՆ

ՙԿՐԱԿՈՑՆԵՐ ՀՆՉԵԼ ԵՆ, ԲԱՅՑ ՈՉ 6 ԺԱՄ՚. ԱՐԾՐՈՒՆ ՀՈՎՀԱՆՆԻՍՅԱՆ

Պաշտապանության նախարարության մամլո  խոսնակ Արծրուն Հովհաննիսյանը ՙԻրավունքի՚ հետ զրույցում  հերքեց այն տեղեկատվությունը, թե ադրբեջանական կողմը 6 ժամ  կրակ է բացել սահմանային գոտու գյուղերի` Մովսես, Այգեպար Ներքին Կարմիրաղբյուր գյուղերի ուղղությամբ: ՙԿրակոցներ հնչել են, բայց ոչ 6 ժամ: Մենք երբեք այդքան ժամ կրակոցներ չենք ունեցել: Գիտեք, ինչպես է: Մի տեղ կարող է 40 րոպե, մի տեղ` 10, մի տեղ 30 րոպե են կրակել: Մենք պատասխանել ենք, լռել են, հետո նորից սկսել են:  Ընդ որում, կրակել են Տավուշի սահմանամերձ հատվածի ուղղությամբ: Որոշ տեղերում պատասխանել ենք, որոշ տեղերում չենք պատասխանել: Հայկական կողմից զոհեր, վիրավորներ չկան: Ադրբեջանական կողմի մասով չեմ կարող ասել, պետք է հետեւել նրանց մամուլին՚,- պարզաբանեց Հովհաննիսյանը:
Ինչ վերաբերում է նյութական վնասներին, դրանք հաշվառում են տեղական ինքնակառավարման մարմինները, որից հետո համաձայնեցնում Պաշտպանության նախարարության հետ:
Մամլո խոսնակի խոսքով` այս սեզոնին հայկական կողմում բերքահավաք է, թշնամին փորձում է մեր գյուղացուն չթողնել բերքը հավաքի. ՙԵրբեմն մեր գյուղացուն հանդի կողքին զինվոր ենք տրամադրում, որ աշխատեն՚:
Պրն Հովհաննիսյանի  տեղեկացմամբ` ցերեկը կրակոցներ չեն եղել: ՙՍովորաբար երեկոյան  են կրակում, մեկ էլ` երբ հանդերում գյուղացիները ակտիվ աշխատում են՚,- մանրամասնեց ՊՆ մամլո խոսնակը:
Անդրադառնալով նկուղներում պատսպարվելուն` Արծրուն Հովհաննիսյանն այսպես արձագանքեց. ՙԷդպիսի  բան չկա, որ անընդհատ նկուղներում լինեն: Ուղղակի, մարդիկ, որ նկուղ ունեն, շատ ժամանակ իջնում են այնտեղ՚:
Մենք կապ հաստատեցինք նաեւ Մովսես եւ Ներքին Կարմիրաղբյուր համայնքների ղեկավարների` Կամենդատյան Մանվելի եւ Այդինյան Անդրանիկի  հետ: Վերջիններիս խոսքով` բոլոր կրակոցների ժամանակ էլ նյութական վնասներ լինում են: ՙԵս չգիտեմ` հիմա կարեւոր է այդ բնակիչների  հոգեվիճակը, թե± նյութական վնասները՚,- ասաց Կամենդատյան Մանվելը:
Իսկ Մովսես գյուղի գյուղապետ Այդինյան Անդրանիկն էլ մեզ հետ զրույցում եւս հաստատեց` եղել են նյութական վնասներ, իսկ թե կոնկրետ ինչ վնասների  մասին է խոսքը, համայնքի ղեկավարը չմանրամասնեց:
Նշենք, որ համայնքի ղեկավարները մի տեսակ զգուշավոր էին հարցերին պատասխանում այն հիմնավորմամբ, որ չեն ցանկանում ժողովրդի մեջ անհարկի խուճապ տարածել եւ ուրախանալու առիթ տալ թշնամուն:

ՍՈՆԱ ԴԱՎԹՅԱՆ