SOS. ՍԵՎԱՆԻ ՋՐԻ 60%-Ը ՊԻՏԱՆԻ ՉԷ ԻՇԽԱՆ ԲՈՒԾԵԼՈՒ ՀԱՄԱՐ

SOS. ՍԵՎԱՆԻ ՋՐԻ 60%-Ը ՊԻՏԱՆԻ ՉԷ ԻՇԽԱՆ ԲՈՒԾԵԼՈՒ ՀԱՄԱՐ

«Էկոլուր» հԿ-ի նախագահ, բնապահպան Ինգա Զարաֆյանի խոսքով` այս տարի  Սևանա լճից  բաց է թողնվելու ոչ թե 240 միլիոն խմ ջուր, այլ 270 միլիոն խմ:

Բնապահպանի խոսքով` արդեն բաց է թողնվել 170 միլիոն խմ, իսկ մինչև օգոստոսի 16-ը բաց է թողնվելու 75 մլն խմ ջուր:

Հիշեցնենք, որ  ՀՀ կառավարությունը նոր առաջարկություն էր ներկայացրել  Ազգային ժողով, որտեղ որպես ջրբացթողումների առավելագույն չափաքանակ նշված է եղել 270 միլիոն խմ: Այդ փոփոխությունը 2-րդ և  3-րդ ընթերցմամբ ՀՀ ԱԺ պատգամավորներն ընդունել են:

Բնապահպանի խոսքով` արդեն արձանագրվել է, որ Սևանա լիճն ունի բացասական  բալանս, իսկ նախկին բնապահպանության նախարար Արամ Հարությունյանն ասում էր`չպետք է  թույլ տալ, որ բացասական բալանս արձանագրվի: Նույն խոսքերն ասում է ներկայիս նախարարը: Սակայն, ըստ բնապահպանի, դրանք միայն  խոսքեր են: Սևանի մակարդակն արդեն իջել է 9-10 սմ-ով, և կիջնի ավելի շատ, եթե այսպես շարունակվի: Սևանի ջրի 60%-ը պիտանի չէ իշխան տեսակի ձուկ բուծելու համար:

Մի հանգամանքի մասին ևս  փաստեց Զարաֆյանը. բնպահպանության նախարարության կայքից անհետացել են  մոնիտորինգ իրականացնող  կայքի` Սևանի  վատ վիճակի մասին պաշտոնական տվյալները:

«Թեղուտի պաշտպանության քաղաքացիական նախաձեռնության» անդամ Արթուր Գրիգորյանի խոսքով էլ ժամանակը եկել է արդեն մեկ առ մեկ խոսել ոչ միայն  բարձրաստիճան պաշտոնյաների, այլև առանձին մասնագետների մասին, որոնք պատասխանատու են բնապահպանական այս կամ խնդրի առաջացման համար: «Պետք է  պատասխանատվության ենթարկել նաև այն միջազգային կառույցներին, որոնք  գումար են տրամադրում պետական համապատասխան կառույցներին,  իսկ վերջիններս դրանք ծախսում են անձնական նպատակների համար»,- եզրափակեց Արթուր Գրիգորյանը:

ՍՈՆԱ ԴԱՎԹՅԱՆ