ԿԱՌԱՎԱՐՈՒԹՅՈՒՆԸ ԲԱՑԱՏՐԱԿԱՆ ԱՇԽԱՏԱՆՔՆԵՐ ԿՏԱՆԻ ՀԱՏՈՒԿ ՕԵԿ-Ի ՀԱՄԱՐ

ԿԱՌԱՎԱՐՈՒԹՅՈՒՆԸ
ԲԱՑԱՏՐԱԿԱՆ ԱՇԽԱՏԱՆՔՆԵՐ ԿՏԱՆԻ ՀԱՏՈՒԿ ՕԵԿ-Ի ՀԱՄԱՐ

ՕԵԿ-ական պատգամավորներ Հեղինե Բիշարյանի, Հովհաննես Մարգարյանի եւ Մհեր Շահգելդյանի օրենսդրական նախաձեռնությունը, որով առաջարկվում էր կարգավորել աուդիտորական գործունեությունը եւ այն մոտեցնել միջազգային ստանդարտներին, երեկ մերժվեց ՀՀ կառավարության նիստի ժամանակ:
Ինչպես նիստի ժամանակ նշեց ՀՀ ֆինանսների նախարար ԳԱԳԻԿ ԽԱՉԱՏՐՅԱՆԸ. ՙՕրենքի նախագիծը բխում է աուդիտորական գործունեությունը կարգավորող օրենսդրական դաշտը կատարելագործելու, միջազգային չափանիշներին մոտեցնելու անհրաժեշտությունից, բայց օրենքի նախագծով առաջարկվող աուդիտորների մասնագիտական պատասխանատվության պարտադիր ապահովագրության պահանջի սահմանումը ներառում է բազմաթիվ ռիսկեր, որոնց զսպման մեխանիզմներն անհրաժեշտ է ամբողջությամբ կարգավորել օրենքի նախագծով՚: ՕԵԿ-ական օրենքի նախագիծը մերժելու վերաբերյալ ՀՀ վարչապետ ՀՈՎԻԿ ԱԲՐԱՀԱՄՅԱՆԸ, ըստ էության, առաջարկեց նախ` բացատրական աշխատանքներ տանել ՕԵԿ-ական պատգամավորների հետ. ՙՊատգամավոներից շատերը դժգոհում են, թե իրենց նախագծերը չեն քննարկվում կառավարությունում: Դրա համար մինչեւ օրենքի նախագիծը կառավարության օրակարգ մտցնելը, հրավիրեք պատգամավորներին ու քննարկեք նախագիծը, որ իրենց համար էլ պարզ լինի, թե ինչ հիմնավորմամբ է մերժվում՚:

ՀՐԱՆՏ ՍԱՐԱՖՅԱՆ