ՄԱՇԿԱԲԱՆԸ ԾՈՎ ՄԵԿՆՈՂՆԵՐԻՆ` ՄԱԾՈՒՆԻՑ ՄԱՇԿԸ ԿՐԿՆԱԿԻ ՉՈՐԱՆՈՒՄ Է

ՄԱՇԿԱԲԱՆԸ ԾՈՎ ՄԵԿՆՈՂՆԵՐԻՆ` ՄԱԾՈՒՆԻՑ ՄԱՇԿԸ ԿՐԿՆԱԿԻ ՉՈՐԱՆՈՒՄ Է

- Ասացեք, ինչպես խնամել մաշկը ամռան ամիսներին: Ես եւ ամուսինս պատրաստվում ենք ծով մեկնել: Արեւայրուքը, օգտակա՞ր է: Այրված մաշկին մածուն քսել կարե՞լի է:

Հարցին պատասխանում է թիվ 2 բուժմիավորման մաշկաբան ՍԱՄՎԵԼ ԽԱՉԱՏՐՅԱՆԸ.

-Արեւից պաշտպանվելու համար խորհուրդ է տրվում օգտագործել խնամքի միջոցներ. քսուքներ, լոսիոններ, որոնք պահպանում են մաշկը եւ թույլ չեն տալիս ուլտրամանուշակագույն ճառագայթներին` վնասել այն: Ի դեպ, այդ միջոցներից յուրաքանչյուրը նախատեսված է մաշկի որոշակի տեսակի համար` ճարպոտ, չոր եւ նորմալ: Դրանք ունեն փափկեցնող, խոնավացնող ազդեցություն: Յուրաքանչյուր մարդ գիտի, թե ինչ է անհրաժեշտ իր մաշի համար: Ցանկության դեպքում կարող եք խորհրդակցել մասնագետի հետ:
Ժողովրդի մեջ տարածված կարծիք կա, թե արեւայրուքը շատ օգտակար է մարդու օրգանիզմի համար, ինչը սխալ է: Արեւայրուքի արդյունքում ընկնում է մաշկի դիմադրողականությունը: Մաշկը դառնում է չոր ու անառողջ: Արեւայրուքից պետք է զգուշանան հատկապես բաց մաշկ ունեցողները, ինչպես նաեւ արեւային մաշկաբորբ (դերմատիտ) ունեցող անհատները: Այս հիվանդությամբ տառապողները մեզ ավելի շատ դիմում են ամռան ամիսներին, սակայն այն ձմռան ամիսներին եւս հանդիպող հիվանդություն է: Արեւային մաշկաբորբը պատկանում է ալերգիկ մաշկաբորբերի շարքին: Մարդիկ, որոնք ունեն նման խնդիր, գիտեն, թե ինչպես է պետք խնամել մաշկը: Արեւային մաշկաբորբի նշաններից են. կարմրություն` մաշկի որոշակի հատվածներում, քոր: Արեւային մաշկաբորբի դեպքում նշանակվում է սիմպտոմատիկ բուժում:
Որոշ հիվանդությունների դեպքում կտրականապես արգելվում է լինել արեւի ճառագայթների տակ: Խոսքը մաշկային հիվանդություններ ունեցող մարդկանց մասին է, հատկապես` եթե ունեն օնկոլոգիական խնդիրներ, մեծ խալեր, վիտիլիգո հիվանդության դեպքում, սիրտանոթային, հիպերտոնիկ հիվանդությունների ժամանակ, ինչպես նաեւ վահանաձեւ գեղձի լուրջ դիսֆունկցիայի դեպքում:
Ամռան ամիսներին խորհուրդ է տրվում կրել շնչող, բնական թելերով` բամբակից, մետաքսից, կարված հագուստ: Պետք է հրաժարվել կիպ հագուստից: Խորհուրդ չի տրվում կրել սինթետիկ թելերից կարված հագուստ: Ի դեպ, ցանկալի է, որ հագուստը լինի բաց գույնի: Ինչպես գիտեք, բաց գույնը կլանում է արեւի ճառագայթների մոտ 20-30%-ը, իսկ մուգ գույնը` 70-80%-ը:
Եթե ծով եք մեկնել` առաջին մի քանի օրը զգուշացեք արեւի ուղիղ ճառագայթների տակ գտնվելուց: Ձեր օրգանիզմը պետք է սովորի նոր միջավայրին: Ցերեկային ժամերին խորհուրդ չի տրվում հայտնվել լողափում` առանց լայնեզր գլխարկի, արեւային ակնոցի ու անձրեւանոցի:
Ծովից դուրս գալուց հետո, անպայման, ընդունեք լոգանք: Հիշեք, որ աղի ջուրը նպաստում է մաշկի չորացմանը: Ի դեպ, լայնեզր գլխարկը կպահպանի նաեւ արեւային հարվածից:
Ինչպես գիտեք, այրվածքի դեպքում ընդունված է օգտագործել մածունը: Խորհուրդ կտայի հրաժարվել այս անհեթեթ մեթոդից: Մածունից մաշկը կրկնակի չորանում է: Արդյունքում մարդը կրկնակի այրվածք է ստանում: Մածունն ունի միայն զովացնող ազդեցություն: Օգտակար է չիչխանի յուղը, եթե անմիջապես եք դնում մաշկի վրա: Այն բավականին կթեթեւացնի տուժածի վիճակը:
Կարող եք օգտագործել տեղային միջոցներ, դա կախված է այրվածքի աստիճանից: Եթե թեթեւ այրվածք է, այսինքն` առաջին աստիճանի, երբ մաշկի վրա առկա է կարմրություն, ապա խոնավացնող եւ փափկացնող միջոցների օգտագործումը լիովին բավարար կլինի: Երկրորդ աստիճանի այրվածքի դեպքում, երբ մաշկի վրա առկա են բշտիկներ, հարկ է մշակել մաշկը հատուկ դեղամիջոցներով: Այս դեպքում ինքնաբուժությամբ զբաղվելը ցանկալի չէ: Երրորդ աստիճանի այրվածքների դեպքում վնասված են լինում մաշկի խոր շերտերը: Այս դեպքում պետք է անհապաղ դիմել մասնագետի օգնությանը: Առաջին րոպեներին կօգնի մաշկի այրված մասը մոտ 10-15 րոպե սառը ջրի տակ պահելը:

ՎԼԱԴ ՄՈՒՐԱԴՅԱՆ