«ՈՒԿՐԱԻՆԱՅԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅԱՆ ԱՐԳԵԼՈՒՄԸ ՀԱՆՑԱԳՈՐԾՈՒԹՅՈՒՆ Է ԱՌԱՆՑ ՎԱՂԵՄՈՒԹՅԱՆ ԺԱՄԿԵՏԻ»
Արխիվ 12-16
«ՈՒԿՐԱԻՆԱՅԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅԱՆ ԱՐԳԵԼՈՒՄԸ ՀԱՆՑԱԳՈՐԾՈՒԹՅՈՒՆ Է ԱՌԱՆՑ ՎԱՂԵՄՈՒԹՅԱՆ ԺԱՄԿԵՏԻ»
Օրերս Ուկրաինայի Գերագույն ռադայի խոսնակ Ալեքսանդր Տուրչինովը խորհրդարանի նիստի ընթացքում հայտարարել է երկրում Կոմունիստական կուսակցության լուծարման մասին: Ավելին` նա նշել է, թե հույս ունի, որ Ուկրաինայի խորհրդարանում այլևս Կոմունիստական կուսակցություն չի լինի: Ուկրաինայում ժողովրդավարության այսօրինակ անկման վերաբերյալ Հայաստանի Կոմունիստական կուսակցության եւ Հայաստանի Միացյալ առաջադիմական կոմունիստական կուսակցության Քաղաքական խորհուրդը հանդես է գալիս Կիեւում դե ֆակտո իշխանությունների կողմից երկրի ամենաազդեցիկ ուժերից մեկի` Ուկրաինիայի կոմունիստական կուսակցության գործունեության արգելման փորձերի խիստ դատապարտմամբ: Հայտարարության մեջ մասնավորապես ասված է.
«Պետական հեղաշրջման արդյունքում իշխանության եկած Կիևյան խունտան արդեն քանի ամիս ճնշումներ է գործադրում Ուկրաինայի Կոմկուսի` երկրի այն միակ քաղաքական ուժի նկատմամբ, որը բացահայտ կերպով դատապարտել է Արեւելքում իրականացված ռազմական պատժիչ գործողությունները, որի զոհն են արդեն դարձել Դոնեցկի եւ Լուգանսկի մարզերի հարյուրավոր խաղաղ բնակիչներ: Ամերիկյան փողերով հրահրելով, այսպես կոչված, «եվրոմայդանը», հանցավոր խումբը Դոնբասի խաղաղ բնակիչների դեմ է օգտագործում նույնիսկ ավիացիան: Դրան զուգահեռ հուլիսի 24-ին Կիեւի մարզային դատարանում սկսվում է արդարադատության նախարարության հայցով դատավարական մի գործընթաց` ուղղված ՈՒԿԿ-ի արգելմանը, որը դե ֆակտո իշխանությունների կողմից մեղադրվում է «անջատողականության» աջակցելու մեջ միայն այն բանի համար, որ խստորեն հանդես է եկել արեւելյան շրջանների ռուսալեզու բնակչության բնաջնջման դեմ:
Ցավոք, կիեւյան խունտայի գործողությունները որոշակիորեն օրինաչափ բնույթ են կրում. չէ՞ որ իշխող կոալիցիայի անբաժանելի մասն է կազմում «Սվաբոդա» կուսակցությունը, որն ուղղակիորեն հիտլերյան ֆաշիզմի քաղաքական ժառանգորդն է: Այս իրավիճակում համաշխարհային հասարակության առաջադեմ ուժերը պաշտպանում են Ուկրաինայի Կոմկուսին, որի արգելման դեմ հանդես են եկել ոչ միայն ողջ աշխարհի կոմունիստները, այլեւ եվրոպական ձախերի կուսակցությունը: Հայ կոմունիստները միանում են Կիեւում դե ֆակտո իշխանությունների կողմից Ուկրաինայի Կոմունիստական կուսակցությունն արգելելու փորձերի դեմ բողոքի շարժմանը: Մենք Ուկրաինայի նախագահ Պետրո Պորոշենկոյից պահանջում ենք անհապաղ դադարեցնել ճնշումները ՈՒԿԿ-ի նկատմամբ, հակառակ դեպքում նա վերջնականապես կնույնանա ֆաշիստ-ազատականների հետ, եւ դա նրա քաղաքական կարճատեւ կարիերայի մայրամուտին կհանգեցնի:
Ֆաշիզմը չի հանդուրժվի:
Ուկրաինայի Կոմունիստական կուսակցության արգելումը հանցագործություն է առանց վաղեմության ժամկետի:
Հայ կոմունիստներն իրենց ուկրաինացի զինակիցների հետ են»:
ՀՐԱՆՏ ՍԱՐԱՖՅԱՆ
1
4963 դիտում
2
2532 դիտում
3
2231 դիտում
4
1975 դիտում
5
1958 դիտում
