16-ԱՄՅԱ ԵՐԻՏԱՍԱՐԴԸ ԿԱՐՈ՞Ղ Է ՄԱՍՆԱԿՑԵԼ ՏԻՄ ԿԱՌԱՎԱՐՄԱՆԸ

16-ԱՄՅԱ ԵՐԻՏԱՍԱՐԴԸ ԿԱՐՈ՞Ղ Է ՄԱՍՆԱԿՑԵԼ ՏԻՄ ԿԱՌԱՎԱՐՄԱՆԸ

Հայաստանի  համայնքների միության նախագահ Էմին Երիցյանը կարծում է, որ ՀՀ ընտրական օրենսգրքում  ՏԻՄ-ի գործունեության վերաբերյալ  անհրաժեշտ է փոփոխություններ անել: Միությունն առաջարկում  է մի շարք փոփոխություններ կատարել` մասնավորապես ՝ համայնքի ղեկավարի, ավագանու անդամի, Երևանի քաղաքապետի և Երևանի ավագանու անդամ ընտրվելու համար սահմանել միատեսակ նվազագույն տարիքային շեմ: Նման փոփոխություն կատարելու հիմնավորումը  հետևյալն է`սահմանել և երաշխավորել հավասար ընտրական իրավունք, ինչպես նաև մեծացնել ավագանու դերը. «ՀՀ ընտրական օրենսգրքով (հոդված 132-րդ) համայնքի ղեկավար ընտրվելու տարիքային ցենզ է սահմանված 25, իսկ ավագանու անդամ ընտրվելու համար 21 տարին: Երևան քաղաքում ավագանու անդամ կարող է ընտրվել 21 տարին լրացած, իսկ քաղաքապետ 30 տարին լրացած անձինք: Այսպիսով` խախտված են հավասար իրավունքները»:

Փոփոխություններից մեկն էլ վերաբերում է ՏԻՄ-ում քվեարկության իրավունքին: Ներկայումս ընտրության իրավունք ունեն 18 տարին լրացած քաղաքացիները: Համայնքների միությունն առաջարկում է  տարիքային նվազագույն  շեմը սահմանել 16 տարին: Այս առաջարկը հարուցեց լրատվամիջոցների ներկայացուցիչների զարմանքը: Արդյոք 16-ամյա երիտասարդը կարող է արդյունավետ  մասնակցել համայնքի ՏԻՄ-ի կառավարմանը: «Ժամանակակից երիտասարդները  տեղեկացված, պատրաստ  քաղաքացիներ են: Երբ 16 ամյա երիտասարդը ստանում է անձնագիր, նա դառնում է ՀՀ լիարժեք քաղաքացի»,- պատասխանեց Երիցյանը:

Բանախոսի խոսքով`առաջարկները ներկայացվել են  տարածքային կառավարման նախարար, փոխվարչապետ Արմեն Գևորգյանին`հետագա  քննարկումներ կազմակերպելու համար:

Հայաստանի համայնքների միության մյուս առաջարկը վերաբերում է  Հայաստանում սահմանել տեղական ինքնակառավարման մարմինների մեկ միասնական օր սահմանելուն`հրաժարվելով «փնջային» ընտրությունների ձևից:

ՍՈՆԱ ԴԱՎԹՅԱՆ