ՈՐՏԵՂԻ՞Ց ՋԱՎԱԽՔԻ ԲՆԱԿՉՈՒԹՅԱՆԸ ՄԵԾ ԹՎՈՎ ԶԵՆՔ ՈՒ ԶԻՆԱՄԹԵՐՔ

ՈՐՏԵՂԻ՞Ց ՋԱՎԱԽՔԻ ԲՆԱԿՉՈՒԹՅԱՆԸ ՄԵԾ ԹՎՈՎ ԶԵՆՔ ՈՒ ԶԻՆԱՄԹԵՐՔ

Երեկ մամուլում շրջանառվող տեղեկատվության համաձայն` Ջավախքի բնակիչները իրավապահ մարմիններին մեծ քանակությամբ զենք ու զինամթերք են հանձնել: Ավելին` Վրաստանի ներքին գործերի նախարարության մամուլի ծառայության տեղեկատվությամբ` քաղաքացիները կամավոր կերպով ներքին գործերի Ախալքալաքի, Ասպինձայի եւ Նինոծմինդայի վարչություններ են հանձնել տարբեր տրամաչափերի 3 հազար 428 մարտական փամփուշտ, 62 նռնակ, այդ թվում` 5 հակատանկային, 11 կարճափող հրացան, 3 ատրճանակ, 1 հրացան, 1 ուսումնական հակատանկային ական ու այլ զինամթերք: Թե որտեղի՞ց մեր հայրենակիցներին այդքան զենք ու զինամթերք, «Իրավունքը» պարզեց Վրաստանի հարցերով փորձագետ ՋՈՆԻ ՄԵԼԻՔՅԱՆԻՑ.

- Հիմնականում ռուսական ռազմաբազայի դուրս բերելուց հետո մեծ քանակությամբ զենք եւ զինամթերք է կուտակվել այնտեղ եւ վերջին տարիների ընթացքում Վրաստանի ներքին գործերի նախարարությունը համաներում է հայտարարում: Ըստ որի. բոլոր այն անձինք, ովքեր ունեն եւ համարում են, որ ճիշտ կլինի հանձնել ունեցած զինամթերքը, անում են դա: Սա սովորական բան է եւ տարվա մեջ մի քանի անգամ լինում է:

- Արդյո՞ք սա որեւէ կապ ունի վերջին օրերին Թիֆլիսի Սուրբ Էջմիածին եկեղեցու մոտ տեղի ունեցած միջադեպի հետ:

- Ո՛չ, վերջերս մամուլը մի քիչ շատ է չափազանցում այն ամենը, ինչ իրենք ականջի ծայրով իմանում են: Հիշեցնեմ, որ մի քանի օր առաջ էլ հայտարարեցին, որ Վրաստանը Հայաստանին վիզային ռեժիմ է մտցնում, բայց ՀՀ ԱԳՆ-ի հարցին ի պատասխան` Վրաստանի ԱԳՆ-ից հայտարարեցին, որ նման բան չի սպասվում:

- Այսինքն` գոնե այս անգամ վստահաբար կարո՞ղ ենք ասել, որ վերոնշյալ գործընթացը հայերի դեմ չէ ուղղված:

- Այո:

ՀՐԱՆՏ ՍԱՐԱՖՅԱՆ