«ՋԱՎԱԽՔՑԻՆԵՐՍ ՄԻ ՈՏՔՈՎ ԿԼԻՆԵՆՔ ԵՄ-ՈՒՄ, ՄՅՈՒՍՈՎ` ԵՏՄ-ՈՒՄ»

«ՋԱՎԱԽՔՑԻՆԵՐՍ
ՄԻ ՈՏՔՈՎ ԿԼԻՆԵՆՔ ԵՄ-ՈՒՄ, ՄՅՈՒՍՈՎ` ԵՏՄ-ՈՒՄ»

Հուլիսի 21-ին «Իրավունքը» լինելով Վ. Տերյանի ծննդավայրում` Գանձայում, «Տերյանական օր» ամենամյա միջոցառման հանդիսավոր արարողությունից հետո զրուցեց Վրաստանի խորհրդարանի Նինոծմինդայի շրջանի հայ պատգամավոր ՀԵՆԶԵԼ ՄԿՈՅԱՆԻ հետ:

Անդրադառնալով տերյանական տոնակատարությանը` Հ. Մկոյանը նշեց.
- Այսօր տոն էր մեր Նինոծմինդայում, եւ տեսաք, թե ինչքան ժողովուրդ էր հավաքվել` թե՛ հայ, թե՛ վրացի: Եվ սա էլի մի քայլ է` վրաց-հայկական բարեկամությունն առաջ տանելու համար: Երկու կողմից էլ եղան ասմունք, պարեր, երգեր...
- Իսկ գնալով ավելի մեծ ժողովրդականություն է վայելում այս տոնը, թե՞ ճիշտ հակառակը:
- Տարեցտարի ավելանում է տոնին մասնակցող ժողովուրդը: Մենք նույնիսկ ուզում էինք 5 տարին մեկ նշել Տերյանի օրը, բայց ժողովուրդը խնդրեց, որ ամեն տարի նշվի: Հատկապես, որ մյուս տարի Վ. Տերյանի 130 ամյակն է, որոշել էինք այդ ժամանակ նշել, բայց ժողովուրդը չհամաձայնեց:

-Ջավախքում հայապահպանությունը կարեւորագույն խնդիրներից է, բայց այսօր մենք տեսանք հայերեն երգող փոքրիկների: Ըստ Ձեզ, այսօր առաջընթաց կա՞ այս հարցում:
- Դե որ երիտասարդներն արդեն սկսել են, ուրեմն` առաջընթաց կա:
- Ջավախքում ո՞ր խնդիրն է այսօր առաջնային, ինչը շտապ լուծման կարիք ունի:
- Հիմնական խնդիրը աշխատատեղերն են: Վերջին 2-3 տարին այստեղից էլ չեն գնում Ռուսաստան` արտագնա աշխատանքի: Ժողովուրդը ե՛ւ խոշոր անասունների անասնաբուծությամբ է զբաղվում, պանիր արտադրում, ե՛ւ կարտոֆիլի աճեցմամբ է զբաղվում: Անցյալ տարի, ով կարտոֆիլ ու պանիր ուներ, կարողացավ բարձր գներով վաճառել: Դրա համար էլ, որ ժողովուրդը տեսնում է, որ իր արտադրանքը գին ունի, ուզում է արդեն տեղում աշխատել:
- Պարոն Մկոյան, շատ փորձագետներ կարծիք են հայտնում, որ հայ-վրացական բարեկամությունը կարող է մեծապես տուժել, քանի որ Հայաստանը գնում է դեպի Եվրասիական տնտեսական միություն (ԵՏՄ), իսկ Վրաստանը` Եվրամիություն (ԵՄ):
- Ոչ, ինչու: Արդեն այդ որոշված է, Վրաստանը մինչեւ վերջ գնալու է դեպի Եվրոպա, իսկ Հայաստանը` Եվրասիական տնտեսական միություն: Թող գնան, տեսնենք` որտեղ լավ կլինի: Մենք` ջավախքցիներս, մի ոտքով կլինենք ԵՄ-ում, մյուսով` ԵՏՄ-ում:
- Իսկ Վրաստանի քաղաքական գործիչներն ինչպե՞ս են վերաբերվում բարեկամ երկրների ԵՄ-ԵՏՄ տարբեր կողմնորոշմանը:
- Խնդիր չունենք...Իսկապես չունենք:

ՀՐԱՆՏ ՍԱՐԱՖՅԱՆ
Ջավախք-Երեւան