ՔՐԻՍՏՈՆԵՈՒԹՅԱՆ ԵՎ ՀԵԹԱՆՈՍՈՒԹՅԱՆ ՄԻՋԵՎ ՀԱԿԱԴՐՈՒԹՅՈՒՆ ՉԿԱ

ՔՐԻՍՏՈՆԵՈՒԹՅԱՆ ԵՎ ՀԵԹԱՆՈՍՈՒԹՅԱՆ ՄԻՋԵՎ ՀԱԿԱԴՐՈՒԹՅՈՒՆ ՉԿԱ

Ամեն տարի Գառնու հեթանոսական տաճարում «Արորդիների ուխտ»-ի գլխավորությամբ նշվում է Վարդավառը, որը ըստ արորդիների, հեթանոսական տոն է և կապ չունի քրիստոնեության հետ:

Ըստ բացատրության`Վարդ՝ Վ-Արդ նշանակում է Գերագույն-Վերին Սերումի Խորհուրդ, Գերագույն Սիրո Խորհուրդ: Վարդավառը նախանշում է Գերագույն Սիրո Խորհրդով վառվել-խանդավառվելը, օծվելը: Հայոց սիրո Աստվածուհի Աստղիկի տոնի խորհուրդը նախանշում է  ջրով (իհարկե նաեւ հոգով) մաքրագործում: «Իրավունքի» հետ զրույցում քուրմ Արգիշտին, ով  ևս մասնակցում էր Վարդավառի արարողությանը, ասաց, որ  իրեն քրիստոնյա համարող յուրաքանչյուր հայ իրականում արորդի է: Հայը, եթե գնում է պատերազմի, առանց որևէ  բան մտածելու, նա արդեն արորդի է:

Ըստ քրմի`իրենք վերջերս 34 հոգով են եղել Թուրքիայում, բարձրացել Ներմութ լեռը և կատարել հատուկ  ծիսակատարություն. «Մեր ձայնը շատ ուժգին էր լսվում  Նեմրութ լեռան վրա, քան արևածագը դիմավորելու եկած 250-300 հոգու ձայնը»:

«Քանի հեթանոս կա Հայաստանում» հարցին ի պատասխան քուրմն այսպես պատասխանեց. «Ինչքան հայ գիտեք, բոլորը հեթանոս են»:

«Արորդիների ուխտը» կապ է  պահպանում ոչ միայն Հայաստանում, այլև Սփյուռքում ապրող արորդիների հետ:

Ինչ վերաբերում է քրիստոնեություն- հեթանոսություն հակադրությանը,  քրմի խոսքով`  հակադրություն չկա: «Թող քրիստոնյաները գնան ու իրենց կյանքով ապրեն, մեզ հետ գործ չունենան»,- եզրափակեց   մեր զրուցակիցը:

ՍՈՆԱ ԴԱՎԹՅԱՆ