ԼԻԼԻԹ ՄԿՐՏՉՅԱՆ. ՙՕԼԻՄԻԱԴԱՅՈՒՄ ՄԵՐ ՀԱՎԱՔԱԿԱՆԻՑ ԼԱՎԱԳՈՒՅՆ ԱՐԴՅՈՒՆՔՆԵՐՆ ԵՆՔ ՍՊԱՍՈՒՄ՚

ԼԻԼԻԹ ՄԿՐՏՉՅԱՆ. ՙՕԼԻՄԻԱԴԱՅՈՒՄ  ՄԵՐ ՀԱՎԱՔԱԿԱՆԻՑ ԼԱՎԱԳՈՒՅՆ
ԱՐԴՅՈՒՆՔՆԵՐՆ ԵՆՔ ՍՊԱՍՈՒՄ՚

ՖԻԴԵ-ի առաջարկով 1996-ից ողջ աշխարհում հուլիսի 20-ը նշում են որպես Շախմատի միջազգային օր: Շախմատային այս տոնական օրերին Հայաստանի տղամարդկանց հավաքականն Աղվերանում անցկացնում է իր վերջին ուսումնամարզական հավաքը, որից հետո մասնակցելու է Նորվեգիայի Տրոմսյո քաղաքում օգոստոսի 2-ին մեկնարկելիք Համաշխարհային օլիմպիադային: Իսկ ահա կանանց հավաքականը վերադարձել է Բուլղարիայի Պլովդիվ քաղաքում ավարտված Եվրոպայի կանանց անհատական առաջնությունից եւ նույնպես նախապատրաստվում է Օլիմպիադային: Այս ամենի մասին ՙԻրավունքի՚ հետ խոսեց շախմատի կանանց Հայաստանի հավաքականի գրոսմայստեր ԼԻԼԻԹ ՄԿՐՏՉՅԱՆԸ:

-Եվրոպայի առաջնությունում Դուք զբաղեցրիք 16-րդ հորիզոնականը: Ինչպես կգնահատեք Ձեր եւ հավաքականի մյուս շախմատիստուհիների ելույթները մրցաշարում:

- Ընդհանուր առմամբ բոլորս էլ վատ հանդես չեկանք: Էլինան նվաճեց աշխարհի առաջնության ուղեգիր, ինձ բախտը մի փոքր չժպտած. մինչեւ 14 տեղերը զբաղեցրածներն էին ուղեգիր նվաճում:
- Հատկապես Ձեզանից եւ Էլինա Դանիելյանից սպասելիքները միշտ շատ են լինում...
- Դե Էլինայի համար նվաճում էր աշխարհի առաջնության ուղեգիրը, ինչը հաջող մասնակցության մասին է խոսում, իսկ ես կարողացա բարձրացնել գործակիցներս:
- Իսկ ի՞նչ կասեք Հայաստանի շախմատի տղամարդկանց հավաքականի մասին:
- Օլիմպիադայում տղամարդկանց հավաքականից սպասելիքները, իհարկե, շատ են: Բայց հեշտ չի լինելու, շատ ուժեղ մրցակիցներ են ներկայացված: Բայց ինչպես դուք, այնպես էլ մենք մեր հավաքականից լավագույն արդյունքն ենք սպասում, չէ՞ որ նրանք Օլիմպիադայի գործող չեմպիոններն են:
- Սակայն վերջին շրջանում տպավորություն է, թե հայ շախմատիստները մի փոքր զիջել են դիրքերը:
- Անհատական գործակիցները գուցեեւ իջեցրել են: Բայց այդքան պետք չէ կենտրոնանալ այս փաստի վրա. գուցե տարվա ընթացքում այդքան էլ հաջող հանդես չեն գալիս անհատական առաջնություններում, բայց թիմային ելույթներում կարողանում են իրենց ողջ ուժն ու էներգիան կենտրոնացնել եւ լավագույն կերպով ներկայանալ:
- Եվ վերջում Շախմատի միջազգային օրվա կապակցությամբ ընդհանրացնենք թեման. պատանիների, երիտասարդների մեջ տեսնո±ւմ եք շախմատիստների, որոնք հետագայում կարող են իրենց տեղն ունենալ հավաքականի կազմում: Ի՞նչ սերնդափոխություն կունենանք:
- Այո, իհարկե, եւ աղջիկների, ե°ւ տղաների մեջ կան շատ լավ երեխաներ, որոնք հետագայում կարող են տեղ գտնել հավաքականներում: Գիտենք, որ շախմատի զարգացման համար ամեն բան արվում է, այնպես որ հաջող սերնդափոխություն է սպասվում:

ՔՐԻՍՏԻՆԵ ՊԵՏՐՈՍՅԱՆ