ՄՈՍԿՈՎՅԱՆ ՎԹԱՐԻ ՖՈՆԻՆ ՈՐՔԱՆՈՎ Է ԱՆՎՏԱՆԳ ԵՐԵՎԱՆԻ ՄԵՏՐՈՆ

ՄՈՍԿՈՎՅԱՆ ՎԹԱՐԻ ՖՈՆԻՆ
ՈՐՔԱՆՈՎ Է ԱՆՎՏԱՆԳ ԵՐԵՎԱՆԻ ՄԵՏՐՈՆ

Ինչպես հայտնի է` հուլիսի 15-ին Մոսկվայի մետրոյի Արբատո-Պոկրովյան կայարանների հատվածում տեղի ունեցավ խոշոր վթար: Ռելսերից դուրս էին եկել երեք վագոններ, արդյունքում, 23 մարդ էր զոհվել, առնվազն 150-ըª վիրավորվել: Վթարի գործով ձերբակալվել են մետրոյի ճանապարհային ծառայության վարպետ Վալերի Պաշկատովը, նրա օգնական Յուրի Գորդովը եւ եւս երկու պատասխանատու աշխատակից, իսկ մետրոպոլիտենի տնօրենն ազատված է զբաղեցրած պաշտոնից:
Այս աղետը, թերեւս, պետք է մեր համար էլ ահազանգ լինի այն առումով, թե որքանով է անվտանգ Երեւանի Կարեն Դեմիրճյանի անվան մետրոպոլիտենի երթեւեկությունը: Այս հարցի պատասխանը փորձեցինք ստանալ Երեւանի մետրոպոլիտենի անվտանգության գծով փոխտնօրեն ՄՈՒՇԵՂ ԲԱՐՍԵՂՅԱՆԻՑ, ով նախ անդրադարձավ Մոսկվայի մետրոյի վթարի պատճառներին.
-Նախ նշեմ, որ Մոսկվայի մետրոյի վթարի պատճառների վերաբերյալ դեռեւս վերջնական պատասխան չունենք: Սակայն, նախնական տվյալներով, սլաքային փոխադրիչի տեղափոխման ժամանակ գծային շարժակազմից ինչ-որ դետալ է ընկել, որը առջեւի վագոնի արգելակում է առաջացրել: Այդ առումով հիմա մեզ մոտ հանձնարարականներ ենք տվել, որ սլաքային փոխադրիչների արտահերթ ստուգումներ կատարվեն, եւ մշտական հսկողության տակ լինեն: Բացի դրանիցª մետրոպոլիտենում այլ կազմակերպությունների կողմից կատարվող աշխատանքների նկատմամբ ուժեղացված հսկողություն կա: Այսինքն, եթե աշխատանք են կատարում, մենք մեր ներկայացուցիչներին հանձնարարում ենք, որ այն հնարավորինս հսկվի: Մոսկվայի մետրոպոլիտենում այլ կազմակերպության կողմից էին աշխատանքներ տարվել, բայց նորմալ հսկողություն չի իրականացվել: Եվ պատահական չէ, որ սլաք տեղադրողները, տվյալ  կազմակերպության ղեկավարը եւ կապիտալ շինարարության տնօրենը արդեն կալանավորված են:
- Ձեր թվարկած միջոցառումներից հետո կարելի է ենթադրել, որ երեւանյան մետրոպոլիտենն այդ միջոցառումներից հետո նման խնդրի առաջ չի կանգնի:
- Մեր շարժակազմերը, տեխնիկական համակարգը մշտական հսկողության տակ են, այսօր էլª ուժեղացված հսկողություն է իրականացվում: Այսինքն` ամեն ինչ արվում է, որպեսզի անվտանգության հարցերին առաջնահերթ լուծումներ տրվեն: Մի խոսքովª անում ենք ամեն հնարավորը, որպեսզի մեզ մոտ անվտանգության հետ կապված խնդիրներ չառաջանան:  Բայց այդ ամենով հանդերձ էլ ոչ ոք չի կարող ասել, որ մենք երաշխավորված ենք, թե մեզ մոտ առհասարակ նման դժբախտ պատահարներ չեն լինի:

ԻԼՈՆԱ ԱԶԱՐՅԱՆ