«ՀԱՅ-ՎՐԱՑԱԿԱՆ ԵՂԲԱՅՐՈՒԹՅՈՒՆԸ ՈՉ ՄԻ ԵՎՐՈՊԱԿԱՆ ԿԱՄ ԱՄԵՐԻԿՅԱՆ ԳՈՐԾՉԻ ՉԻ ՀԱՋՈՂՎԻ ԽԱԹԱՐԵԼ»

«ՀԱՅ-ՎՐԱՑԱԿԱՆ ԵՂԲԱՅՐՈՒԹՅՈՒՆԸ ՈՉ ՄԻ ԵՎՐՈՊԱԿԱՆ ԿԱՄ ԱՄԵՐԻԿՅԱՆ ԳՈՐԾՉԻ ՉԻ ՀԱՋՈՂՎԻ ԽԱԹԱՐԵԼ»

Հուլիսի 21-ին «Իրավունքի» լրագրողները նույնպես Վ. Տերյանի ծննդավայրում` Գանձայում, մասնակցեցին  արդեն ավանդական դարձած «Տերյանական օր» միջոցառմանը, որն այս տարի նշվում էր 48-րդ անգամ: Միջոցառմանը ներկա էին ինչպես հայ, այնպես էլ վրացի քաղաքական, հասարակական ու մշակութային գործիչներ, ովքեր եկել էին մեծարելու, հիշելու հանճարեղ բանաստեղծին, ով անգամ այսօր շարունակում է մնալ հայ-վրացական բարեկամության կապող օղակը: Այս մասին, ինչպես նաեւ տոնակատարության ու քաղաքականության տարբեր հարցերի շուրջ «Իրավունքը» զրուցեց Վրաստանում հայտնի «Լիտերատուրուլի Մեսխեթի» թերթի խմբագիր ԱՎԹԱՆԴԻԼ ԲԵՐԻՁԵԻ հետ:

- Պարոն Բերիձե, քանի որ այս տոնակատարությունը մեկտեղել է հայերին ու վրացիներին, նախ կցանկանայի Ձեր տպավորությունների մասին խոսեինք:

-  Մեր գյուղում Տերյանի պոեզիայի օրը ամեն տարի նշում ենք  հուլիսի երկրորդ կիրակին: Հատկանշական է, որ այս տոնը մենակ չենք նշում, այլ Հայաստանից եկած պատվիրակությունների հետ: Թեպետ, իհարկե, այս տարի մարդիկ քիչ էին` նախորդ տարվա համեմատ, որովհետեւ անցյալ տարի Հայաստանից ժամանած պատվիրակությունն էլ էր մեծ`մոտ երկու անգամ ավելի էր: Ամեն դեպքում, Դուք էլ տեսաք, թե ինչ գեղեցիկ համերգային ծրագիր էր պատրաստված եւ այսպես կազմակերպում ենք ամեն տարի: Տերյանը մեր լիրիկական բանաստեղծն է եւ այսպիսի տոնակատարություն կազմակերպելը մեր պարտքն է: Չ՞է որ Վահան Տերյանին ողջ աշխարհն է ճանաչում եւ մենք հպարտանում ենք դրա համար:

- Հետաքրքիր է, որ ասում եք «մեր լիրիկական բանաստեղծն է»…

- Տերյանը բոլոր ազգություններինն է` ե՛ւ վրացիներինն է, ե՛ւ հայերինը, ե՛ւ ադրբեջանցիներինը: Իհարկե, ավելի շատ հայերինն է, բայց նա ծնվել է այստեղ` Գանձայում: Թեպետ մեծացել է վրացական հանրապետության հայկական համայնքում ու սովորել նախ այստեղ, հետո Օրենբուրգում: Ցավոք, Տերյանը մահացավ շատ երիտասարդ… Ընդամենը 33 տարեկան էր, երբ Օրենբուրգում մահացավ ծանր հիվանդությունից: Բայց այս կարճ կանքի ընթացքում, նա շատ մեծ բան է արել, ինչով մենք այսօր հպարտանում ենք:

- Բացի Վահան Տերյանից, էլ ո՞վ կամ ի՞նչն է միավորում հայերին ու վրացիներին:

- Հայերն ու վրացիները միշտ միասին են եղել, միմյանց համար եղբայրներ են եղել եւ դա առ այսօր այդպես է: Եթե կան այսօր ինչ-որ խմբեր, որոնք ցանկանում են խանգարել մեր եղբայրությանը, ապա դա նրանց չի հաջղվի, որովհետեւ հայ եւ վրացի երիտասարդներն էլ լավ գիտեն, որ մեր եղբայրությունը ոչ ոք չի կարող խաթարել: Կրկնում եմ ` ոչ  ոք, ոչ մի եվրոպական եւ ամերիկյան քաղաքական գործչի:

- Մինչդեռ շատերը չարախնդում են, թե հայ-վրացական հարաբերությունները վտանգված է` Եվրամիության եւ Եվրասիական տնտեսական միության ֆոնին:

- Կապ չունի, որ այսօր Վրաստանը մտել է Եվրամիութուն, իսկ Հայաստանը թեպետ դեռ ոչ մի համաձայնագիր չի ստորագրել` ո՛չ Մաքսային միության անդամակցության, ո՛չ էլ Եվրասիական տնտեսական միության անդամակցության համար, բայց գնում է այդ ճանապարհով: Թե ինչպես կորոշեն երկու երկրների իշխանություններն, իրենց գործն է: Այնպես որ, մենք հարգում ու ենթարկվում ենք մեր քաղաքական պաշտոնյաներին ու հարգում նաեւ իրենց որոշումները: Կրկին վերադառնալով Տերյանին, ուզում եմ շնորհակակություն հայտնել վրացական իշխանությանն ու ժողովրդին, որ թույլ են տալիս ամեն տարի այսպիսի մեծ տոնակատարություն ունենալ` մեծ գրողի պատվին:

ՀՐԱՆՏ ՍԱՐԱՖՅԱՆ

Ջավախք-Երեւան