ԲՐԻՏԱՆԱԿԱՆ ԾՐԱԳՐԻՑ «ՕԳՏՎԵԼՈՒ ՁԵՎԸ ՉԳՏՆԵՆՔ` ԿՋԱՐԴԵՆ ՄԵԶ»

ԲՐԻՏԱՆԱԿԱՆ ԾՐԱԳՐԻՑ «ՕԳՏՎԵԼՈՒ ՁԵՎԸ ՉԳՏՆԵՆՔ` ԿՋԱՐԴԵՆ ՄԵԶ»

Երեկ Հայաստան-Մեծ Բրիտանիա բարեկամական խմբի ղեկավար, ԱԺ «Ժառանգություն» խմբակցության պատգամավոր Թեւան Պողոսյանը, ինչպես նաեւ խմբի մյուս անդամները մեծ ոգեւորությամբ նշում էին Հայոց ցեղասպանության 100-րդ տարելիցի միջոցառումներին բրիտանական կողմի պատրաստակամության, հայ-բրիտանական բարեկամության եւ այլնի մասին: Թե արդյոք պե՞տք է հավատալ Մեծ Բրիտանիայի խոստումներին, եւ այսօր խոսել հայ-բրիտանական բարեկամության մասին, երբ Հայոց ցեղասպանության 100-րդ տարելիցին ընդառաջ, «Եվրոպական ինտեգրացիա» հասարակական կազմակերպությունը` ՀՀ-ում Մեծ Բրիտանիայի դեսպանատան աջակցությամբ սկսել է «Թուրքը, որը փրկեց ինձ» խորագրով մրցույթ, «Իրավունքը» պարզեց ԹԵՎԱՆ ՊՈՂՈՍՅԱՆԻՑ.
- Իսկապես, հարաբերություններ ասվածը շատ կարեւոր է, եւ դու չես կարող միայն երկրի նախագահների մակարդակով հարաբերություններ հաստատել: Հանրությունը պետք է իրար հետ աշխատի: Հիմա, եթե եղել է որեւէ թուրք, որը փրկել է հային ցեղասպանությունից, էլի նշում է, որ հայոց ցեղասպանությունից է փրկվել: Եվ կարող ենք դա օգտագործել` ասելով, որ տես` մեկը սպանել է, մյուսը` փրկել: Խնդիրն այն է, թե ինչպես ենք մենք օգտագործելու դա: Մեծ Բրիտանիան Թուրքիայի հետ լավագույն գործընկեր է, ավելին` բրիտանա-ադրբեջանական հարաբերությունները մի տասը մակարդակ ցածր են, քան բրիտանա-թուրքական հարաբերությունները: Հիմա արդյո՞ք դրանից պետք է նեղվենք, թե՞ փորձենք հասկանալ` ինչպես կարող ենք օգտագործել այդ ամենը: Եթե այդ ծրագրից օգտվելու ձեւը գտնենք, կշահենք,  չգտնենք` մեզ կջարդեն: Ընդհանրապես այսօր ոչ թե պետք է զարմանանք, որ այդպիսի ծրագիր է իրականացվում, այլ պետք է կարողանանք այդ ծրագիրը ճիշտ ձեւով օգտագործել` հայկական տեսակետի առաջխաղացման համար:

ՀՐԱՆՏ ՍԱՐԱՖՅԱՆ