ԽԱՂԱՂՈՒԹՅԱՆ, ՍԻՐՈ ԵՎ ՊԱՏԵՐԱԶՄԻ ՄԱՍԻՆ ՕՊԵՐԱՆ` «ԿՐԱԿԵ ՕՂԱԿ»-Ը ՇՈՒՇԻԻ ԱՄՐՈՑՈՒՄ

ԽԱՂԱՂՈՒԹՅԱՆ, ՍԻՐՈ ԵՎ ՊԱՏԵՐԱԶՄԻ ՄԱՍԻՆ ՕՊԵՐԱՆ` «ԿՐԱԿԵ ՕՂԱԿ»-Ը ՇՈՒՇԻԻ ԱՄՐՈՑՈՒՄ

ՀՀ նախագահի տիկին Ռիտա Սարգսյանի բարձր հովանու ներքո, Հայաստանի եւ ԼՂՀ մշակույթի նախարարությունների աջակցությամբ, Ալ.Սպենդիարյանի անվան օպերայի եւ բալետի ազգային ակադեմիական թատրոնի նախաձեռնությամբ սեպտեմբերի 1-ին Շուշիի ամրոցում կկայանա հայ նշանավոր կոմպոզիտոր Ավետ Տերտերյանի «ԿՐԱԿԵ ՕՂԱԿ» օպերայի Արցախյան պրեմիերան: Օպերան, որը հիմնված է Բորիս Լավրենյովի «Քառասունմեկերորդը» վեպի եւ Եղիշե Չարենցի բանաստեղծությունների վրա` նվիրվում է Ավետ Տերտերյանի 85-ամյակին եւ Արցախի Անկախության օրվան:

Նախագծի հեղինակ եւ գեղարվեստական ղեկավար Սարինե Ավթանդիլյանի խոսքով`«Կրեկե օղակ» օպերան նախկինում ներկայացվել է օպերային թատրոնում, սակայն այս անգամ հանդիսատեսը բոլորովին այլ օպերա կտեսնի:  Նրա կարծիքով օպերան կունենա հետաքրքիր բեմադրություն, որը կհնչի Շուշիի ամրոցում. «Այս օպերան արժանի է ընդգրկվել նաեւ մեր օպերային թատրոնի երգացանկում, այդպես էլ նախատեսված է: Տերտերյանը իր օպերան բնութագրում էր, որպես խաղաղության, սիրո ու պատերազմի մասին օպերա»,-ավելացրեց ՍԱՐԻՆԵ ԱՎԹԱՆԴԻԼՅԱՆԸ:

«Օպերայի սյուժեն արտաքուստ թվում է, թե  Խորհրդային տարիների հետ որեևէ կապ ունի, սակայն իրականում այն համամարդկային հավերժ թեմայի մասին է: Օպերայի ամբողջ էությունը եւ ոգին կառուցված է Ե. Չարենցի «Ամբոխները խելագարված»  եւ «Սոմա» պոեմների վրա: Եթե Լավրենյովի «Քառասունմեկերորդը» վեպը օպերայի մարմինն է , ապա ամբողջ փիլիսոփայական եւ գաղափարական ոգին անշուշտ Չարենցն է»,-նշեց օպերայի դիրիժոր ՌՈՒԲԵՆ ԱՍԱՏՐՅԱՆԸ , ընդգծելով, որ տարիներն անցնում են, սակայն Ավետ Տերտերյանի ճշմարտությունը անընդհատ հաստատվում է, ասելով  որ մեր հերթական հանճարն է եկել ասպարեզ: Նրա տեղեկացմամբ Ռուսաստանում արդեն սկսել են փառատոնային ծրագիր` նվիրված հայ մեծանուն կոմպոզիտորի 85-ամյակին:

Օպերան բեմադրում է ռեժիսոր Մարիա Սահակյանը ում համար, սա առաջին փորձն է, ըստ նրա  օպերան արդիական է նաեւ մեր օրերում, քանի որ գլխավոր անձնաց սիրային պատմությունը սկիզբ է առում քաղաքացիական պատերազմի ժամանակ: «Այստեղ քաոսն ու սերը միմյանց հակադրված են , երաժշտությունը շատ հետաքրքիր ձեւով արտահայտում է այն ամենը ինչ կա հերոսներից յուրաքանչյուրի հոգում»,- մեկնաբանեց ՄԱՐԻԱ ՍԱՀԱԿՅԱՆԸ:

«Կրակե օղակ» օպերան Ա. Տերտերյանը գրել է 1967 թվականին: Նույն տարում Երեւանի Ալ.Սպենդիարյանի անվան օպերայի եւ բալետի  ազգային ակադեմիական թատրոնի գլխավոր դիրիժոր Արամ Քաթանյանը , Վահագն Բագրատունին եւ Մինաս Ավետիսյանը իրականացրեցին օպերայի առաջին բեմադրությունը:

ԶՎԱՐԹ ԽԱՉԱՏՐՅԱՆ