ՏԱՐՕՐԻՆԱԿ ՙՓԱՍՏԱԲԱՆՈՒԹՅՈՒՆ՚ª ՎԵՐՆԻՍԱԺԻ ԳՈՐԾՈՎ

ՏԱՐՕՐԻՆԱԿ ՙՓԱՍՏԱԲԱՆՈՒԹՅՈՒՆ՚ª ՎԵՐՆԻՍԱԺԻ ԳՈՐԾՈՎ

Վերնիսաժի հայտնի կրակոցների գործի հետ կապված` մեկ տարօրինակ հանգամանք է սկսել ջրի երես դուրս գալ: Երբ այս գործի քննությունը նոր-նոր էր սկսվում, Վերնիսաժում վիրավորված եւ հետո մեղադրյալի կարգավիճակում հայտնված Նելսոն Մելքոնյանի փաստաբան ՎԱՐԴՈՒՀԻ ԷԼԲԱԿՅԱՆԸ ներկայանում էր նաեւ որպես մյուս տուժողի եւ գործով երրորդ մեղադրյալիª Վալերի Հովհաննիսյանի պաշտպան: Մինչդեռ փաստացի` Վ. Հովհաննիսյանի պաշտպանը Լեւոն Բաղդասարյանն է, ով գործի հետ կապված` վերջերս հանդես եկավ մի քանի հրապարակային աղմկահարույց հայտարարություններով: Ուրեմն` ինչո±ւ էր տիկին Էլբակյանը ներկայանում որպես Վ. Հովհաննիսյանի պաշտպան: Պատասխանելով մեր այդ հարցինª տիկին Էլբակյանը նշեց.
-Ես Վալերի Հովհաննիսյանի պաշտպանը եղել եմ  այնքանով, որ ընդամենը մեկ անգամ քննիչը նրա մոտ է գնացել, առաջարկել, որպեսզի նա ցուցմունք տա, ով էլ հրաժարվել է ցուցմունքներ տալուց: Ես միայն այդ քննչական գործողությանն եմ ներկա եղել, այդքանով է ընդամենը կայացել իմª Վալերի Հովհաննիսյանի փաստաբան լինելը, երբ նա դեռեւս եղել է վկայի կարգավիճակում...
Այս ի±նչ է, փաստաբանական անշահախնդիր օգնությո±ւն: Կամ տիկին փաստաբանը չգիտի±, որ ՙայնքանով, որ՚-ով ինչ-որ մեկի պաշտպանը չեմ դառնում: Դրա համար կա հատուկ կարգ, պաշտպանյալի դիմում, ծառայության պայմանագիր, որից հետո արդեն, միայն պաշտպանյալի լիազորությամբ` փաստաբանը կարող է դիմել նախաքննության մարմնին եւ ստանձնել տվյալ անձի պաշտպանությունը: Եվ առանց այդ լիազորագրի, մեր կարծիքով, քննիչը որեւէ իրավունք չուներ տիկին Էլբակյանին թույլ տալ մասնակցել հարցաքննությանը, այսինքն, խոսքը կարող է եւ ապօրինության մասին է: Բնականաբարª տիկին Էլբակյանից փորձեցինք պարզել այդ ՙհանելուկը՚.
- Իսկ ո±վ է Ձեզ դիմել, որ ստանձնեք Վալերի Հովհաննիսյանի պաշտպանությունը:
- Ինձ մոտ եկել են մարդիկ, ովքեր ներկայացել են` որպես Վալերի Հովհաննիսյանի մտերիմներ, դիմում են գրել: Համապատասխան օրինակը առկա է ե°ւ քննիչի մոտ ե°ւ, բնականաբար, իմ վարույթում:
- Վ. Հովհաննիսյանը Ձեզ լիազորագիր տվե±լ է, որով Դուք կկարողանայիք ներկայացնել իր շահերը:
- Վ. Հովհաննիսյանը որեւէ փաստաթղթի տակ չի ստորագրել, թե համաձայն է, որ ես լինեմ իր պաշտպանը: Պարզապես, երբ նա դեռ վկայի կարգավիճակում էր, հիվանդասենյակում, երբ հրաժարվեց ցուցմունք տալուց, քննիչի ներկայությամբ հայտարարեց, որ ցանկանում է ես` որպես իր փաստաբան, ստորագրեմ արձանագրության տակ: Ինձ Վ. Հովհաննիսյանի պաշտպանը դառնալու համար խնդրել են նրա հարազատները, բայց ոչ Վալերի Հովհաննիսյանը: Նրա հարազատներն ինձ դիմում էին ներկայացրել, որ ես դառնամ Հովհաննիսյանի պաշտպանը: Հետագայում, սակայն, Հովհաննիսյանի հայրն ասաց, որ ցանկանում է երկրորդ պաշտպան ներգրավվել գործում:
- Փաստորեն, հիմա Դուք Հովհաննիսյանի առաջին պաշտպանն եք:
- Հիմա` ոչ, որովհետեւ դրանից հետո նրա հայրը դիմում գրեց եւ հրաժարվեց, որ ես պաշտպանեմ իր որդուն:
- Իսկ մինչ այդ Դուք պայմանագիր ունեցել եք:
- Ոչ, միայն հարազատների դիմումն է եղել:
Այս մասին խոսեցինք, քանի որ շրջանառվում են լուրեր, թե հիշատակված հարցաքննությունն ամենեւին էլ միակ փաստը չէ, որով սպառվում է տիկին Էլբակյանի այդ ՙհումանիտար՚ փաստաբանությունը: Նախª նա Վ. Հովհաննիսյանի փաստաբան է ներկայացել նաեւ լրատվամիջոցներով: Երկրորդը` կան կցկտուր խոսակցություններ, թե ՙներկայացնելով՚ Վ. Հովհաննիսյանի շահերը, փաստաբանը նրան ՙխորհուրդ՚ է տվելª ինքնախոստովանական  ցուցմունք գրել: Բնականաբար, տիկին Էլբակյանը հերքում է այդ խոսակցությունները.
- Ինչ վերաբերում է ինչ-որ ինքնախոստովանական տեքստեր պատրաստելուն, համոզելուն, որ խոստովանի մեղքը, բնականաբար, իրականությանը չի համապատասխանում: Ի±նչ խոստովանական ցուցմունք պետք է տար, դա մտացածին տարբերակներ են:

ԻԼՈՆԱ ԱԶԱՐՅԱՆ