ՆԵՎՐՈԶ ՀԻՎԱՆԴՈՒԹՅՈՒՆԸ ՀԱՅԱՍՏԱՆՈՒՄ ԵՐԻՏԱՍԱՐԴԱՑԵԼ Է

Արխիվ 12-16 26 Հուլիս, 2014 9:41

ՆԵՎՐՈԶ ՀԻՎԱՆԴՈՒԹՅՈՒՆԸ ՀԱՅԱՍՏԱՆՈՒՄ ԵՐԻՏԱՍԱՐԴԱՑԵԼ Է

«Այգ» հոգեբանական ծառայությունների կենտրոնի ղեկավար Ռուբեն Պողոսյանն այսօր ի պատասխան «Իրավունքի» հարցին`նևրոզ հիվանդությունը Հայաստանում արդյոք ավելի շատ է տարածված, քան այլ տարածաշրջանի ու եվրոպական երկրներում, մասնագետը բացասական պատասխանեց. մեր երկիրը համեմատաբար լավ վիճակում է: Իսկ պատճառը, ըստ հոգեբանի, այն է, որ եվրոպական շատ երկրներում ամեն ինչ արվում է մարդու կյանքը հեշտացնելու, նրան ազատելու դժվարություններից, որի հետևանքով նա հաճախ ընտանիքից դուրս չի կարողանում միջավայրին հարմարվել, խոչընդոտներ հաղթահարել, որն էլ նևրոտիկ վիճակի պատճառ է դառնում: Հայաստանում, սակայն, ամեն ինչ հեշտ չի ձեռք բերվում, մարդը հաղթահարում է որոշ դժվարություններ`իր նպատակին հասնելու համար:

Մեր մյուս հարցադրմանը`արդյոք հիվանդությունը երիտասարդացել է, մասնագետը դրական պատասխանեց`ասելով, որ 30 տարեկան անձինք են արդեն դիմում իրեն նևրոզ հիվանդությամբ: Նևրոզով հակված են ավելի շատ հիվանդանալու կանայք ու երեխաները: Պատահական չէ, որ կենտրոն են բերվում նևրոզով հիվանդ երեխաներ: «Հիվանդության մասին ճիշտ պատկերացում ստանալու համար անհրաժեշտ է ուշադրութուն դարձնել տվյալ մարդու ծննդյան, մինչ ծննդյան իրավիճակին: Նևրոզի առաջացման պատճառները հաճախ պետք է փնտրել վաղ շրջանում, հետ գնալ մարդու ծագումնաբանությունը»,-ասաց Ռ. Պողոսյանը:

Որո՞նք են այն ախտանշանները, որոնցից կարելի է հասկանալ` անհատը նևրոզով հիվանդ է, թե ոչ: Մարդու ուժերը ջլատվում են, չի կարողանում կենտրոնանալ, աշխատանքային միջավայրում իրեն ռեալիզացնել, հաճախ է ինքն իրեն խոսում, կրծում եղունգները`սրանք են նևրոզի հիմնական ախտանշանները:

Սոցիալական վատ պայմանները նույնպես կարող են նևրոզի պատճառ դառնալ: Հաճախ են մասնագետին դիմում նևրոզով հիվանդներ, որոնք ապրել են անապահով ընտանիքում, բայց քիչ չեն դեպքերը, երբ ապահովված ընտանիքում մեծացած մարդը ևս նևրոզով հիվանդ է քանի որ կոնֆլիկտային լարված իրավիճակ է տանը:

Արդյոք առանց մասնագետի` հնարավոր է հաղթահարել նևրոտիկ վիճակը: «Ժամանակավորապես այո»,- եզրափակեց Ռուբեն Պողոսյանը:

Սոնա Դավթյան