ԱՐԱՄ ՆԻԿՈԼՅԱՆ.«ԿԱՏԱՐՎԵՑ ԱՅՆ ԵՐԱԶԸ, ԻՆՉՆ ՈՒԶՈՒՄ ԷԻ ՍՏԱՆԱԼ»

ԱՐԱՄ ՆԻԿՈԼՅԱՆ.«ԿԱՏԱՐՎԵՑ ԱՅՆ ԵՐԱԶԸ, ԻՆՉՆ ՈՒԶՈՒՄ ԷԻ ՍՏԱՆԱԼ»

Օրերս Սեւանա լճի հենց կենտրոնում` լաստանավի վրա, կայացավ դիզայներ ԱՐԱՄ ՆԻԿՈԼՅԱՆԻ «Իմ երազը» նոր հավաքածուի ցուցադրություն-վաճառքը: «ԵՐԱԶ» բարեգործական հիմնադրամի հետ համատեղ` դիզայներ Արամ Նիկոլյանը այս յուրահատուկ միջոցառումը նախաձեռնել էր` հանուն շաքարային դիաբետ ունեցող երեխաների: Միջոցառումը վարում էին ԱՐԱՄ ՉԱԽՈՅԱՆՆ ու գեղեցկուհի ԳԱՅԱՆԵ ԱՍԼԱՄԶՅԱՆԸ, ովքեր նույնպես կրում էին հավաքածուից ընտրված հագուստներ: Ցուցադրությունն ուղեկցվում էր DJ Dale-ի երաժտությամբ եւ ծաղրածու ԶուԶունի չարաճճիությամբ: Մինչ բուն ցուցադրությունը, նախ ներկաները տեսան, թե ինչպես է ծնվել հավաքածուի գաղափարը, որի ընթացքում երեխաները հենց տեղում մոդելների հագուստների վրա նկարեցին գեղեցիկ պատկերներ: Այո, տղամարդկանց եւ կանանց համար նախատեսված բոլոր 45 զգեստները պատրաստված էին սպիտակ կտորներից, որոնց վրա արտատպված էին երեխաների կողմից նկարված պատկերներ: Ցուցադրությանը ներկա շոու-բիզնեսի հայտնի անձնավորություններից շատերը նույնիսկ գնեցին իրենց հավանած հագուստներից: Առաջին քայլն արեց երգչուհի, պրոդյուսեր ՆԱԴԵԺԴԱ ՍԱՐԳՍՅԱՆԸ, ըստ նրա. «Արամը միշտ ինձ զարմացրել է, շատ վաղուց ենք իրար հետ աշխատել, դեռ սկսնակ դիզայներ էր: Նրա մտքերը միշտ եղել են ազատ, տարօրինակ, դրա համար շատ միջոցառումներին մեր հագուստների ձեւավորումն արել է Արամը: Սկզբում, երբ իմացա, զարմացա, թե ինչո՞ւ Սեւանում, հետո մտածեցի, որ լավ բան է մտածել, կօդափոխվենք: Բայց որ այսպես լաստանավով պիտի ամբողջ Սեւանա լճով շրջեինք` այսպիսի գեղեցիկ ցուցադրության ուղեկցությամբ, չէի պատկերացնում: Իսկ սպիտակ հագուստները շատ գեղեցիկ մտահղացում էր, ձեւավորված հետաքրքիր լուծումով` երեխաների նկարներով, դա կրկին Արամի երեւակայության արդյունքն է: Կարեւորը, որ այդ հագուստները կրելի էին»:

Դերասանուհի, հաղորդավարուհի ՆԱԶԵՆԻ ՀՈՎՀԱՆՆԻՍՅԱՆԸ նույնպես գտավ նախընտրելի հագուստ, որը ձեռք բերելուց հետո խոստացավ անպայման կրել. «Սա շատ լավ նախաձեռնություն է, օրիգինալ մտածված, աշխատված, երեւակայությանը ազատություն տված, որտեղ միջոցների սահմանափակում չկար: Ուրախ եմ, որ կան նման հիմնադրամներ, հուսով եմ` նման համատեղ համագործակցության պարբերական առիթ կլինի: Սա ամենաքիչ բանն է, որ մենք կարող ենք անել մեր երեխաների, վաղվա օրվա համար: Ես արդեն գնել եմ մեկ հագուստ, այն իմ սիրած երկար փեշերից է, սիրով կկրեմ առօրյայում»:

«Իրավունքի» հետ զրույցում դիզայներ ԱՐԱՄ ՆԻԿՈԼՅԱՆՆ անկեղծացավ, որ մտահղացումը եղել է «Երազ» հիմնադրամի կողմից.

- Ծնվեց գաղափար, որ երեխաների հետ համատեղ նման նախագիծ անել եւ մոտ 2 ամիս աշխատեցինք, նկարեցինք, երեխաների նկարներից ստացանք կտորներ ու այսօր տեսաք արդյունքը, կատարվեց այն երազը, ինչն ուզում էի ստանալ, ստացա:

- Փաստորեն, ահագին գնորդներ եղան:

- Չգիտեմ, դեռ տեղյակ չեմ, ուզում եմ մաքսիմալ օգնած լինել այդ երեխաներին, մինչեւ վերջին լուման ներդնել այդ գործի մեջ, որովհետեւ շատ եռանդ ու ջանք է դրվել, չեն խնայվել շատ մարդկանց ռեսուրսներ: Ուրախ եմ, որ բարի ու դրական մթնոլորտ էր, այնքան դրական, որ այսօր ամպերը ուղղակի ցրվեցին, երբ որ եկանք սելավի նման անձրեւ էր գալիս:

- Ներկաներն ասում էին` հագուստները կրելի են:

- Խնդիրն այդպես էր դրված, որ կրելի լինեն, խնդիր չլինի չափսերի առումով: Դրա համար մոդելներն էլ ընտրված են եղել, որ մարդկանց կազմվածքներին մոտ լինեն, չէինք ընտրել հատուկ բարձրահասակ մոդելներ` 1.80 հասակով:

Երգչուհի ՍՈՖԻ ՄԽԵՅԱՆԸ նույնպես իր լուման ունեցավ, ընտրելով ցուցադրված հագուստներից մեկը. «Սեւանը, լաստանավը, այս ամենը կարող եմ մղել 2-րդ պլան, իրականում գլխավորը գաղափարն էր, որը շատ դրական առողջ ու լավ բան է մտածված, որին իհարկե եկան օգնության Սեւանը եւ լաստանավը: Վստահ եմ, որ կունենա հաջողություն եւ այն հագուստները, որոնք Արամի կողմից տիպիկ եւ զգացմունքով արված էին իրենց տեսակի մեջ կգտեն իրենց հասցեատերերին, ինչն էլ կնպաստի բարեգործությանը: Կար մի հագուստ, որի միայն վերեւի հատվածն էր, որ իմ տեսակին մոտ էր բնորոշ, արդեն կփորձեմ հետաքրքվել եվ գնել այն»:

Երեւան քաղաքի գլխավոր դիզայներ ԳԱԳԱ ԱՄԱՏՈՒՆԻՆ նույնպես ուներ իր համար նախընտրած հագուստ. «Մի հագուստ կար որը որոշակի փոփոխությունների ենթարկելով կհագնեի: Կփոփոխեի, որովհետեւ ծաղիկներով դժվար կլիներ Երեւանում կրելը, համենայնդեպս, ես այն դիտարկեցի ավելի շատ որպես արվեստի գործ, ոչ թե կրելու համա նախատեսված հագուստր: Անկախ ամեն ինչից կարծում եմ, որ այս գեղեցիկ միջոցառումը լրիվ համապատասխանում էր Արամ Նիկոլյանի ոճին: Նա միշտ օգտագործում է շատ հետաքրքիր վայրեր` իր ցուցադրությունները անելու համար»:

Առավել մանրամասն դիտե՛ք տեսանյութում.

Նյութը` ԼԻԼԻԹ ԵՂԻԱԶԱՐՅԱՆԻ

Լուսանկարները` ԳԵՎՈՐԳ ՓԻԼԹՈՅԱՆԻ