ՎՐԱՑ ԽՈՒԺԱՆԸ ՓՈՐՁՈՒՄ Է ՍԵՊ ԽՐԵԼ ՀԱՅ-ՎՐԱՑԱԿԱՆ ԲԱՐԵԿԱՄՈՒԹՅԱՆ ՎՐԱ

ՎՐԱՑ ԽՈՒԺԱՆԸ ՓՈՐՁՈՒՄ Է ՍԵՊ ԽՐԵԼ ՀԱՅ-ՎՐԱՑԱԿԱՆ ԲԱՐԵԿԱՄՈՒԹՅԱՆ ՎՐԱ

Հուլիսի 20-ին կայացած ամենամյա տերյանական միջոցառումը Գանձայում մի տեսակ իր տեղը զիջեց նախորդ տարիներին: Պարզվում է` իրականում ջավախահայերի տրամադրությունն այդքան էլ տոնական չէր, քանի որ ընդամենը տոնակատարությունից մեկ օր առաջ Թբիլիսիի հայաբնակ Հավլաբար թաղամասում գտնվող Սուրբ Էջմիածին եկեղեցու եւ նրա տարածքում գտնվող թեմական կառույցների վրա հարձակում է տեղի ունեցել էթնիկ հողի վրա: Այս մասին Վիրահայոց թեմը նշել է, որ հուլիսի 19-ին եկեղեցու հարակից ավտոկայանատեղիում ի սկզբանե շատ բացասաբար տրամադրված մի կին հանդիմանել է, որ եկեղեցու մոտակայքում կայանված մեքենան շատ անհարմար տեղ է գտնվում:

Նրա բողոքներին միացել են երկու տղամարդ, ովքեր հերթապահել են այդ ընթացքում եկեղեցու հարեւանությամբ: Հարցի լուծման ու կողմերին հանգստացնելու համար մարդկանց է մոտեցել թեմի հոգեւորականներից մեկը, ում փորձերին ի պատասխան, վերջիններս սկսել են վիրավորանքներ հասցնել հայ ժողովրդի հասցեին: Ժամեր անց թեմի առաջնորդարանի մոտ է եկել 50 տղամարդ, ովքեր եղել են զինված տարատեսակ կտրող, ծակող գործիքներով ու փորձել են հարցեր պարզել եկեղեցում հավաքված մարդկանց ու հատկապես հոգեւորականության հետ: Այդ ընթացքում նրանցից մեկը հասցրել է նաեւ հարվածել եկեղեցու սպասավոր Տ. Մանուկ քահանա Զեյնալյանին: Ավելին, խուժանը կարողացել է ծեծելով քաշել-հանել հոգեւորականի խաչն ու տանել իր հետ: Վիրահայոց թեմը վստահություն է հայտնում, որ նմանատիպ դեպքերը պարբերաբար կրկնվում են ու ուղղորդվում մարդկանց ու որոշ շրջանակի կողմից, ովքեր չեն ցանկանում տեսնել հայերին ու բացարձակապես ունեն հակահայ դիրքորոշում: Փաստի առնչությամբ Հայ Առաքելական եկեղեցու Վիրահայ թեմը դիմել է ոստիկանություն եւ հորդորում է Վրաստանի իշխանություններին` լինել հետեւողական` գտնել ու պատժել մեղավորներին հետագայում նմանատիպ դեպքերի կրկնությունը բացառելու նպատակով:
Դեպքին արձագանքել է նաեւ Մայր Աթոռ Սուրբ Էջմիածինը. «Մայր Աթոռ Սուրբ Էջմիածինը իր խոր մտահոգությունն է հայտնում կատարվածի առնչությամբ եւ դատապարտում ազգային թշնամանք եւ կրոնական անհանդուրժողականություն հրահրող այս գործողությունը: Սադրիչ սույն ոտնձգությունը ցավալի հետեւանքն է վերջին տարիներին Վրաստանում տարբեր կազմակերպությունների ու անհատների` այդ թվում վրաց որոշ հոգեւորականների կողմից տարածվող հակահայկական տրամադրությունների: Ծայրահեղական նման դրսեւորումներն անհարիր են հայ եւ վրաց ժողովուրդների բարեկամական հարաբերությունների ոգուն, որը պատմական մեր ընդհանուր անցյալի թանկ ձեռքբերումներից է: Մայր Աթոռ Սուրբ Էջմիածնի ակնկալությունն է, որ Վրաստանի իշխանությունները պատասխանատվության ենթարկեն եկեղեցու հանդեպ ոտնձգություն կատարած բոլոր անձանց եւ ապահովեն Վրաստանում Հայ Եկեղեցու եւ հայ համայնքի անվտանգությունն ու կյանքի բնականոն ընթացքը»:
Ի դեպ, նշենք, որ դեպքից հետո, ըստ մեր ունեցած տեղեկությունների, Մայր Աթոռ է հրավիրվել Վիրահայոց թեմի առաջնորդ Տ. Վազգեն եպիսկոպոս Միրզախանյանը, ինչի պատճառով նա տերյանական միջոցառմանը չէր կարողացել ներկա լինել, սակայն խիստ տարօրինակ էր այն, որ մի շարք մտավորականներ, այդ թվում նաեւ Հայաստանի ու Երեւանի գրողների միության նախագահները, ովքեր ամեն տարի ներկա են եղել այս միջացառմանը, ինչո՞ւ այս տարի ներկա չէին: Համենայնդեպս, գոնե սատարելու Վիրահայոց թեմին ու Վրաստանի տարածքում ապրող հայ քրիստոնյաներին:

Կույտը մշակեց ՀՐԱՆՏ ՍԱՐԱՖՅԱՆԸ