Վերագործարկում են 112 հոր` առանց փորձագիտական ուսումնասիրության

Արխիվ 12-16 21 Հուլիս, 2014 9:59

Վերագործարկում են 112 հոր` առանց փորձագիտական ուսումնասիրության

Նախորդ վարչապետ Տիգրան Սարգսյանի օրոք որոշում ընդունվեց փակել հորերը ջրային ռեսուրսների վերականգնման համար, սակայն վերջերս որոշում է ընդունվել վերագործարկել 112 հորատանցք, մաքրել ու վերականգնել դրանք : «Էկոլուր» ՀԿ նախագահ, բնապահպան Ինգա Զարաֆյանը կարծում է, որ այս որոշումը ոչ միայն հակասական է, այլև հակապետական. «Տպավորությունն այնպիսին է, որ պետական շահի փոխարեն կարևորվում էր մի խումբ մարդկանց շահերը»:

Բնապահպանը ներկայացնում է հստակ տվյալներ` մեկ հոր փակելն արժե 2.5 մլն դրամ, իսկ 550 մլն դրամ անհրաժեշտ է 112 հորերը շահագործելու համար: Ըստ բանախոսի` հետաքրքիր պատճառաբանություն է բերվում հորերի վերագործարկման համար. դրանք չեն պատկանում Արարատյան դաշտի ստորգետնյա ջրերի ավազանին. «Բայց ավազանը մնում է ավազան: Մենք ունենք մի բարդ համակարգ, որն արդեն խախտված է: Ո՞վ պետք է իմանա` որ հորը որ շերտին է պատկանում»:

Մինչ նման որոշում կայացնելը, ըստ բնապահպանի, անհրաժեշտ էր մանրամասն փորձագիտական ուսումնասիրություն անցկացնել` հասկանալու` կարելի է այդ հորերը վերագործարկել, արդյոք դրանք կազդեն Արարատյան դաշտի ստորգետնյա ջրերի ավազանի վրա: «Այս ծրագիրը նույնիսկ փորձաքննության չի ուղարկվել, որն ինձ համար անհասկանալի է»,- եզրափակեց Զարաֆյանը:

ՍՈՆԱ ԴԱՎԹՅԱՆ